1. Na rĩrĩ, hĩndĩ ĩrĩa mũthamaki mũndũ-wa-nja wa Sheba aaiguire ngumo ya Suleimani ya ũhoro ũkoniĩ rĩĩtwa rĩa Jehova, agĩthiĩ kũmũgeria na ũndũ wa kũmũũria ciũria cia hinya ma.
2. Nake aakinyire Jerusalemu e na mũrũmanĩrĩro wa andũ aingĩ mũno marĩ na ngamĩra ciakuuĩte mahuti marĩa manungaga wega, na thahabu nyingĩ mũno, o na tũhiga twa goro. Na rĩrĩa aakinyire he Suleimani, akĩaranĩria nake ũhoro wa maũndũ mothe marĩa maarĩ ngoro-inĩ yake.
3. Nake Suleimani agĩkĩmũtaũrĩra maũndũ mothe marĩa aamũũririe; na gũtirĩ ũndũ o na ũmwe wahithĩkire mũthamaki akĩremwo nĩ kũmwĩra.
4. Na rĩrĩ, hĩndĩ ĩrĩa mũthamaki ũcio mũndũ-wa-nja wa Sheba onire ũũgĩ wothe wa Suleimani, o na nyũmba ĩrĩa aakĩte,
5. o na irio cia metha-inĩ yake, o na mĩikarĩre ya ndungata ciake, o na gũtungatĩrũo kũrĩa aatungatagĩrũo nĩ ndungata ciake, o na nguo ciacio, o na andũ arĩa maamũtwaragĩra gĩa Kũnyua, o na ihaicĩro rĩa agĩthiĩ nyũmba ya Jehova, akĩigua ta ngoro yake ĩkuĩte o gũkua.
6. Nake agĩkĩĩra mũthamaki atĩrĩ, Ti-itherũ ũhoro ũrĩa ndaiguire ũkĩheanwo, ndĩ bũrũri wakwa, wa maũndũ marĩa wĩkĩte, o na ũũgĩ ũrĩa wĩ naguo, warĩ wa ma, o ma.
7. No rĩrĩ, ũhoro ũcio ndiigana kũwĩtĩkia tiga o hĩndĩ ĩrĩa ndĩrokire gũkũ, ndĩrawĩonera na maitho makwa na atĩrĩrĩ, nĩnguona atĩ o na nuthu yaguo ndierirũo; ũũgĩ waku na ũtonga nĩikĩrĩte mũno ngumo ĩrĩa ndaiguire.
8. Gũkena-rĩ, nĩ andũ aku, o na ningĩ gũkena-rĩ, nĩ ndungata ici ciaku, o ici irũgamaga mbere yaku hĩndĩ ciothe ikaiguaga ciugo ciaku cia ũũgĩ.
9. Jehova Ngai waku arogoocwo, o we ũrĩa wakenirio nĩwe, agĩgũikarĩria gĩtĩ gĩa ũthamaki gĩa Isiraeli. Ũndũ ũrĩa ũtũmĩte Jehova agũtue mũthamaki nĩguo ũmatuagĩre cira na kĩhooto-rĩ, nĩ atĩ nĩ kwenda endire Isiraeli tene na tene.
10. Nake agĩkĩhe mũthamaki ũcio taranda igana rĩa mĩrongo ĩĩrĩ cia thahabu, o na mahuti marĩa manungaga wega maingĩ mũno mũno, o na tũhiga twa goro; na gũtiacokire kuoneka mahuti manungaga wega maingĩ mũno ta macio mũthamaki mũndũ-wa-nja ũcio wa Sheba aaheire Suleimani, mũthamaki.
11. O na ningĩ gĩkundi kĩa marikabu cia Hiramu, iria ciatwarire thahabu ĩrutĩtwo Ofiru, nĩciatwarire mĩthandari mĩingĩ mũno irutĩtwo o kũu Ofiru, o na tũhiga twa goro.
12. Nake mũthamaki agĩacũhia mĩthandari ĩo akĩmĩtua itugĩ cia nyũmba ya Jehova, o na cia nyũmba ya mũthamaki, o na agĩthondeka nayo inanda iria nene cia mũgeto, o na inanda cia kĩnubi, cia kũhũrũo nĩ andũ arĩa maainaga; na gũtiigana gũcoka kũrehwo o na kana kuoneka mĩthandari ĩngĩ ta ĩo o na ũmũthĩ.
13. Nake mũthamaki Suleimani akĩhe mũthamaki ũcio mũndũ-wa-nja wa Sheba indo ciothe iria eriragĩria, agĩkĩmũhe o kĩrĩa gĩothe etirie, hamwe na indo iria Suleimani aamũheire cia ũtana wake e mũthamaki. Thutha wa ũguo agĩkĩhũndũka, agĩcoka bũrũri wake, we mwene o na ndungata ciake.
14. Na rĩrĩ, thahabu ĩrĩa yakinyaga gwĩ Suleimani mwaka-inĩ ũmwe ĩgĩthimwo-rĩ, yarĩ taranda magana matandatũ ma mĩrongo ĩtandatũ na ithathatũ cia thahabu,
15. thengia ĩrĩa yatwaragwo kuo nĩ athũgũri indo, o na ya wonjoria wa arĩa monjorithagia indo, o na ĩrĩa yarehagwo nĩ athamaki othe a Arabia, o na abarũthi a bũrũri wake.
