Go Back

Kĩambĩrĩria Chapter 46

• 1. Isiraeli agĩkĩgwata rũgendo, agĩthiĩ, na indo ciothe iria aarĩ nacio, agĩgĩkinya Biri-shiba, akĩrutĩra Ngai wa Isaaka, ithe, magongona ho.
• 2. Nake Ngai akĩaria na Isiraeli na kĩoneki ũtukũ, akiuga, Jakubu, Jakubu. Agĩgĩcokia atĩrĩ, Niĩ ũyũ haha.
• 3. Ngai agĩkĩmwarĩria, akiuga atĩrĩ, Nĩ niĩ Ngai, o Ngai wa thoguo; menya wĩtigĩre gũikũrũka Misiri, nĩ ũndũ-rĩ, kũu nĩkuo ngagũtuĩra rũrĩrĩ rũnene.
• 4. Na niĩ nĩngũikũrũkania nawe kũu Misiri, na ningĩ ti-itherũ nĩngacoka gũkwambatia ngũrute kuo ngũcokie gũkũ; na Jusufu nĩwe ũgakũhinga maitho na guoko gwake.
• 5. Jakubu agĩgĩũkĩra, akiuma Biri-shiba; nao ariũ a Isiraeli magĩkuua Jakubu, ithe wao, o na ciana ciao, o na atumia ao, na makari marĩa maarehithĩtio nĩ Firauni ma kũmũkuua.
• 6. Magĩgĩthiĩ na mahiũ mao, o na indo ciao iria maarĩmĩire bũrũri wa Kanaani, magĩkinya Misiri, Jakubu we mwene, o na rũciaro rũake ruothe;
• 7. naguo ũguo nĩ ta kuuga ariũ ake, na ihĩĩ cia ariũ ake, na airĩtu ake, na airĩtu a ariũ ake, o na rũciaro rũake ruothe. Andũ acio othe agĩgĩthiĩ nao Misiri.
• 8. Namo maya nĩmo marĩĩtwa ma ciana cia Isiraeli, iria ciakinyire bũrũri wa Misiri, naguo ũguo nĩ ta kuuga Jakubu we mwene, na ariũ ake: Reubeni, irigithathi rĩa Jakubu,
• 9. me na Hanoku, na Palu, na Hezironi, na Karimi, ariũ a Reubeni.
• 10. Na Jemueli, na Jamini, na Ohadi, na Jakini, na Zoharu, na Shaulu mũrũ wa mũtumia Mũkanaani, ariũ a Simeoni.
• 11. Na Gerishoni na Kohathu, na Merari, ariũ a Lawii.
• 12. Na Eri, na Onani, na Shela, na Perezu, na Zera, ariũ a Juda; no rĩrĩ, Eri na Onani nĩmaakuĩrĩire o bũrũri wa Kanaani. Nao ariũ a Perezu maarĩ Hezironi, na Hamulu.
• 13. Na Tola, na Puva, na Iobu, na Shimuroni, ariũ a Isakaru.
• 14. Na Seredi, na Eloni, na Jahaleeli, ariũ a Zebuluni.
• 15. Acio nĩo ariũ a Lea, arĩa aaciarĩire Jakubu o kũu Padani-aramu, hamwe na mwarĩ ũrĩa wetagwo Dina; andũ othe a ariũ acio ake na airĩtu ake maarĩ mĩrongo ĩtatũ na atatũ.
• 16. O nao arĩa angĩ nĩ Zifioni, na Hagi, na Shuni, na Eziboni, na Eri, na Arodi, na Areli, ariũ a Gadi.
• 17. Na Imuna, na Ishiva, na Ishivi, na Beria, ariũ a Asheri, na Sera, mwarĩ wa nyina wao; na Heberi, na Malikieli, ariũ a Beria.
