Go Back

2 Samueli Chapter 16

• 1. Na rĩrĩ, hĩndĩ ĩrĩa Daudi aakorirũo ahĩtũkangĩte hanini hau gacũmbĩrĩ ka rĩambatĩro rĩa kĩrĩma-rĩ, Ziba, ndungata ya Mefiboshethu, ĩgĩtũngana nake, ĩrĩ na ndigiri igĩrĩ itandĩkĩtwo, na igakuuithio mĩgate magana merĩ, o na imanjika igana cia thabibu nyũmũ, o na ikũmba igana cia maciaro ma hĩndĩ ya riũa, o na mondo ya ndibei.
• 2. Nake mũthamaki agĩkĩũria Ziba atĩrĩ, Nĩ atĩa wĩcirĩtie ũkĩndehere indo ici? Nake Ziba agĩkiuga atĩrĩ, Ndigiri ici nĩ cia kũhaicagwo nĩ andũ a nyũmba ya mũthamaki; nayo mĩgate ĩno, o na maciaro maya ma hĩndĩ ya riũa, nĩ cia kũrĩo nĩ aanake; nayo ndibei ĩno nĩ ya kũnyuagwo nĩ arĩa mangĩũrĩrũo nĩ hinya gũkũ werũ-inĩ.
• 3. Nake mũthamaki agĩkĩũria atĩrĩ, Mũrũ wa mwathi waku arĩ ha? Nake Ziba agĩkĩĩra mũthamaki ũũ: Aikarĩte Jerusalemu; nĩ ũndũ oigire atĩrĩ, Ũmũthĩ nĩguo nyũmba ya Isiraeli ĩkũnjokeria ũthamaki wa baba.
• 4. Nake mũthamaki agĩkĩĩra Ziba ũũ: Atĩrĩrĩ, indo ciothe cia Mefiboshethu nĩ ciaku. Nake Ziba agĩkiuga atĩrĩ, Nĩndakwĩnyihĩria; reke njĩtĩkĩrĩke nĩwe, wee mũthamaki ũyũ, mwathi wakwa.
• 5. Na rĩrĩ, mũthamaki Daudi aakinya Bahurimu-rĩ, atĩrĩrĩ, hagĩkiumĩra mũndũ ũmwe hau wa mbarĩ ya nyũmba ya Saulu, wetagwo Shimei, mũrũ wa Gera; agĩkiumagara, agĩũka akĩrumanaga.
• 6. Nake agĩgĩikĩria Daudi, o na ndungata ciake, mahiga; nao andũ othe, na njamba ciothe, magĩikara mwena wa ũrĩo wa mũthamaki o na mwena wa ũmotho.
• 7. Nake Shimei rĩrĩa aarumanaga, oigaga ũũ: Thiĩ na kũu, thiĩ na kũu, mũitithia thakame ũyũ, wee mũndũ mwaganu mũno;
• 8. Jehova nĩwe ũtũmĩte ũcokererũo nĩ thakame yothe ya nyũmba ya Saulu, ũrĩa wee ũthamakĩte ithenya rĩake; nake Jehova nĩaanenganĩra ũthamaki waku aawĩkĩra moko-inĩ ma Abisalomu mũrũguo; atĩrĩrĩ, nĩũcokereirũo nĩ waganu waku wee mwene, nĩ ũndũ wĩ mũitithia thakame.
• 9. Hĩndĩ ĩo Abishai wa Zeruia akĩũria mũthamaki atĩrĩ, Nĩ kĩ gĩgũtũma ngui ĩno nguũ ĩkũrume wee mũthamaki ũyũ, mwathi wakwa? Ndagũthaitha ũreke ninge mũrĩmo, ngamĩeherie mũtwe wayo.
• 10. Nake mũthamaki agĩkiuga atĩrĩ, Ndĩ na ũhoro ũrĩkũ na inyuĩ, inyuĩ ariũ a Zeruia? Tondũ nĩ kũrumana ararumana, na tondũ nĩ Jehova ũmwĩrĩte ũũ: Ruma Daudi-rĩ, nũ ũngĩgĩcoka kũmũũria, Weka ũguo nĩkĩ?
