1. Na rĩrĩ, mũthenya o ro ũcio ibuku rĩa Musa rĩgĩgĩthomwo andũ makĩĩiguagĩra; na thĩinĩ warĩo gũkĩonwo handũ haandĩkĩtwo atĩ Mũamoni kana Mũmoabi matikanatonye ũũngano-inĩ wa Ngai o na rĩ;
2. nĩ ũndũ matiigana gũthagania ciana cia Isiraeli na irio o na maĩ; no nĩ kũhaka maacihakanĩrĩire he Balaamu nĩguo acirume; no Ngai witũ akĩgarũra kĩrumi kĩu gĩake gĩtuĩke kĩrathimo.
4. Na rĩrĩ, mbere ya hĩndĩ ĩo, Eliashibu, mũthĩnjĩri-Ngai ũrĩa watuĩtwo mũrori wa tũnyũmba twa nyũmba ya Ngai witũ-rĩ, tondũ wa ũrĩa maarĩ ũthoni na Tobia,
5. nĩaamũthondekithĩirie kanyũmba kanene, nako nĩko mbere ya hĩndĩ ĩo kaaigagwo mũtu ũrĩa ũrutagwo wa magongona, o na ũbumba, o na indo iria irutagwo wĩra nacio, o na gĩcunjĩ gĩa ikũmi kĩa ngano, na kĩa ndibei, o na kĩa maguta, kĩrĩa kĩheagwo Alawii, o na aini nyĩmbo, o na aikaria mĩrango, nĩ ũndũ wa ũrĩa gwathanĩtwo, o na indo cia magongona ma kũiyũkio na igũrũ cia kũheo athĩnjĩri-Ngai.
6. No ihinda rĩu rĩothe niĩ ndiarĩ kũu Jerusalemu; nĩ ũndũ mwaka wa mĩrongo ĩtatũ na ĩĩrĩ ĩrĩa Aritashashita, mũthamaki wa Babuloni, aakorirũo athamakĩte, nĩguo ndacokire he mũthamaki; na matukũ manyinyi maathira, ngĩmũhoya rũtha,
7. ngĩcoka Jerusalemu, ngĩmenya ũũru ũrĩa Eliashibu ekĩte, ũcio wa gũthondekera Tobia kanyũmba o nja-inĩ ya nyũmba ya Ngai.
8. Naguo ũndũ ũcio ũkĩnjiguithia ũũru mũno; na tondũ ũcio indo ciothe cia Tobia, iria ciarĩ kũu nyũmba ĩo, ngĩciikia na nja.
9. Ngĩgĩcoka ngĩatha andũ, ngĩmera matherie tũnyũmba tũu; na thutha wa ũguo ngĩcokia indo cia nyũmba ya Ngai kuo, hamwe na mũtu wa igongona, o na ũbumba.
10. Ngĩgĩcoka ngĩona atĩ Alawii matiaheetwo igai rĩao rĩa indo iria maagĩrĩirũo nĩ kũheo, na tondũ ũcio ngĩkora Alawii o na aini nyĩmbo arĩa maarutaga wĩra morĩte, mũndũ o mũndũ agathiĩ gĩthaka gĩake.
11. Hĩndĩ ĩo ngĩgĩtetania na aathani, ngĩmoria atĩrĩ, Nĩ kĩ gĩtũmĩte nyũmba ya Ngai ĩtigwo ũguo? Ngĩgĩcokereria Alawii acio, o na aini nyĩmbo, ngĩmacokia handũ hao.
12. Hĩndĩ ĩo andũ othe a Juda makĩrehe gĩcunjĩ kĩao gĩa ikũmi kĩa ngano, o na kĩa ndibei, o na kĩa maguta, o kũu kwaigagwo mũthithũ wa indo.
13. Ngĩgĩcoka ngĩthura aigi mũthithũ a kũndũ kũu kwaigagwo mũthithũ wa indo cia bata, nao nĩ Shelemia, mũthĩnjĩri-Ngai, na Zadoku, mwandĩki-marũa; ningĩ thĩinĩ wa Alawii nĩ Pedaia; na thutha wao nĩ Hanani, mũrũ wa Zakuru wa Matania; nĩ ũndũ acio nĩo monagwo marĩ ehokeku, naguo wĩra wao warĩ wa kũgayanĩria ariũ a ithe wao indo.
14. Ndagũthaitha, Ngai wakwa, ũndirikane nĩ ũndũ wa ũhoro ũyũ, na ndũkahuure maũndũ makwa mega marĩa njĩkĩte nĩ ũndũ wa nyũmba ya Ngai wakwa, o na ũndũ wa ũtungati wayo wothe.
15. Ningĩ matukũ-inĩ o ro macio, kũu Juda, ngĩona andũ amwe mekũranga kĩhihĩro kĩa ndibei mũthenya wa thabatũ, o na makĩinũkia itĩa cia ngano macikuuithĩtie ndigiri ciao; o na macikuuithĩtie ndibei, na thabibu, na ngũyũ, o na mĩrigo ya mĩthemba yothe, makĩmĩtwara Jerusalemu mũthenya wa thabatũ; na niĩ ngĩkĩmakaania gwĩka ũndũ ũcio mũthenya o ro ũcio mendagia irio icio.
