3. Nao andũ magĩgĩtonya itũũra-inĩ mũthenya ũcio na hitho, o ta ũrĩa andũ maconokaga magathiĩ makĩĩhithangaga rĩrĩa morĩte me ita-inĩ.
4. Nake mũthamaki akĩĩhumba ũthiũ, o na akĩanĩrĩra na mũgambo mũnene akĩrĩra akiuga ũũ: Wũi, mũrũ wakwa Abisalomu, wũi Abisalomu, mũrũ wakwa, mũrũ wakwa-ĩ!
5. Nake Joabu agĩgĩthiĩ nyũmba kwĩ mũthamaki, akĩmwĩra atĩrĩ, Ũmũthĩ-rĩ, wee nĩũconorithĩtie ndungata ciaku ciothe, iria ihonoketie muoyo waku mũthenya ũyũ wa ũmũthĩ, o na mĩoyo ya ariũ aku, na ya aarĩ aku, o na mĩoyo ya aka aku, na mĩoyo ya thuriya ciaku;
6. kuona atĩ wee wendaga arĩa magũthũũrĩte, na ũgathũũra arĩa makwendete. Nĩ ũndũ ũmũthĩ nĩuumbũrĩte atĩ andũ arĩa wonaga ta matarĩ bata nĩ anene, o na ndungata ciaku; nĩ gũkorũo ũmũthĩ nĩndamenya atĩ korũo Abisalomu nĩaatigirũo atũũre muoyo, na ithuĩ ithuothe tũkorũo tũkuĩte ũmũthĩ, hĩndĩ ĩo nĩguo ũngĩkenete mũno.
12. Inyuĩ nĩ inyuĩ ariũ a baba, na tuumĩte mũthimo ũmwe kũna; nĩ kĩ gĩgĩtũmĩte mũrigie thutha ũhoro-inĩ ũcio wa kũnyinũkia gwakwa, niĩ mũthamaki wanyu?
13. Ningĩ ĩrai Amasa atĩrĩ, O nawe githĩ tũtiumĩte mũthimo ũmwe nawe? Ngai aro’thũũra, o na anjĩke ũũru makĩria, ũngĩaga gũtũũra wĩ mũnene wa mbũtũ ciakwa cia ita ithenya rĩa Joabu.
14. Nake mũthamaki agĩkĩgucĩrĩria ngoro cia andũ othe a Juda irore harĩ we, o ta irĩ ngoro ya mũndũ ũmwe; tondũ ũcio magĩkĩmũtwarithĩria ũhoro, akĩĩrũo ũũ: Coka wee mwene, o na ndungata ciaku ciothe.
15. Tondũ ũcio mũthamaki agĩgĩcoka, agĩkinya Jorodani. Nao andũ a Juda magĩthiĩ magĩkinya Giligali nĩguo magathaganie mũthamaki wao, mamũringie Jorodani.
16.
Nake Shimei, ũcio mũrũ wa Gera, Mũbenjamini wa Bahurimu, agĩikũrũka na ihenya arĩ hamwe na andũ a Juda, nĩguo agathaganie mũthamaki Daudi.
17. Nakuo gũgĩkorũo kwarĩ andũ ngiri ĩmwe a Benjamini maarĩ hamwe nake, nake Ziba, ũcio warĩ ndungata ya mũciĩ wa Saulu, aarĩ ho, me hamwe na ariũ ake ikũmi na atano, o na ngombo ciake mĩrongo ĩĩrĩ. Nao magĩkĩringa Jorodani makĩonagwo nĩ mũthamaki.
18. Naho hagĩkĩrehwo gĩtarũ kĩringie andũ a nyũmba ya mũthamaki, o na kĩrute mawĩra o ta ũrĩa angĩona maagĩrĩire kũrutwo. Nake Shimei ũcio wa Gera, aarĩkia kũringa Jorodani, akĩĩgũithia thĩ mbere ya mũthamaki.
19. Nake agĩkĩĩra mũthamaki atĩrĩ, Wee, mwathi wakwa, tiga kũndua mwĩhia, o na kana ũririkane ũũru ũrĩa niĩ, ndungata yaku, ndekire na ũkĩgu mũthenya ũrĩa wee, mũthamaki ũyũ, mwathi wakwa, woimagarire ũkiuma Jerusalemu; o na ningĩ tiga kũiga ũũru ũcio ngoro-inĩ yaku, mũthamaki ũyũ.
20. Nĩ gũkorũo niĩ, ndungata yaku, nĩnjũĩ atĩ nĩndehirie; na tondũ ũcio-rĩ, ta one, atĩ nĩ niĩ nyambĩte gũũka ũmũthĩ mbere ya andũ arĩa angĩ othe a nyũmba ya Jusufu, ngaikũrũka njũke ngũthaganie mũthamaki ũyũ, mwathi wakwa.
