1. Nake Daudi eakithĩirie nyũmba o kũu itũũra rĩa Daudi; narĩo ithandũkũ rĩa Ngai akĩrĩthondekera handũ, akĩrĩambĩra hema ho.
2. Hĩndĩ ĩo Daudi agĩkiuga atĩrĩ, Gũtirĩ mũndũ o na ũrĩkũ wagĩrĩirũo nĩ gũkuua ithandũkũ rĩa Ngai tiga o Alawii; nĩ gũkorũo acio nĩo Jehova aathurire makuuage ithandũkũ rĩa Ngai, o na matũũre mamũtungatagĩra tene na tene.
3. Nake Daudi agĩgĩcokanĩrĩria Isiraeli othe kũu Jerusalemu, nĩguo maambatie ithandũkũ rĩa Jehova, marĩtware handũ harĩo o hau aarĩthondekeire.
4. Daudi agĩgĩcokanĩrĩria ariũ a Haruni, o na Alawii.
5. Na rĩrĩ, thĩinĩ wa ariũ a Kohathu agĩĩta Urieli ũrĩa warĩ mũnene wao, o na ariũ a ithe igana rĩa mĩrongo ĩĩrĩ;
6. ningĩ thĩinĩ wa ariũ a Merari, agĩĩta Asaia, ũrĩa warĩ mũnene wao, o na ariũ a ithe magana merĩ ma mĩrongo ĩĩrĩ;
7. na thĩinĩ wa ariũ a Gerishomu agĩĩta Joeli, ũrĩa warĩ mũnene wao, na ariũ a ithe igana rĩa mĩrongo ĩtatũ;
8. ningĩ thĩinĩ wa ariũ a Elizafani, agĩĩta Shemaia, ũrĩa warĩ mũnene wao, na ariũ a ithe magana merĩ;
9. na thĩinĩ wa ariũ a Hebironi agĩĩta Elieli, ũrĩa warĩ mũnene wao, na ariũ a ithe mĩrongo ĩnana;
10. ningĩ thĩinĩ wa ariũ a Uzieli, agĩĩta Aminadabu, ũrĩa warĩ mũnene wao, na ariũ a ithe igana rĩa ikũmi na erĩ.
11. Ningĩ Daudi agĩĩtithia Zadoku na Abiatharu, athĩnjĩri-Ngai, o na Alawii aya, Urieli, na Asaia, na Joeli, na Shemaia, na Elieli, na Aminadabu,
12. agĩkĩmera atĩrĩ, Inyuĩ nĩ inyuĩ anene thĩinĩ wa nyũmba cia maithe ma Alawii; wĩtheriei, inyuene o na ariũ a ithe wanyu, nĩ getha mũkaambatie ithandũkũ rĩa Jehova, Ngai wa Isiraeli, mũrĩtware o handũ harĩa ndĩrĩthondekeire.
13. Nĩ gũkorũo tondũ wa ũrĩa mwaagire kũrĩkuua o mbere-rĩ, nĩkĩo Jehova Ngai witũ aatũguthũkĩire, nĩ gũkorũo tũtiamũrongoririe ta ũrĩa gwathanĩtwo watho-inĩ.
14. Tondũ ũcio athĩnjĩri-Ngai o na Alawii magĩĩtheria nĩguo makaambatie ithandũkũ rĩa Jehova, Ngai wa Isiraeli.
15. Nacio ciana cia Alawii igĩkuua ithandũkũ rĩa Ngai na ciande ciacio iciigĩrĩire mĩtĩ yarĩo ĩrĩa mĩraya, o ta ũrĩa Musa aathanĩte, o na ta ũrĩa uuge wa Jehova watariĩ.
16. Nake Daudi akĩaria na mũnene wa Alawii nĩguo athure ariũ a ithe wao arĩa aini, marĩ na inyamũ ciao iria ihũragwo gũkĩinwo nyĩmbo, nacio nĩ inanda cia kĩnubi, na inanda nene cia mũgeto, o na thĩinĩ iria ihũrithanagio ikagamba, nĩguo matongorie rũĩmbo moete mĩgambo yao na igũrũ na gĩkeno.
