Go Back

Kĩambĩrĩria Chapter 42

• 1. Na rĩrĩ, rĩrĩa Jakubu aamenyire atĩ Misiri kwĩ irio, akĩũria ariũ ake atĩrĩ, Nĩ-kĩ gĩgũtũma mũtũũre mũcũthanĩrĩirie o ro ũguo?
• 2. Agĩkiuga ũũ: Atĩrĩrĩ, nĩnjiguĩte atĩ Misiri kwĩ irio, gĩũkĩrei mũikũrũke kuo mũgatũgũrĩre irio, nĩ getha tũtũũre muoyo, tũtigakue.
• 3. Nao ariũ a ithe na Jusufu, andũ ikũmi, magĩikũrũka, magĩthiĩ kũgũra ngano Misiri.
• 4. No rĩrĩ, Jakubu ndaigana kũreka Benjamini, mũrũ wa nyina na Jusufu, athiĩ hamwe na ariũ a ithe; nĩ ũndũ oigire atĩrĩ, Nĩ getha hihi ndakae kuona ũũru.
• 5. Na rĩrĩ, ariũ a Isiraeli magĩgĩtwarana na arĩa maathiaga kũgũra irio, nĩ gũkorũo kũu bũrũri wa Kanaani kwarĩ ng’aragu.
• 6. Nake Jusufu nĩwe wakĩrĩ barũthi wa bũrũri wa Misiri, na nĩwe wendagĩria andũ othe a bũrũri ũcio irio; nao ariũ a ithe na Jusufu magĩgĩthiĩ makĩmũinamĩrĩra, magĩturumithia mothiũ mao thĩ.
• 7. Jusufu agĩkĩona ariũ a ithe, akĩmamenya, no akĩmerigithia, akĩmaarĩria ta ekũmagũũthũkĩra, akĩmoria atĩrĩ, Muumĩte kũ? Nao makiuga atĩrĩ, Tuumĩte bũrũri wa Kanaani, tũgoka kũgũra irio.
• 8. Nake Jusufu nĩaakĩmenyaga ariũ acio a ithe, no-o matiamũmenyaga.
• 9. Jusufu agĩkĩririkana iroto iria aarotire imakoniĩ, akĩmera atĩrĩ, Mũrĩ athigani; mũũkĩte kũmenya ũrĩa bũrũri ũtigĩtwo ũtheri.
• 10. Nao makĩmwĩra atĩrĩ, Aca, tiguo, mwathi witũ, no rĩrĩ, ithuĩ ndungata ciaku, nĩ irio tũũkĩte kũgũra.
• 11. Na ithuothe tũrĩ a ithe ũmwe; na tũrĩ andũ a ma; ithuĩ ndungata ciaku tũtirĩ athigani.
• 12. Agĩkĩmera atĩrĩ, Aca, nĩ gũũka mũũkĩte kũrora ũrĩa bũrũri ũtigĩtwo ũtheri.
• 13. Nao makiuga atĩrĩ, Ithuĩ ndungata ciaku tũrĩ andũ ikũmi na erĩ a ithe ũmwe, tũrĩ ariũ a mũndũ ũmwe wĩ bũrũri wa Kanaani; na atĩrĩrĩ, ũrĩa mũnyinyi witũ, nĩwe rĩu wĩ mũciĩ hamwe na ithe witũ, na nĩkũrĩ ũmwe ũngĩ ũtarĩ ho.
• 14. Nake Jusufu akĩmera atĩrĩ, Ũguo ndoiga nĩguo rĩrĩa ndamwĩra atĩrĩ, Mũrĩ athigani;
• 15. naguo ũndũ ũyũ nĩguo ũkamenyithania atĩ mũrĩ andũ a ma. Atĩrĩrĩ! O ta ũrĩa Firauni atũũraga muoyo-rĩ, mũtirĩ hingo mũkoima gũkũ tiga o mũndũ ũcio mũnyinyi wa ithe wanyu okire haha.
• 16. Rekiai mũndũ ũmwe wanyu agĩre mũndũ ũcio wa ithe wanyu, na inyuĩ muohwo, nĩ getha kũmenyeke kana ũhoro ũcio muugĩte atĩ mũrĩ andũ a ma wĩ ho, kana aca; tondũ kũngĩaga gũtuĩka ũguo, ti-itherũ o ta ũrĩa Firauni atũũraga muoyo-rĩ, mũrĩ athigani.
• 17. Agĩkĩmaikia othe korokoro-inĩ, magĩikara kuo mĩthenya ĩtatũ.
• 18. Na mũthenya wa ĩtatũ wakinya-rĩ, Jusufu akĩmera atĩrĩ, Tondũ nĩndĩĩtigĩrĩte Ngai-rĩ, ĩkai ũndũ ũyũ, nĩguo mũhonoke, mũtũũre muoyo.
• 19. Mũngĩkorũo mũrĩ andũ a ma, rekei mũndũ ũmwe wanyu ohwo nyũmba ĩo ya korokoro mũrĩ, no inyuĩ arĩa angĩ mũthiĩ mũtwarĩre andũ a nyũmba cianyu irio nĩ ũndũ wa ng’aragu ĩrĩa me nayo,
• 20. na mũcoke mũndehere mũndũ ũcio mũnyinyi wa ithe wanyu; ũndũ ũcio nĩguo ũgatũma ũhoro ũcio muugĩte ũmenyeke kũna kũna atĩ nĩ wa ma, na mũtigakua. Magĩgĩĩka o ta ũguo.