16. Ningĩ nĩgwatũire andũ amwe a Turo kũu Jerusalemu, na nĩmaatonyagia kuo ciũngũyũ, o na indo cia mĩthemba mĩingĩ cia kwendia, nao magaciendagĩria ciana cia Juda o na kũu Jerusalemu, mũthenya wa thabatũ.
17. Na niĩ hĩndĩ ĩo ngĩtetia anene a Juda, ngĩmoria atĩrĩ, Ũndũ ũyũ mũũru ũũ mũreka nĩ ũrĩkũ, mũgathũkia mũthenya wa thabatũ?
18. Githĩ maithe manyu ũguo toguo mekire? Ningĩ-rĩ, githĩ Ngai ndaatũmire tũcokererũo nĩ ũũru ũcio wothe, o na ũcokerere itũũra rĩrĩ? No rĩrĩ, o na kũngĩtuĩka nĩ ũguo-rĩ, nĩ kũrehe mũkũrehithĩrie Aisiraeli marakara maingĩ makĩria nĩ gũthũkia mũthenya wa thabatũ.
19. Na gũgĩkinya atĩrĩ, atĩ hwaĩ-inĩ, gwaitĩka kũgĩa nduma ihingo-inĩ cia Jerusalemu, thabatũ ĩtanakinya-rĩ, ngĩathana atĩ mĩrango yacio ĩhingwo, na ndĩkahingũrũo mũthenya wa thabatũ ũtanathenga; o nacio ndungata imwe ciakwa ngĩciiga ihingo-inĩ icirangagĩre, nĩ getha gũtikoneke mũrigo o na ũmwe ũgũtonyio itũũra-inĩ rĩu thĩinĩ mũthenya wa thabatũ.
20. Na tondũ ũcio onjorithia, o na endia a indo cia mĩthemba mĩingĩ, makĩraara na kũu nja ya Jerusalemu ihinda rĩmwe kana o merĩ.
22. Ngĩgĩcoka ngĩatha Alawii ngĩmera metherie mokage gũikaria ihingo nĩ getha matũme mũthenya wa thabatũ wamũragwo ũgatherio. Wee Ngai wakwa, ndagũthaitha ũndirikane nĩ ũndũ wa ũhoro ũcio o naguo, na ũnjaĩre nĩ ũndũ wa ũrĩa tha ciaku ciingĩhĩte.
23. Ningĩ matukũ-inĩ o ro macio ngĩona Ayahudi arĩa maahikĩtie andũ-a-nja a Ashidodi, na a Amoni, na a Moabi;
24. nacio ciana ciao ikĩaria-rĩ, ciaaragia mwarĩrie mũthombocanu na wa Aashidodi, na itingĩhota kwaria mwarĩrie wa Ayahudi wega, tiga o ta ũrĩa mwarĩrie wa andũ a ndũrĩrĩ icio watariĩ.
25. Na niĩ ngĩgĩtetania nao ngĩmarũithia njĩhĩte, na ngĩhũrithia amwe ao, o na ngĩmamunyithia njuĩrĩ ciao, ningĩ ngĩtũma mehĩte makĩgwetaga rĩĩtwa rĩa Ngai, ngĩmera ũũ: Mũtikananengere ariũ ao airĩtu anyu, o na kana muoe airĩtu ao mahikio nĩ ariũ anyu, o na kana nĩ inyuĩ inyuene.
26. Githĩ Suleimani, ũrĩa mũthamaki wa Isiraeli, ndaahĩtirie na ũndũ wa gwĩka maũndũ ta macio? Ũcio-rĩ, thĩinĩ wa ndũrĩrĩ nyingĩ gũtiarĩ mũthamaki watariĩ take, nake aarĩ mwende mũno nĩ Ngai wake, nake Ngai akũmũtua mũthamaki wa gũthamaka Isiraeli guothe; no rĩrĩ, o nake aahĩtithirio nĩ atumia ake a ndũrĩrĩ.
27. Rĩu-rĩ, anga mũkuuga tũmũigue tũmwĩtĩkĩrie gwĩkaga ũũru ũyũ mũnene ũũ, wa kwagarara watho wa Ngai witũ mũkihikia andũ-a-nja a kũngĩ?
28. Nake mũndũ ũmwe wa ariũ a Joiada, mũrũ wa Eliashibu, mũthĩnjĩri-Ngai ũrĩa mũnene, agĩkorũo arĩ mũthoniwe wa Sanibalati ũrĩa Mũhoroni; tondũ ũcio ngĩmũingata oime harĩ niĩ.
29. Ndagũthaitha, wee Ngai wakwa ũmaririkane, nĩ gũkorũo nĩmathahĩtie ũthĩnjĩri-Ngai, o na kĩrĩkanĩro kĩrĩa gĩa ũthĩnjĩri-Ngai, o na kĩa Alawii!
30. Ũguo nĩguo ndakĩmatheririe meheranĩre na andũ othe a kũngĩ, o na ngĩmathondekera ũhoro wa ituanĩra rĩa wĩra ũrĩa ũrĩrutagwo nĩ athĩnjĩri-Ngai, o na Alawii, o mũndũ aikare wĩra-inĩ wake;
31. o na ũhoro wa ũrĩa ngũ irĩrutagwo mahinda marĩa matuĩtwo nĩ ũndũ wa magongona, o na ũhoro wa maciaro ma mbere. Ndagũthaitha ũndirikane, wee Ngai wakwa, ũnjĩke maũndũ mega.