17. Tondũ ũcio Alawii magĩthura Hemani wa Joeli; ningĩ thĩinĩ wa ariũ a ithe magĩthura Asafu wa Berekia; o na ningĩ thĩinĩ wa ariũ a Merari, ariũ a ithe wao, magĩthura Ethani wa Kushaia;
18. na ningĩ hamwe na acio magĩthura ariũ a ithe wao arĩa anyinyanyinyi, nao nĩ Zekaria, na Beni, na Jaazieli, na Shemiramothu, na Jehieli, na Uni, na Eliabu, na Benaia, na Maaseia, na Matithia, na Elifelehu, na Mikineia, hamwe na Obedi-edomu na Jeieli, aikaria mũromo.
19. Tondũ ũcio aini arĩa metagwo Hemani na Asafu na Ethani magĩgĩthurũo a kũhũra thani cia gĩcango cia kũhũrithanio igambe mũno;
20. nake Zekaria, na Azieli, na Shemiramothu, na Jehieli, na Uni, na Eliabu, na Maaseia, na Benaia, a kũhũra inanda cia kĩnubi iria ithondekagwo cia mũgambĩre mũceke wa kuoyũo na igũrũ;
21. na Matithia, na Elifelehu, na Mikineia, na Obedi-edomu, na Jeieli, na Azazia, a kũhũra inanda iria ithondekagwo cia mĩgambo ĩkũruruma, cia gũtongoria ũkũi.
22. Nake Kenania, mũnene wa Alawii, nĩwe warĩ mũinithia wa rũĩmbo, na muonania wa ũrĩa rũkũinwo, nĩ ũndũ aarĩ mũũgĩ.
24. Ningĩ Shebania, na Joshafatu, na Nethaneli, na Amasai, na Zekaria, na Benaia, na Eliezeri, athĩnjĩri-Ngai, nĩo maahuhaga macoro matongoretie ithandũkũ rĩa Ngai; o nao Obedi-edomu na Jehia no maaikaragia ikunĩkĩro rĩa ithandũkũ rĩu.
25. Ũguo nĩguo Daudi na athuri a Isiraeli, o na anene a athigari ngiri, maathiire makaambatie ithandũkũ rĩa Jehova rĩa kĩrĩkanĩro, marĩrute mũciĩ wa Obedi-edomu makenete;
26. na gũgĩkinya atĩrĩ, atĩ tondũ wa ũrĩa Ngai aateithirie Alawii acio maakuuĩte ithandũkũ rĩa Jehova rĩa kĩrĩkanĩro, magĩgĩthĩnja ndegwa mũgwanja, o na ndũrũme mũgwanja, magĩciruta igongona.
27. Nake Daudi aakĩĩhumbĩte nguo ndaya ya gatani ĩrĩa njega mũno me na Alawii othe arĩa maakuuĩte ithandũkũ rĩa Jehova, o na aini, o na Kenania, mũinithia wa rũĩmbo rũrĩa rũainagwo nĩ acio aini; Daudi agĩgĩkorũo ehumbĩte ebodi ya gatani.
28. Ũguo nĩguo Aisiraeli othe maambatirie ithandũkũ rĩa Jehova rĩa kĩrĩkanĩro, makĩanagĩrĩra mũno, o na gũkĩhuhagwo coro, o na tũrumbeta, o na gũkĩhũrithanagio thani, o na gũkĩinagwo mũno na inanda cia kĩnubi, o na inanda nene cia mũgeto.
29. Na gũgĩkinya atĩrĩ, atĩ rĩrĩa ithandũkũ rĩa Jehova rĩa kĩrĩkanĩro rĩakinyire itũũra rĩa Daudi, Mikali, mwarĩ wa Saulu, agĩcũthĩrĩria na nja arĩ ndirica-inĩ, akĩona mũthamaki akĩrũũgarũũga akĩinaga; akĩmũnyarara na ngoro yake.