1. Na gũgĩkinya atĩrĩ, atĩ Suleimani aarĩkia gwaka nyũmba ya Jehova, o na nyũmba ya mũthamaki, o na gwĩka maũndũ mothe marĩa Suleimani erirĩirie, o macio maamũkenagia-rĩ,
2. Jehova agĩkiumĩrĩra Suleimani ihinda rĩa kerĩ, o ta ũrĩa aamuumĩrĩire o kũu Gibeoni.
3. Nake Jehova akĩmwĩra atĩrĩ, Nĩnjiguĩte kũhoya gwaku, o na gũthaithana gwaku kũrĩa ũ’thaithĩte wĩ mbere yakwa; nayo nyũmba ĩno wakĩte nĩndamĩamũra, nĩ getha ndũme rĩĩtwa rĩakwa rĩtũũre kuo tene na tene; namo maitho makwa, o na ngoro yakwa, nĩigũtũũra kuo itegũthenga.
4. Naho ha ũhoro waku-rĩ, ũngĩkorũo nĩũrĩthiaga na mĩthiĩre ĩrĩa nyonaga yerekereire, o ta ũrĩa thoguo Daudi aathiaga arĩ mũthungĩru ngoro, o na arĩ mũthingu, nĩ getha wĩkage o ta ũrĩa maũndũ mothe marĩa ngwathĩte matariĩ, na ũmenyagĩrĩre irĩra cia watho wakwa wa kũrũmĩrĩrũo, o na matuĩro makwa ma cira,
5. nĩngũtũma ũhoro waku wa gũikarĩra gĩtĩ gĩaku kĩa ũnene, ũgĩthamakĩra Isiraeli, ũtũũre ũrũmĩte wega tene na tene, o ta ũrĩa nderire thoguo Daudi, ngiuga atĩrĩ, Wee ndũkaaga mũndũ wa gũikarĩra gĩtĩ kĩa ũnene gĩa Isiraeli o na rĩ.
6. No rĩrĩ, mũngĩkagarũrũka mũtige kũnũmĩrĩra, inyuene, kana ciana cianyu, na mwage kũmenyerera maathani makwa, o na irĩra cia watho wakwa wa kũrũmĩrĩrũo iria ndĩmwathĩte, no mũthiĩ mũgatungatĩre ngai ingĩ, mũciinamĩrĩre mũgĩcihoya-rĩ,
7. nĩngarindũra Isiraeli bũrũri ũyũ ndĩmaheete, o nayo nyũmba ĩno nyamũrĩte ngamĩtheria nĩguo ĩĩtanio na rĩĩtwa rĩakwa, ndĩmĩte, ndige gũcoka kũmĩona, o nao Isiraeli moinagwo thimo, na manyararũo nĩ ndũrĩrĩ ciothe.
8. Na rĩrĩ, o na harĩa nyũmba ĩno ĩĩ ndaya na igũrũ mũno-rĩ, mũhĩtũki o wothe ũrĩa ũkahĩtũkĩra hakuhĩ nayo nĩ kũmaka akamaka, na oige atĩrĩ, Hĩ-ĩ-ĩ-hĩ! Nao andũ morie atĩrĩ, Hĩ! nĩ kĩ gĩgĩtũmĩte Jehova eke bũrũri ũyũ o na nyũmba ĩno maũndũ ta maya?
9. Nao macokerio atĩrĩ, Nĩ ũndũ nĩmaatiganire na Jehova Ngai wao, ũrĩa warutire maithe mao bũrũri wa Misiri, makĩgwatana na ngai ingĩ magĩciinamĩrĩra, magĩcitungatĩra; ũndũ ũcio nĩguo watũmire Jehova amacokererie ũũru ũyũ wothe.
10. Na gũgĩkinya atĩrĩ, atĩ mĩaka mĩrongo ĩĩrĩ ĩrĩa Suleimani aaninire agĩaka nyũmba icio cierĩ, nacio nĩ nyũmba ya Jehova, o na nyũmba ya mũthamaki, yathira,
11. (na rĩrĩ, Hiramu mũthamaki wa Turo nĩwe waheete Suleimani mĩtarakwa o na mĩthengera, o na thahabu, o ta ũrĩa maũndũ mothe marĩa Suleimani endaga maatariĩ,) hĩndĩ ĩo mũthamaki ũcio, ti Suleimani, agĩkĩhe Hiramu matũũra mĩrongo ĩĩrĩ bũrũri wa Galili.