• 11. Nake Daudi agĩkĩĩra Abishai, o na ndungata ciake ciothe, ũũ: Atĩrĩrĩ, kũngĩkorũo mũrũ wakwa, o ũcio uumĩte mũthimo wakwa niĩ mwene, nĩ gũcaria aracaria kũnduta muoyo-rĩ, kaĩ Mũbenjamini ũyũ nake angĩkĩaga gwĩka ũndũ ũcio atĩa? Tiganai nake; rekei arumane, nĩ ũndũ Jehova nĩwe ũmwĩrĩte eke ũndũ ũcio.
• 12. Hihi no gũkorũo Jehova nĩekũrora amenye ũũru ũcio njĩkĩtwo, nake andĩhe anjĩke maũndũ mega nĩ ũndũ wa irumi icio numĩtwo ũmũthĩ.
• 13. Tondũ ũcio Daudi na andũ ake magĩgĩĩthiĩra o ro ũguo na njĩra me rũgongo rũmwe, nake Shimei akĩgera rũgongo rũrĩa rũngĩ ang’ethanĩire na Daudi, nake agĩthiĩ o akĩrumanaga, agĩikagĩria mũthamaki mahiga, o na akĩminjaga tĩri.
• 14. Nake mũthamaki o na andũ othe arĩa maarĩ hamwe nake, magĩgĩkinya Ayefimu, nake Daudi akĩhurũka kuo anogoke.
• 15. Nake Abisalomu, o na arũme othe a Isiraeli, magĩgĩthiĩ magĩkinya Jerusalemu, nake Ahithofeli agĩkorũo arĩ o hamwe nao.
• 16. Na gũgĩkinya atĩrĩ, atĩ hĩndĩ ĩrĩa Hushai ũrĩa Mũariki, mũratawe wa Daudi, aakinyire he Abisalomu-rĩ, Hushai ũcio agĩkĩĩra Abisalomu atĩrĩ, Ngai arogũtũũria, mũthamaki ũyũ! Ngai arogũtũũria, mũthamaki ũyũ!
• 17. Nake Abisalomu agĩkĩũria Hushai atĩrĩ, Githĩ wega ũrĩa ũgĩĩkaga mũrataguo nĩ ũcio? Nĩ kĩ gĩakĩgiririe ũtwarane na mũrataguo?
• 18. Nake Hushai akĩĩra Abisalomu atĩrĩ, Aca, ti ũguo; no rĩrĩ, mũndũ ũrĩa Jehova na andũ aya, o na andũ othe a Isiraeli, mathurĩte-rĩ, niĩ na niĩ no mũhaka nduĩke wake, na njikare harĩ we.
• 19. O na ningĩ-rĩ, mũndũ ũrĩa ndĩkĩagĩrĩirũo nĩ gũtungata nĩ ũrĩkũ? Githĩ ndiagĩrĩirũo nĩ gũtungata mũrũwe, njikaranĩtie nake? O ta ũrĩa ndatungataga thoguo, njikaranĩtie nake-rĩ, ũguo noguo ndĩrĩgũtungataga wee, njikaranĩtie nawe.
• 20. Thutha wa ũguo Abisalomu agĩkĩĩra Ahithofeli atĩrĩ, Ta heana kĩrĩra kĩa ũrĩa twagĩrĩirũo nĩ gwĩka.
• 21. Nake Ahithofeli agĩkĩĩra Abisalomu atĩrĩ, Thiĩ ũkonane na thuriya cia thoguo iria itigĩtwo ciikaragie mũciĩ; nao Aisiraeli othe nĩmekũigua atĩ wĩ mũthũũre biũ nĩ thoguo; nao andũ othe arĩa me hamwe nawe nĩmekũũmĩrĩria magĩe na hinya.
• 22. Tondũ ũcio magĩtambũrũkiria Abisalomu hema nyũmba-inĩ ĩo igũrũ; nake Abisalomu agĩkĩonana na thuriya cia ithe, akĩonagwo nĩ Aisiraeli othe.
• 23. Nakĩo kĩrĩra kĩa Ahithofeli, kĩrĩa aaheanaga matukũ macio, gĩgĩikara o ta kĩa mũndũ wahoyaga ũhoro he Ngai; ũguo noguo kĩrĩra kĩrĩa gĩothe Ahithofeli aaheanaga gĩaikarire me na Daudi, o na me na Abisalomu.

Home