16. Nake Suleimani, mũthamaki, agĩthondeka ngo cia mũthemba mũnene magana merĩ, cia thahabu ĩturĩtwo; na nĩ cekeri magana matandatũ cia thahabu ciathirĩire ngo ĩmwe.
17. Ningĩ agĩthondeka ngo cia mũthemba mũnyinyi magana matatũ cia thahabu ĩturĩtwo; o ĩmwe yacio ĩgĩthirĩra ratiri ithatũ cia thababu; nake mũthamaki agĩciiga nyũmba ĩrĩa yetagwo nyũmba ya kĩrĩti kĩa Lebanoni thĩinĩ.
18. O na ningĩ mũthamaki ũcio agĩthondeka gĩtĩ-gĩa-ũthamaki kĩnene mũno kĩa mĩguongo, agĩcoka agĩkĩhumba igũrũ guothe na thahabu ĩrĩa njega mũno.
19. Nakĩo gĩtĩ kĩu kĩarĩ na ngathĩ ya makinya matandatũ ya gũkĩhaica; nakuo kũu igũrũ na thutha wa gĩtĩ kĩu kwarĩ gĩthiũrũrĩ; na kĩarĩ na moko mekĩrĩtwo mwena ũyũ, o na mwena ũrĩa ũngĩ, o kũu mĩena-inĩ ya harĩa haikaragĩrũo; na kĩarĩ mĩhianano ya mĩrũthi ĩĩrĩ yarũgamĩtio mĩena-inĩ yerĩ ya moko macio,
20. nayo mĩhianano ĩngĩ ikũmi na ĩĩrĩ ya mĩrũthi ĩkarũgamio mwena ũyũ, o na mwena ũrĩa ũngĩ wa ngathĩ ĩo, makinya-inĩ macio matandatũ; na gũtiarĩ gĩtĩ-gĩa-ũthamaki kĩrĩ gĩathondekwo takĩo ũthamaki-inĩ ũngĩ o na ũrĩkũ.
21. Nacio indo ciothe iria mũthamaki aanyuagĩra ciarĩ cia thahabu, o na indo iria ingĩ ciothe cia nyũmba ĩo yetagwo nyũmba ya kĩrĩti kĩa Lebanoni ciarĩ cia thahabu therie mũno, na gũtiarĩ o na kĩmwe kĩarĩ kĩa betha. Betha-rĩ, ndĩonagwo ta ĩrĩ bata o na hanini matukũ macio ma Suleimani.
22. Nĩ gũkorũo mũthamaki ũcio aarĩ na marikabu cia Tarishishi, hamwe na gĩkundi gĩa ĩcio cia Hiramu, o kũu iria-inĩ; na rĩrĩ, o thĩinĩ wa mĩaka ĩtatũ ĩtatũ-rĩ, marikabu icio cia Tarishishi ciokaga ihinda rĩmwe, ikarehe thahabu, na betha, na mĩguongo, na nũgũ, o na nyamũ cia mathagu ciĩtagwo tauthi.
23. Tondũ ũcio mũthamaki Suleimani agĩgĩkĩra athamaki arĩa angĩ othe a thĩ na ũtonga, o na ũũgĩ.
24. Nao andũ a mabũrũri mothe magacaragia ũrĩa mangĩona Suleimani ũthiũ, nĩ getha maigue ũũgĩ wake ũrĩa Ngai aamwĩkĩrĩte ngoro-inĩ yake.
25. Nao othe, o mũndũ akĩmũtwarĩra iheo, nacio ciarĩ indo cia betha, na cia thahabu, na nguo, na nguo cia igera cia kwĩhumbwo hĩndĩ ya ita, na mahuti marĩa manungaga wega, na mbarathi, o na nyũmbũ, nacio icio ciatwaragwo mwaka o mwaka ta irĩ igoti.
26. Nake Suleimani akĩĩyũnganithĩria ngari cia ita, agĩcicokereria, o na andũ arĩa maathiaga mahaicĩte mbarathi; agĩkĩgĩa na ngari ngiri ĩmwe na magana mana cia ita, o na andũ ngiri ikũmi na igĩrĩ arĩa maathiaga mahaicĩte mbarathi, akĩmaiga matũũra-inĩ marĩa maaigagwo ngari icio, o na hamwe na mũthamaki kũu Jerusalemu.
27. Nake mũthamaki ũcio agĩkĩingĩhia betha o nginya ĩkonagwo ĩhaana o ta ĩrĩ mahiga kũu Jerusalemu, o nayo mĩtarakwa akĩmĩingĩhia o ta mĩborothandi ĩrĩa ĩiyũrĩte bũrũri ũrĩa mũgũu.
29. Nacio cekeri magana matandatũ cia betha nĩcio ciarutagwo ngari ĩmwe ya ita ĩkĩambatio ĩrutĩtwo Misiri, o nayo mbarathi ĩmwe ĩkĩrutwo kuo yarutagĩrũo cekeri igana rĩa mĩrongo ĩtano; naguo ũguo nĩguo athamaki othe a Ahiti, o na athamaki a Suriata, maacithogoraga matwarĩirũo nĩ andũ acio a Suleimani a wonjoria.