1. Na rĩrĩ, mwaka wa ikũmi na ĩnana ĩrĩa Jeroboamu aakorirũo athamakĩte-rĩ, nĩguo Abija aambĩrĩirie gũthamakĩra Juda.
2. Agĩgĩthamaka mĩaka ĩtatũ kũu Jerusalemu; nake nyina etagwo Mikaia, mwarĩ wa Urieli wa kũu Gibea. Nao Abija na Jeroboamu magĩtũũra mahũranaga mbaara.
3. Nake Abija agĩgĩthiĩ ita arĩ na mbũtũ ya andũ njamba cia ita ngiri magana mana mathurĩtwo; nake Jeroboamu akĩarania ita yake nĩguo mahũrane nake arĩ na andũ ngiri magana manana mathurĩtwo, nao maarĩ njamba irĩ hinya.
4. Nake Abija akĩrũgama o igũrũ rĩa kĩrĩma gĩa Zemaraimu, kĩrĩa kĩrĩ bũrũri ũrĩa wĩ irĩma nyingĩ wa Efiraimu, akiuga atĩrĩ, Ta ’thikĩrĩria, wee Jeroboamu, o na inyuĩ Aisiraeli inyuothe;
5. githĩ mũtiũĩ atĩ Jehova, Ngai wa Isiraeli, aatuire Daudi mũthamaki wa gũthamakĩra Isiraeli tene na tene, we mwene, o na ariũ ake, na ũndũ wa kĩrĩkanĩro gĩa cumbĩ kĩrĩa gĩtangĩgarũrũka?
6. No rĩrĩ, Jeroboamu wa Nebati, ũcio ndungata ya Suleimani mũrũ wa Daudi, nĩaarahũkire akĩrema mwathi wake, akĩmũũkĩrĩra.
7. Naho hagĩkĩũngana harĩ we andũ matarĩ kĩene, aaganu mũno, o arĩa meĩkĩrire hinya nĩguo mahũrane na Rehoboamu, mũrũ wa Suleimani, o hĩndĩ ĩrĩa Rehoboamu aarĩ mũnyinyi, atarĩ na ngoro nyũmĩriru, o na rĩrĩa ataahotire kũmetiiria.
8. Na rĩu mwĩcirĩtie atĩ mwahota gwĩtiiria ũthamaki wa Jehova ũrĩa ũnyitĩrĩirũo nĩ ariũ a Daudi; na mũrĩ kĩrĩndĩ kĩingĩ, na mũkagĩa na njaũ cia thahabu iria Jeroboamu aamũthondekeire ituĩke ngai cianyu.
9. Githĩ mũtiaingatire athĩnjĩri-Ngai a Jehova, ariũ a Haruni, o na Alawii, mũgĩĩcarĩria athĩnjĩri-ngai o ta ũrĩa mũtugo wa ndũrĩrĩ iria ingĩ ũtariĩ? Nĩguo atĩ mũndũ o wothe ũrĩa ũgũthiĩ kwĩamũrĩra Jehova, etherie nĩ ũndũ wa kũruta gategwa na ndũrũme mũgwanja, ahote gũtuĩka mũthĩnjĩri-ngai icio itarĩ kĩene.
10. No rĩri, ithuĩ-rĩ, Jehova nĩwe Ngai witũ, na tũtimũtigĩte na twĩ na athĩnjĩri-Ngai matungatagĩra Jehova, nao nĩ ariũ a Haruni, o nao Alawii me wĩra-inĩ wao;
11. na nĩo macinagĩra Jehova mahaki ma njino, o na ũbumba ũrĩa ũnungaga wega, marũcinĩ mothe, o na mahwaĩ-inĩ mothe; o nayo mĩgate ĩrĩa ĩigagwo mbere ya Jehova makamĩigaga wega igũrũ rĩa metha ĩrĩa theru; o na mũtĩ wa kũigĩrĩrũo matawa wa thahabu, hamwe na matawa maguo, makaũmenyerera, nĩguo maakanage mahwaĩ-inĩ mothe; nĩ ũndũ nĩtũtũire tũrũmĩtie watho wa Jehova, Ngai witũ; no inyuĩ nĩmũmũtigĩte.
12. Atĩrĩrĩ, Ngai arĩ hamwe na ithuĩ o mbere iitũ atũtongoretie, na athĩnjĩri-Ngai ake me na tũrumbeta twa hinya nĩguo makahuha na mĩgambo mĩnene mũno maarahũre andũ mathiĩ ita. Atĩrĩrĩ, ciana ici cia Isiraeli, tigai kũrũa na Jehova, Ngai wa maithe manyu; nĩ ũndũ mũtigaacĩra.
13. No rĩrĩ, Jeroboamu akĩiga andũ a kũmoheria mamoimĩte na thutha; na tondũ ũcio magĩikara me mbere ya andũ a Juda, nao arĩa maamoheirie magĩikara na thutha wao.
14. Nao Ajuda maacũthĩrĩria na thutha-rĩ, makĩona ita ĩĩ mbere yao, o na thutha wao; nao magĩgĩkaĩra Jehova, nao athĩnjĩri-Ngai magĩkĩhuha tũrumbeta.
15. Hĩndĩ ĩo andũ a Juda makĩanĩrĩra na mĩgambo mĩnene; gũgĩkinya atĩrĩ, atĩ andũ a Juda maanĩrĩra na mĩgambo mĩnene, Ngai akĩhũra Jeroboamu me hamwe na Aisiraeli othe, magĩkĩhũrũo nĩ Abija, o na Ajuda.
17. Nake Abija na andũ ake magĩciũraga nyingĩ mũno; naho hakĩgũa andũ a Isiraeli ngiri magana matano moragĩtwo, arĩa maathurĩtwo a kũhũrana mbaara.
18. Ũguo nĩguo ciana cia Isiraeli ciatoririo hĩndĩ ĩo, nacio ciana cia Juda igĩkĩhootana, nĩ ũndũ nĩciehokire Jehova, Ngai wa maithe ma cio.
19. Nake Abija agĩteng’eria Jeroboamu, akĩmũtunya matũũra mamwe; namo nĩ Beth-eli, na tũtũũra twarĩo, o na Jeshana, na tũtũũra twarĩo, na Efironi, na tũtũũra twarĩo.
20. Nake Jeroboamu ndaigana gũcoka kũgĩa na hinya o na hanini matukũ-inĩ ma Abija; nake Jehova agĩkĩmũhũra, agĩkua.
21. No rĩrĩ, Abija akĩgĩa na hinya mũno, nake akĩhikia aka ikũmi na ana, o na agĩciara ihĩĩ mĩrongo ĩĩrĩ na igĩrĩ na airĩtu ikũmi na atandatũ.
22. Na rĩrĩ, ciĩko iria ingĩ cia Abija, o na mĩthiĩre yake, o na maũndũ marĩa aaririe, nĩmaandĩkĩtwo ibuku-inĩ rĩa ũtaũranĩri wa Ido ũrĩa mũnabii.