• 21. Nao magĩkĩĩrana atĩrĩ, Ti-itherũ ha ũhoro wa mũrũ wa ithe witũ nĩtwaaganire, nĩ ũndũ nĩtwonire thĩna ũrĩa aarĩ naguo mũnene ngoro-inĩ yake hĩndĩ ĩrĩa aatũthaithire na tũkĩrega kũigua; tondũ wa ũguo, thĩna ũcio nĩguo ũratũcokerera rĩu.
• 22. Reubeni agĩkĩmacokeria atĩrĩ, Githĩ niĩ ndiakĩmwarĩirie ngĩmwĩra ũũ: Menyai mwĩke kamwana kau ũũru? Na mũkĩaga kũnjigua. Tondũ ũcio rĩu nĩtũracokererũo nĩ thakame yake.
• 23. Nao matiamenyaga atĩ Jusufu nĩekũigua ũrĩa maroiga, nĩ ũndũ haarĩ mũtabuta wa kũmaiguithania.
• 24. Jusufu agĩkĩmahutatĩra, akĩehera harĩ o, akĩrĩra; ningĩ agĩcoka harĩ o, akĩaria nao, agĩkĩnyita Simeoni akĩmweheria harĩ o, akĩmuoha makĩĩonagĩra na maitho.
• 25. Jusufu agĩgĩcoka agĩathana atĩ maiyũrĩrio irio indo-inĩ iria mokĩte nacio cia gũcikuua, nacio mbia ciao, mũndũ o mũndũ, icokio ikũnia-inĩ rĩake, na maheo irio cia rĩĩgu; naguo ũguo noguo mekirũo.
• 26. Nacio ndigiri ciao magĩcikuuithia irio icio maagũrĩte, magĩĩthiĩra.
• 27. Na rĩrĩ, rĩrĩa mũndũ ũmwe wao aaguũririe ikũnia rĩake nĩ getha ahe ndigiri irio o kũu kĩraaro-inĩ-rĩ, agĩkĩona mbia ciake irĩ mũromo-inĩ warĩo.
• 28. Agĩkĩĩra ariũ a ithe atĩrĩ, Hĩ! Mbia ciakwa nĩ njokie, na irĩ ikũnia-inĩ rĩakwa; magĩgĩtuĩka nda, magĩitĩka kũinaina, makĩũrania atĩrĩ, Hĩ! Kaĩ Ngai aagĩtwĩka atĩa?
• 29. Magĩgĩthiĩ magĩkinya kwĩ Jakubu, ithe wao, kũu bũrũri wa Kanaani, magĩkĩmwĩra maũndũ mothe marĩa monete, makiuga atĩrĩ,
• 30. Mũndũ ũrĩa mũnene wa bũrũri ũcio aatwarĩirie agĩtũgũũthũkĩra, akĩona ta tũrĩ athigani mathiĩte gũthigana bũrũri wao.
• 31. No ithuĩ tukĩmwĩra atĩrĩ, Tũrĩ andũ a ma; tũtirĩ athigani;
• 32. tũrĩ andũ ikũmi na erĩ a ithe ũmwe cono, na ũmwe witũ ndarĩ ho, nake ũrĩa mũnyinyi e na ithe witũ bũrũri wa Kanaani.
• 33. Nake mũndũ ũcio mũnene wa bũrũri ũcio, agĩtwĩra atĩrĩ, Ũndũ ũrĩa ũrĩtũma ’menye wega atĩ mũrĩ andũ a ma nĩ ũyũ, atĩrĩ, ndigĩrai mũndũ ũmwe wa ithe wanyu gũkũ, mũcoke muoe irio nĩ ũndũ wa ng’aragu ĩrĩa ĩrĩ mĩciĩ yanyu, mwĩinũkĩre;
• 34. na thutha wa ũguo mũkandehere mũndũ ũcio mũnyinyi wa ithe wanyu, nĩguo ’menye atĩ mũtirĩ athigani, no mũrĩ andũ a ma; na tondũ ũcio nĩngamũcokeria mũrũ wa ithe wanyu, na nĩmũgetĩkĩrio muonjorithagie gũkũ bũrũri ũyũ.
• 35. Na gũgĩkinya atĩrĩ, atĩ hĩndĩ ĩrĩa monoragia makũnia mao irio-rĩ, o mũndũ wao akĩona kĩohe kĩa mbia ciake ikũnia-inĩ rĩake; na rĩrĩ, o ene, o na ithe wao, mona ciohe icio cia mbia, magĩĩtigĩra.
• 36. Nake Jakubu ithe wao akĩmera atĩrĩ, Mũrĩ kũ’ninĩra ciana ciakwa; Jusufu ndarĩ ho, o nake Simeoni ndarĩ ho, na ningĩ rĩu mũrenda kuoya Benjamini mũthiĩ nake; maũndũ maya mothe-rĩ, no niĩ marakora.
• 37. Reubeni agĩkĩarĩria ithe, akĩmwĩra atĩrĩ, Ingĩkaaga gũgũcokeria mũrũguo-rĩ, nĩũkoraga ariũ akwa erĩ; nĩ wega ũ’nengere niĩ mwene, na nĩngamũcokia harĩ wee.
• 38. Ithe agĩkiuga atĩrĩ, Mũrũ wakwa ndangĩikũrũkania na inyuĩ; nĩ gũkorũo mũrũ wa nyina nĩ mũkuũ, na nowe wiki mũtige; hihi angĩonera ũũru njĩra-inĩ ĩo mũkũgera-rĩ, mwaya gũikũrũkia mbuĩ ciakwa Kwa-ngoma nĩ kĩeha.

Home