Go Back

Kĩambĩrĩria Chapter 16

• 1. Na rĩrĩ, Sarai mũtumia wa Aburamu aatũire atamũciarĩire kaana, na aarĩ na mũirĩtu Mũmisiri wamũtungatagĩra wetagwo Hagari.
• 2. Nake Sarai agĩkĩĩra Aburamu atĩrĩ, Rĩu-rĩ, Jehova aanangiria gũciara; ngũgũthaitha atĩ ũtonye harĩ mũirĩtu ũyũ ũndungatagĩra; hihi no gũkorũo ndaya kwĩhanda nĩ ũndũ wake. Nake Aburamu agĩĩtĩkĩra kũigua mũgambo ũcio wa Sarai.
• 3. Nake Sarai, mũtumia wa Aburamu, agĩtwara mũirĩtu ũcio Mũmisiri wamũtungatagĩra, wetagwo Hagari, akĩmũneana harĩ Aburamu atuĩke mũka; na nĩ rĩrĩa Aburamu aakorirũo aikarĩte mĩaka ikũmi bũrũri ũcio wa Kanaani.
• 4. Nake agĩgĩtonya harĩ Hagari, nake akĩgĩa ihu; na rĩrĩ, rĩrĩa onire atĩ ekũgĩa ihu-rĩ, mũtumia ũcio mũmwathi agĩcoka kũrorũo manyiira nĩwe.
• 5. Nake Sarai akĩĩra Aburamu atĩrĩ, Hĩ! Ũũru ũyũ njĩkĩtwo ũrogũcokerera arĩ wee; nĩ kũhe ndakũheire ndungata yakwa ya mũirĩtu, ngĩmĩiga gĩthũri-inĩ gĩaku, nayo rĩrĩa yonire atĩ ĩkũgĩa ihu, yacoka kũndora manyiira; ũhoro ũcio-rĩ, tũrogĩtuithanio nĩ Jehova!
• 6. Nowe Aburamu akĩĩra Sarai atĩrĩ, Kĩone! Mũirĩtu ũcio waku arĩ o moko-inĩ maku; kĩmwĩke o ta ũrĩa ũkuona kwagĩrĩire. Nake Sarai agĩitĩka kũmũnyarira mũno, nake akĩĩũrĩra, akiuma harĩ we.
• 7. Na rĩrĩ, mũraika wa Jehova akĩmũkora handũ haatherũkaga maĩ werũ inĩ, itherũkĩro o rĩrĩa rĩĩ njĩra-inĩ ya gũthiĩ Shuri.
• 8. Agĩkĩmũũria atĩrĩ, Wee, Hagari, ndungata ya Sarai, uuma kũ? na wathiĩ kũ? Nake akiuga atĩrĩ, Nĩ kũũra njũrĩte, ngoima gwĩ Sarai mũtumia ũrĩa ndungatagĩra.
• 9. Nake mũraika ũcio wa Jehova akĩmwĩra, atĩrĩ, Coka kwĩ mũtumia ũcio ũtungatagĩra, ũmwĩnyihĩrie.
• 10. Ningĩ mũraika ũcio wa Jehova akĩmwĩra atĩrĩ, Nĩngagũthegeeria mbeũ mũno, nayo ndĩgatarĩka nĩ ũndũ wa ũrĩa ĩingĩhĩte.
• 11. O na ningĩ mũraika wa Jehova akĩmwĩra ũũ: Atĩrĩrĩ, rĩu wĩ ihu, na ũgaciara kahĩĩ, ũgatue Ishumaeli, nĩ ũndũ Jehova nĩeiguĩrĩire ũrĩa ũnyarirĩtwo.
• 12. Nako gagatuĩka mbũrũrũ ta ndigiri ya werũ, na gatũũre kogitanaga na andũ othe, o nao andũ othe matũũre makogitaga; na ningĩ gagetũũria na mwena wa irathĩro wa ariũ a ithe arĩa angĩ othe.
• 13. Nake Hagari agĩtua Jehova ũcio wamwarĩirie ũũ: Wee wĩ Mũrungu-Ũrĩa-Muoni; nĩ ũndũ we eyũririe atĩrĩ, Anga ndĩ kwĩonera ũrĩa ũnyonaga, na nduĩke ndĩ o ho?
• 14. Tondũ ũcio gĩthima kĩu gĩgĩĩtwo Biri-lahai-roi, na atĩrĩ, gĩĩ gatagatĩ ga Kadeshi na Beredi.
• 15. Nake Hagari agĩciarĩra Aburamu kahĩĩ, nake Aburamu agĩtua kahĩĩ kau gake aaciarĩirũo nĩ Hagari, Ishumaeli.
• 16. Nake hĩndĩ ĩo Hagari aamũciarĩire Ishumaeli, Aburamu aarĩ wa mĩaka mĩrongo ĩnana na ĩtandatũ.

Home