• 18. Acio nĩo ariũ a Zilipa, ũrĩa Labani aaheire Lea mwarĩ; nao andũ acio nĩo aaciarĩire Jakubu, na maarĩ ikũmi na atandatũ.
• 19. O nao arĩa angĩ nĩ Jusufu, na Benjamini, ariũ a Rakeli, mũtumia wa Jakubu.
• 20. Nake Jusufu, arĩ o kũu bũrũri wa Misiri, aaciarĩirũo Manase na Efiraimu nĩ Asenathu mwarĩ wa Potifera, mũthĩnjĩri-ngai wa Onu.
• 21. Ningĩ Bela, na Bekeri, na Ashibeli, na Gera, na Naamani, na Ehi, na Roshu, na Mupimu, na Hupimu, na Aradi, nĩo maarĩ ariũ a Benjamini.
• 22. Acio nĩo ariũ a Rakeli arĩa aaciarĩire Jakubu; nao andũ acio othe maarĩ ikũmi na ana.
• 23. Nao arĩa angĩ nĩ Hushimu, mũrũ wa Dani.
• 24. Na Jahazeei, na Guni, na Jezeri, na Shilemu, ariũ a Nafitali.
• 25. Acio nĩo ariũ a Biliha, ũrĩa Labani aaheire Rakeli mwarĩ, nao andũ acio nĩo aaciarĩire Jakubu, na othe maarĩ mũgwanja.
• 26. Na rĩrĩ, andũ othe arĩa maatwaranire na Jakubu magĩkinya Misiri a rũciaro rũake, thengia atumia a ariũ ake, acio othe-rĩ, maarĩ mĩrongo ĩtandatũ na atandatũ;
• 27. nao ariũ a Jusufu arĩa aaciarĩire Misiri, nĩ erĩ; tondũ ũcio andũ othe a nyũmba ya Jakubu arĩa maagĩkinyire Misiri maarĩ mĩrongo mũgwanja.
• 28. Nake Jakubu agĩkĩrekia Juda athiage mbere yake kwĩ Jusufu, nĩ getha akonio njĩra ya gũthiĩ Gosheni; nao magĩgĩkinya bũrũri ũcio wa Gosheni.
• 29. Nake Jusufu akĩohithia ngari yake, agĩthiĩ Gosheni agathaganie ithe Isiraeli kuo, agĩkĩmuumĩrĩra, akĩmũhĩmbĩria ngingo, akĩrĩra ihinda inene amũnyitĩte ngingo o ro ũguo.
• 30. Nake Isiraeli akĩĩra Jusufu atĩrĩ, Rĩu o na ingĩkua ti ũũru, kuona atĩ ndĩ kuona ũthiũ waku, ndamenya atĩ no ũtũire muoyo.
• 31. Jusufu agĩkĩĩra ariũ a ithe, o na andũ a nyũmba ya ithe atĩrĩ, Nĩngwambata ’thiĩ ngahe Firauni ũhoro, ndĩmwĩre atĩrĩ, Ariũ a baba, o na andũ a nyũmba ya baba, arĩa maarĩ bũrũri wa Kanaani, nĩmokĩte kũrĩ niĩ;
• 32. nao nĩ arĩithi, nĩ ũndũ matũire marĩithagia mahiũ mao; na nĩmokĩte na mbũri ciao, na ng’ombe, o na indo ciao ciothe.
• 33. Na nĩgũgakinya atĩrĩ, atĩ rĩrĩa Firauni akamwĩta amũũrie, atĩrĩ,
• 34. Mũrutaga wĩra ũ? Nĩmũkamũcokeria mũmwĩre atĩrĩ, Ithuĩ ithuene, ndungata ciaku, o na maithe maitũ, tũrĩ arĩithi kuuma o tũrĩ anyinyi nginya rĩu; ũguo nĩguo mũkoiga nĩguo mũtũũre bũrũri ũyũ wa Gosheni; nĩ gũkorũo mũndũ o wothe mũrĩithi nĩonagwo e thahu harĩ Amisiri.

Home