3. Wee nĩũũĩ ũrĩa baba, Daudi, ataahotire gwakĩra Jehova Ngai wake nyũmba ĩĩtanĩtio na rĩĩtwa rĩake, nĩ ũndũ wa mbaara iria aakoragio nĩ thũ ciake iria ciamũrigicĩirie na ndwere ciothe, o nginya hĩndĩ ĩrĩa Jehova aacihootithirie agĩciiga mũhuro wa makinya make.
4. No rĩrĩ, rĩu Jehova Ngai wakwa nĩa’heete ũhurũko na mĩena yothe, ngatũũra itarĩ na thũ, kana ngakorũo nĩ ũũru o na ũrĩkũ.
5. Na atĩrĩrĩ, rĩu nĩnjirĩire gwakĩra Jehova Ngai wakwa nyũmba ĩĩtanĩtio na rĩĩtwa rĩake, o ta ũrĩa Jehova aarĩirie baba, Daudi, akĩmwĩra atĩrĩ, Mũrũguo ũrĩa ũgaikarĩra gĩtĩ gĩaku gĩa ũthamaki ithenya rĩaku-rĩ, nĩwe ũgaaka nyũmba ĩĩtanĩtio na rĩĩtwa rĩakwa.
6. Na tondũ ũcio athana rĩu atĩ andũ mandemere mĩtarakwa kũu Lebanoni; nacio ndungata ciakwa ciĩturanĩre na ndungata ciaku, na nĩngũkũhe mũcara nĩ ũndũ wa ndungata icio ciaku o ũrĩa wothe ũriuga; nĩ ũndũ wee nĩũũĩ atĩ thĩinĩ witũ hatirĩ mũndũ o na ũmwe ũũhĩgĩrĩire ũtemi wa mĩtĩ ta Azidoni.
7. Na gũgĩkinya atĩrĩ, atĩ hĩndĩ ĩrĩa Hiramu aaiguire ũhoro wa Suleimani, agĩkena o mũno ma, akiuga atĩrĩ, Ũmũthĩ-rĩ, Jehova arogathwo, o we ũcio ũheete Daudi mũriũ mũũgĩ aathage andũ acio aingĩ ũguo.
8. Nake Hiramu agĩkĩrekania he Suleimani, akiuga atĩrĩ, Nĩndaigua ũhoro ũcio ũndehithĩirie naho ha ũhoro ũcio ũkoniĩ mĩgogo ya mĩtarakwa o na mĩthengera-rĩ, nĩngwĩka ũrĩa wothe ũkwenda.
9. Ndungata ciakwa nĩikamĩikũrũkia, imĩrutĩte Lebanoni, imĩkĩnyie iria-inĩ; na niĩ njoke ndĩmĩohithie, ĩgerio iria-inĩ o nginya ĩkinye handũ harĩa ũrĩnjathĩrĩra ndĩmĩohorithĩrie ho, ũmĩoe; nawe ũgĩcoke ũnjĩke ũrĩa nyendete, naguo nĩ atĩ ũ’heage irio cia kũrĩo nĩ andũ a nyũmba yakwa.
10. Hiramu agĩkĩhe Suleimani mĩgogo ya mĩtarakwa, o na ya mĩthengera, o ta ĩrĩa yothe endete.
11. Nake Suleimani agĩkĩhe Hiramu kori ngiri mĩrongo ĩĩrĩ cia ngano, ituĩke irio cia andũ a nyũmba yake, o na kori mĩrongo ĩĩrĩ cia maguta marutĩre wĩra wa kũhũrahũrũo, magakeerũo wega; ũguo nĩguo Suleimani aaheaga Hiramu mwaka o mwaka.
12. Nake Jehova akĩhe Suleimani ũũgĩ, o ta ũrĩa aamwĩrĩire; nao Hiramu na Suleimani magĩkĩgĩa na thayũ, nao erĩ makĩrĩkanĩra kĩrĩkanĩro gĩa gũteithania.
13. Ningĩ Suleimani akĩnyitithia a kĩaro thĩinĩ wa andũ othe a Isiraeli gĩa kũruta wĩra, nakĩo kĩaro kĩu kĩarĩ kĩa andũ ngiri mĩrongo ĩtatũ.
14. Nake agĩkĩmatwarithia Lebanoni, o ngiri ikũmi mweri ũmwe, na ũndũ wa gũtuanĩra; mweri ũmwe magaikara Lebanoni, na mĩeri ĩĩrĩ magaikara kwao mĩciĩ; nake Adoniramu nĩwe waathaga andũ acio a kĩaro.
15. Ningĩ Suleimani aarĩ na andũ ngiri mĩrongo mũgwanja arĩa maakuuaga mĩrigo, o na andũ ngiri mĩrongo ĩnana aicũhia a mahiga irĩma-inĩ,
16. hamwe na anyabara ake arĩa anene ngiri ithatũ na magana matatũ a gwatha aruti wĩra.