1. Na rĩrĩ, ndũmĩrĩri ya Jehova ĩgĩgĩkinyĩrĩra Jehu wa Hanani ĩkoniĩ Baasha, ĩĩranĩtwo ũũ:
2. Atĩrĩrĩ, kuona atĩ ndagũtũũgĩririe, ngĩkũruta rũkũngũ-inĩ, ngĩgũtua mũnene wa gwatha andũ akwa Isiraeli, nawe wathiĩ na mĩthiĩre ya Jeroboamu, watũma andũ akwa Isiraeli mehie, maa’thirĩkia na mehia mao maandakaria-rĩ,
3. nĩ ta kũhaata ngũkũhaatithia, wee Baasha, ũninwo biũ, hamwe na nyũmba yaku; nayo nyũmba yaku ndĩmĩtue o ta nyũmba ya Jeroboamu wa Nebati.
4. Mũndũ wa Baasha ũrĩa ũgakuĩra itũũra-inĩ akarĩĩka nĩ magui; ningĩ mũndũ wake ũrĩa ũgakuĩra gĩthaka-inĩ, akarĩĩka nĩ nyamũ cia rĩera-inĩ.
5. Na rĩrĩ, ciĩko iria ingĩ cia Baasha, na maũndũ marĩa ekire, o na hinya ũrĩa aarĩ naguo-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Isiraeli?
6. Nake Baasha agĩgĩkoma hamwe na maithe, agĩthikwo o kũu Tiriza; nake Ela, mũrũwe, agĩthamaka ithenya rĩake.
7. Ningĩ ndũmĩrĩri ĩo ya Jehova ĩgĩkinyĩrĩra Jehu wa Hanani, ũcio warĩ mũnabii, ĩkoniĩ Baasha na nyũmba yake, nĩ ũndũ wa maũndũ mothe marĩa ekaga, o macio monagwo marĩ moru nĩ Jehova, agĩkĩmũthirĩkia agĩtũma arakare nĩ ũndũ wa maũndũ marĩa ekaga na moko make, o na ũndũ wa ũrĩa aahaanaine na andũ a nyũmba ya Jeroboamu, o na ũndũ wa ũrĩa aamĩninire biũ.
8. Na rĩrĩ, mwaka wa mĩrongo ĩĩrĩ na ĩtandatũ ĩrĩa Asa, mũthamaki wa Juda, aakorirũo athamakĩte-rĩ, nĩguo Ela, mũrũ wa Baasha, aambĩrĩirie gũthamakĩra Isiraeli o kũu Tiriza, nake agĩgĩthamaka mĩaka ĩĩrĩ.
9. Nake Zimuri, ndungara yake, ũrĩa warĩ mwathi wa nuthu ya ngari ciake cia ita, akĩgĩa ndundu ya kũmũũkĩrĩra; na rĩrĩ, hĩndĩ ĩo Ela aakĩrĩ kũu Tiriza akĩnyuĩra njohi nyũmba ya Ariza, ũrĩa warĩ mũrori wa maũndũ mothe ma nyũmba yake kũu Tiriza, na aarĩ mũrĩu;
10. nake Zimuri agĩgĩtonya kuo akĩmũgũtha, akĩmũũraga, o mwaka wa mĩrongo ĩĩrĩ na mũgwanja ĩrĩa Asa, mũthamaki wa Juda, aakorirũo athamakĩte kũu Juda, agĩgĩthamaka ithenya rĩake.
11. Na gũgĩkinya atĩrĩ, atĩ aambĩrĩria gũthamaka, o ihinda rĩrĩa aaikarĩire gĩtĩ gĩa ũthamaki, akĩũraga andũ othe a nyũmba ya Baasha; na ndaigana kũmũtigĩria mwana wa kahĩĩ o na ũmwe, kana mũndũ o na ũmwe wa andũ ao, kana wa arata ake.
12. Ũguo nĩguo Zimuri aaninire nyũmba yothe ya Baasha, o ta ũrĩa uuge wa Jehova watariĩ, ũrĩa aaririe ũkoniĩ Baasha na kanua ka Jehu ũcio mũnabii,
13. nĩ ũndũ wa mehia mothe ma Baasha, o na mehia ma Ela, mũrũwe, marĩa mehirie, na magĩtũma Aisiraeli o nao mehie, magĩthirĩkia Jehova Ngai wa Isiraeli, magĩtũma arakare nĩ ũndũ wa maũndũ mao ma tũhũ.
14. Na rĩrĩ, ciĩko iria ingĩ cia Ela, o na maũndũ mothe marĩa ekire-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Isiraeli?
15. Na rĩrĩ, mwaka wa mĩrongo ĩĩrĩ na mũgwanja ĩrĩa Asa mũthamaki wa Juda, aakorirũo athamakĩte, nĩguo Zimuri nake aathamakire mĩthenya mũgwanja kũu Tiriza. Na hĩndĩ ĩo Aisiraeli maakorirũo maakĩrĩire Gibethoni, itũũra rĩa Afilisiti, mahũrane narĩo.
16. Nao andũ acio maarĩakĩrĩire makĩigua ũhoro ũkĩheanwo ũũ: Atĩrĩrĩ, Zimuri nĩagĩĩte ndundu ya gũũkĩrĩra mũthamaki, akamũũraga; tondũ ũcio Aisiraeli othe magĩtua Omuri, ũrĩa mũnene wa ita, mũthamaki wao mũthenya o ro ũcio marĩ kũu kĩraaro-inĩ, nĩguo athamake bũrũri wa Isiraeli.
