Go Back

1 Maũndũ ma Matukũ ma Tene Chapter 10

• 1. Na rĩrĩ, Afilisiti maahũranire na Isiraeli, nao andũ a Isiraeli makĩũrĩra Afilisiti, makĩgũa kũu kĩrĩma-inĩ kĩa Giliboa moragĩtwo.
• 2. Ningĩ Afilisiti makĩrũmĩrĩra Saulu, na ariũ ake, na ihenya mũno; Afilisiti acio magĩkĩũraga Jonathani, na Abinadabu, na Maliki-shua, ariũa Saulu.
• 3. Nayo mbaara ĩo ĩgĩkĩrũrĩra Saulu mũno mũno, nao arĩa maarathanaga na mĩguĩ makĩmũkinyĩrĩra na mĩguĩ yao; nake agĩkĩnyarirĩka mũno mũno nĩ ũndũ wa acio maarathanaga.
• 4. Hĩndĩ ĩo Saulu agĩkĩĩra mũmũkuuĩri indo ciake cia mbaara atĩrĩ, Comora rũhiũ rũaku rũa njora, ũ’thece ũndũrĩkanie naruo, nĩ getha andũ aya mataruaga matikangore ma’nyararithie. No rĩrĩ, mũndũ ũcio mũmũkuuĩri indo ciake cia mbaara ndetĩkĩrire, nĩ ũndũ nĩetigĩrire mũno. Tondũ ũcio Saulu akĩoya rũhiũ rũake rũa njora, akĩrũgũĩra.
• 5. Na rĩrĩ, mũndũ ũcio wamũkuuagĩra indo ciake cia mbaara ona atĩ Saulu e gũkua, o nake akĩĩgũithĩria rũhiũ rũake rũa njora o ro ũguo, agĩkua.
• 6. Ũguo nĩguo Saulu na ariũ ake atatũ maakuire, andũ othe a nyũmba yake magĩgĩkua o hamwe.
• 7. Na rĩrĩ, andũ othe a Isiraeli arĩa maarĩ kĩanda-inĩ mona atĩ andũ mekũũra, na atĩ Saulu na ariũ ake nĩmakuĩte, magĩkiunĩka makiuma matũũra mao, makĩũra; nao Afilisiti magĩgĩthiĩ kuo makĩmatũũra.
• 8. Na gũgĩkinya atĩrĩ, atĩ rũciũ rũrũ rũngĩ, rĩrĩa Afilisiti maathiire gũcuma andũ arĩa moragĩtwo-rĩ, makĩona Saulu na ariũ ake magũĩte kĩrĩma-inĩ kĩu kĩa Giliboa.
• 9. Magĩkĩmũcuma indo ciake cia mbaara na magĩthiĩ na mũtwe wake; magĩcoka makĩrekania kũndũ guothe bũrũri wa Afilisiti nĩguo makahunjie ũhoro ũcio harĩ ngai ciao cia mĩhianano, o na harĩ andũ.
• 10. Nacio nguo ciake cia kĩgera cia mbaara magĩciiga nyũmba ya ngai ciao; naguo mũtwe wake makĩwoherera nyũmba ya Dagoni thĩinĩ.
• 11. Na rĩrĩ, hĩndĩ ĩrĩa andũ othe a Jabeshi-gileadi maaiguire ũhoro wothe wa Saulu, wa ũrĩa Afilisiti mamwĩkĩte,
• 12. andũ othe arĩa maarĩ njamba magĩũkĩra, makĩgĩra kĩimba gĩa Saulu, o na ciimba cia ariũ ake, magĩcitwara Jabeshi, namo mahĩndĩ mao makĩmathika gĩtina-inĩ kĩa mũgandi, o kũu Jabeshi, magĩkĩĩhinga kũrĩa irio mĩthenya mũgwanja.
• 13. Ũguo nĩguo Saulu aakuire nĩ ũndũ wa ũrĩa aagararire watho wa Jehova, nĩ ũndũ wa ũrĩa aagire kũmenyerera ũhoro ũrĩa aaheetwo nĩ Jehova, o na ũndũ wa ũrĩa aahoire kĩrĩra harĩ mũndũ warĩ na roho waragũraga, akĩhoya ũhoro harĩ we,
• 14. na ndaigana gũtuĩria ũhoro he Jehova; na tondũ ũcio, Jehova agĩkĩmũũraga, akĩgarũra ũthamaki wake akĩũroria he Daudi, mũrũ wa Jesii, ũtuĩke wake.

Home