21. No rĩrĩ, Abishai wa Zeruia agĩcokia akiuga atĩrĩ, Githĩ Shimei ndekũũragwo nĩ ũndũ wa ũhoro ũcio, nĩ ũndũ nĩaarumire mũitĩrĩrio maguta wa Jehova?
22. Nake Daudi agĩkiuga atĩrĩ, Ndĩkĩrĩ na ũhoro ũrĩkũ na inyuĩ, inyuĩ ariũ a Zeruia, atĩ nĩkĩo mũkwenda gũtuĩka thũ ciakwa mũthenya wa ũmũthĩ? Anga nĩkũrĩ mũndũ o na ũmwe ũngĩũragwo thĩinĩ wa Isiraeli ũmũthĩ? Nĩ ũndũ-rĩ, githĩ niĩ ndikĩũĩ ũmũthĩ atĩ nĩ niĩ mũthamaki wa gũthamakĩra Isiraeli?
24.
Na rĩrĩ, Mefiboshethu wa Saulu, agĩgĩikũrũka agathaganie mũthamaki nake ndaagĩĩthambĩte magũrũ, o na kana akeyenja nderu, o na kana agathambia nguo ciake, gwata mũthenya ũrĩa mũthamaki oimire mũciĩ, o nginya mũthenya ũrĩa aacokire kũinũka na thayũ.
35. Hau ndĩ ũmũthĩ-rĩ, ’ninĩte mĩaka mĩrongo ĩnana; anga ndakĩhota gũthurania indo njega na njũru? O na ningĩ niĩ, ndungata yaku-rĩ, anga ndakĩhota kũigua mũcamo wa kĩrĩa ngũrĩa, kana kĩrĩa ngũnyua? Ningĩ-rĩ, anga ndakĩhota o na rĩ gũcoka kũigua mĩgambo ya arũme o na andũ-a-nja makĩina? Na tondũ ũcio niĩ ndungata yaku ngũgĩkũnogia wee, mũthamaki ũyũ, mwathi wakwa, nĩ ũndũ kĩ?
37. Reka niĩ, ndungata yaku, ndagũthaitha, ’hũndũke, nĩ getha ngakuĩre itũũra-inĩ riitũ, hakuhĩ na mbĩrĩra ya baba na maitũ. No atĩrĩrĩ, ndungata yaku, Kimuhamu, nĩyo ĩno; nĩĩringe arĩ yo hamwe nawe mũthamaki ũyũ, mwathi wakwa, ũgakĩmĩĩke o ta ũrĩa ũrĩona kwagĩrĩire.
38. Nake mũthamaki agĩgĩcokia atĩrĩ, Nĩ wega; Kimuhamu nĩegũkĩringania na niĩ, na nĩngamwĩka o ta ũrĩa wee mwene ũngĩona kwagĩrĩire; o na ũndũ ũrĩa wothe ũrĩbatario nĩguo kũrĩ niĩ-rĩ, nĩngũgwĩka guo.
40. Mũthamaki agĩkĩringa agĩthiĩ Giligali, o nake Kimuhamu akĩringania nake; nao andũ othe a Juda, o na gĩkundĩ kĩmwe kĩa andũ a Isiraeli, magĩkorũo me ho makĩringia mũthamaki.
41. Na atĩrĩrĩ, andũ othe a Isiraeli magĩthiĩ magĩkinya he mũthamaki, makĩmũũria atĩrĩ, Rĩu-rĩ, mũthamaki ũyũ, nĩ kĩ gĩgĩtũmĩte ariũ a ithe witũ, andũ aya a Juda, matũtunye wee na wara, magagĩkũringia Jorodani, mwĩ hamwe na andũ a nyũmba yaku, o na andũ othe a Daudi?
42. Nao andũ acio othe a Juda magĩgĩcokeria Aisiraeli acio atĩrĩ, Nĩ gũkorũo mũthamaki ũyũ nĩ wa nyũmba iitũ; rĩu-rĩ, inyuĩ mũkĩrakarĩire ha? Hakĩrĩ kĩndũ o na kĩ tũrĩĩte kĩa indo cia mũthamaki? O na kana agatũhaka na kĩndũ o na kĩmwe?
43. Nao Aisiraeli acio magĩcokeria andũ acio a Juda, makĩmera atĩrĩ, Ithuĩ twĩ na icunjĩ ikũmi ũhoro-inĩ ũcio wa mũthamaki, o na ningĩ nĩ ithuĩ twĩ na kĩhooto gĩa gũtuĩka andũ a Daudi kũrĩ inyuĩ; kuona atĩ ũguo nĩguo gũgĩtariĩ-rĩ, mũgũgĩtũmena nĩkĩ, mũkaaga kwamba kũhoya kĩrĩra harĩ ithuĩ mũtanacokia mũthamaki witũ? Nacio ciugo cia andũ a Juda igĩgĩkorũo irĩ cia wĩĩ gũkĩra cia Aisiraeli.