17. Nake Omuri agĩkĩambata oimĩte Gibethoni, me na Aisiraeli othe, nao magĩthiũrũrũkĩria Tiriza marĩtunyane.
18. Na gũgĩkinya atĩrĩ, atĩ Zimuri ona atĩ itũũra rĩu rĩgũtunyanwo, agĩthiĩ agĩtonya handũ harĩ kĩhingo kĩrũmu nyũmba-inĩ ya mũthamaki, agĩcoka agĩcina nyũmba ĩo ya mũthamaki, agĩĩcinĩrĩra kuo thĩinĩ na mwaki, agĩgĩkua,
19. nĩ ũndũ wa mehia marĩa ehirie agĩĩka maũndũ marĩa monagwo marĩ moru nĩ Jehova, nĩ ũndũ wa gũthiĩ na mĩthiĩre ya Jeroboamu, o na mehia make marĩa ehirie na agĩtũma Aisiraeli o nao mehie.
20. Na rĩrĩ, ciĩko iria ingĩ cia Zimuri, o na maũndũ marĩa ekire, o na ũhoro wa ũrĩa okĩrĩire mũthamaki-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Isiraeli?
22. No rĩrĩ, andũ arĩa maarũmĩrĩire Omuri makĩhoota acio maarũmĩrĩire Tibini wa Ginathu; Tibini agĩgĩkua, nake Omuri agĩthamaka.
23. Na rĩrĩ, mwaka wa mĩrongo ĩtatũ na ũmwe ĩrĩa Asa, mũthamaki wa Juda, aakorirũo athamakĩte-rĩ, nĩguo Omuri aambĩrĩirie gũthamakĩra Isiraeli, agĩgĩthamaka mĩaka ikũmi na ĩĩrĩ. Mĩaka ĩtandatũ-rĩ, aagĩthamakire arĩ kũu Tiriza.
24. Agĩcoka akĩgũra gĩthũngũri gĩa Samaria gwĩ Shemeru na taranda igĩrĩ cia betha; agĩgĩaka gĩthũngũri-inĩ kĩu, narĩo itũũra rĩu aakire akĩrĩtua Samaria, arĩĩtanĩtie na Shemeru ũcio warĩ mwene kĩrĩma kĩu.
25. Nake Omuri agĩĩka maũndũ marĩa monagwo marĩ moru nĩ Jehova, agĩgĩĩka maũndũ ma waganu gũkĩra arĩa othe maarĩ mbere yake.
26. Nĩ gũkorũo aathiaga na mĩthiĩre yothe ya Jeroboamu wa Nebati, o na mehia make marĩa ehirie na agĩtũma Aisiraeli o nao mehie, mathirĩkie Jehova, Ngai wa Isiraeli, mamũrakarie na maũndũ mao ma tũhũ.
27. Na rĩrĩ, ciĩko iria ingĩ cia Omuri, o na hinya wake ũrĩa onanirie-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Isiraeli?
29. Na rĩrĩ, mwaka wa mĩrongo ĩtatũ na ĩnana ĩrĩa Asa, mũthamaki wa Juda, aakorirũo athamakĩte, nĩguo Ahabu, mũrũ wa Omuri, aambĩrĩirie gũthamakĩra Isiraeli; nake Ahabu ũcio wa Omuri agĩthamakĩra Isiraeli, o kũu Samaria, mĩaka mĩrongo ĩĩrĩ na ĩĩrĩ.
30. Nake Ahabu ũcio wa Omuri agĩĩka maũndũ marĩa monagwo marĩ moru nĩ Jehova gũkĩra arĩa othe maarĩ mbere yake.
31. Na gũgĩkinya atĩrĩ, atĩ tondũ wa ũrĩa onaga ta arĩ ũndũ mũhũthũ mũno kũrũmĩrĩra mehia ma Jeroboamu wa Nebati-rĩ, akĩhikia Jezebeli, mwarĩ wa Ethibaali, mũthamaki wa Azidoni, agĩgĩthiĩ gũtungatĩra Baali, akĩmĩinamĩrĩra amĩhoe.
32. Nake agĩgĩakithĩria Baali kĩgongona thĩinĩ wa nyũmba ya Baali, ĩrĩa aakĩte kũu Samaria.
33. Nake Ahabu agĩgĩthondeka Ashera, o na agĩĩka maũndũ mangĩ ma kũrakaria Jehova, Ngai wa Isiraeli, gũkĩra athamaki arĩa angĩ othe a Isiraeli arĩa maarĩ mbere yake.
34. Na rĩrĩ, matukũ-inĩ make nĩguo Hieli, Mũbeth-eli, aacokereirie itũũra rĩa Jeriko akĩrĩaka; na rĩrĩa aarĩakaga gĩtina kĩarĩo, agĩkuĩrũo nĩ Abiramu mũrũwe wa irigithathi, o na ningĩ rĩrĩa ekagĩra mĩrango yarĩo, agĩkuĩrũo nĩ Segubu, mũrũwe wa kĩhinga-nda; o ta ũrĩa uuge wa Jehova watariĩ, ũrĩa aaririe na kanua ka Joshua, mũrũ wa Nuni.