13. Nake agĩkiuga atĩrĩ, Namo maya nĩ matũũra ma na kũ wakĩ’he, mũrũ-wa-iya? Agĩgĩcoka akĩmatua bũrũri wa Kabuli; namo matũire metagwo ũguo o na ũmũthĩ.
14. Nake Hiramu nĩaatwarithĩirie mũthamaki ũcio taranda cia thahabu igana na mĩrongo ĩĩrĩ.
15. Naho ha ũhoro wa kĩaro kĩrĩa Suleimani aanyitithirie-rĩ, aakĩnyitithirie nĩ ũndũ wa gwaka nyũmba ya Jehova, o na nyũmba yake we mwene, o na Milo, o na rũthingo rũa Jerusalemu, na Hazoru, na Megido, na Gezeru.
16. Nĩ ũndũ atĩrĩ, Firauni, mũthamaki wa Misiri, nĩaambatĩte, agatunyana itũũra rĩu rĩa Gezeru, akarĩcina na mwaki, o na akoraga Akanaani arĩa maatũũrĩte kuo, nake agĩcoka akĩrĩhe mwarĩ, ũcio warĩ mũka wa Suleimani, rĩtuĩke igai rĩake.
17. Nake Suleimani agĩgĩaka Gezeru, o na Bethi-horoni ya mũhuro,
18. na Baalathu, na Tamaru rĩa werũ-inĩ, o kũu bũrũri ũcio,
19. O na matũũra mothe marĩa Suleimani aarĩ namo ma kũigwo indo ciake, o na ngari ciake cia ita, o na matũũra ma andũ ake arĩa maathiaga mahaicĩte mbarathi; o na mĩako o yothe ĩrĩa Suleimani endaga gwaka nĩ ũndũ wa gwĩkenia o kũu Jerusalemu, o na kũu Lebanoni, o na bũrũri ũrĩa wothe aathanaga.
20. Na rĩrĩ, andũ othe arĩa maatigarĩte a Aamori, na Ahiti, na Aperizi, na Ahivi, na Ajebusi, arĩa mataarĩ a ciana cia Isiraeli-rĩ,
21. ciana ciao iria ciatigarĩte bũrũri ũcio, o iria ciana cia Isiraeli itaahotire kũnina biũ, nĩcio Suleimani enyitithĩirie ituĩke ngombo ciake cia kĩaro, na itũire irĩ ngombo o na ũmũthĩ.
22. No rĩrĩ, Suleimani ndaigana gũtua ciana cia Isiraeli ngombo; icio aacituire andũ a gũthiaga ita, o na ndungata ciake, o na anene ake, o na atongoria ake a mbũtũ cia ita, o na aathani a ngari ciake cia ita, o na andũ ake a gũthiaga mahaicĩte mbarathi.
23. Na nĩkwarĩ andũ magana matano ma mĩrongo ĩtano, arĩa maarĩ anyabara anene a kũroraga mawĩra marĩa maarutagĩrũo Suleimani, nao nĩo maarĩ ene watho wa gwatha andũ arĩa maarutaga mawĩra macio.
25. Nake Suleimani aarutagĩra mahaki ma njino, o na magongona ma ũiguano, kĩgongona-inĩ kĩrĩa aakĩire Jehova, o mwaka mahinda matatũ, o na agacinagĩra ũbumba hau kĩgongona-inĩ kĩu kĩarĩ mbere ya Jehova. Ũguo nĩguo aacokire gwĩkaga aarĩkia gwaka nyũmba ĩo.
26. Nake Suleimani, mũthamaki, agĩthondeka marikabu gĩkundi, o kũu Ezioni-geberi, kũrĩa gwakuhanĩrĩirie na Elothu, hũgũrũrũ-inĩ cia Iria Itune, o kũu bũrũri wa Edomu.
27. Nake Hiramu agĩtwarithia ndungata ciake kũu marikabu-inĩ icio, o iria ciamenyete wega ũhoro wa gũtwara marikabu iria-inĩ, nĩ getha itwaranage na ndungata cia Suleimani.
28. Nao magĩgĩthiĩ magĩkinya Ofiri, makĩgĩra thahabu kuo, taranda magana mana ma mĩrongo ĩĩrĩ igĩthimwo, magĩcitwarĩra Suleimani, ũcio mũthamaki.