1. Nao andũ othe magĩkĩĩyũnganĩria handũ haariĩ harĩa haarĩ mbere ya Kĩhingo kĩa Maĩ, o ta marĩ o mũndũ ũmwe. Nao makĩarĩria Ezara, mwandĩki-marũa, makĩmwĩra amarehere ibuku rĩrĩa rĩa watho wa Musa, ũrĩa Jehova aathĩte Isiraeli.
2. Naguo mũthenya wa mbere wa mweri wa mũgwanja-rĩ, nĩguo Ezara, mũthĩnjĩri-Ngai, aatwarire ibuku rĩu rĩa watho harĩ kĩrĩndĩ kĩu kĩa andũ acio monganĩte, arũme o na andũ-a-nja, o na andũ othe arĩa maahotaga kũigua gĩtũmi kĩa watho ũcio.
3. Nake agĩthoma mohoro marĩa maarĩ thĩinĩ warĩo arĩ o handũ hau haariĩ haarĩ mbere ya Kĩhingo kĩu kĩa Maĩ, kuuma o rũcinĩ gwakĩa nginya o mĩaraho, andũ acio othe, arũme na andũ-a-nja, o na andũ arĩa othe maahotaga kũigua gĩtũmi kĩamo, marĩ ho. Nao andũ acio othe magĩtega matũ mao maigue ũhoro wa ibuku rĩu rĩa watho.
4. Nake Ezara, ũcio mwandĩki-marũa, akĩrũgama handũ hokĩrĩirie haakĩtwo na mĩtĩ nĩ ũndũ wa ũhoro ũcio kĩũmbe; nao Matithia, na Shema, na Anaia, na Uria, na Hilikia, na Maaseia, maamũrũgamĩte guoko-inĩ gwake kwa ũrĩo; nakuo guoko-inĩ gwake kwa ũmotho hakarũgama Pedaia, na Mishaeli, na Malikija, na Hashumu, na Hashibadana, na Zekaria, na Meshulamu.
6. nake Ezara akĩgooca Jehova, Ngai ũrĩa mũnene. Nao andũ othe magĩcokia atĩrĩ, Amen, Amen, moete moko mao na igũrũ; nao makĩinamia mĩtwe yao, makĩhoya Jehova maturamithĩtie mothiũ mao thĩ.
7. O na ningĩ Jeshua, na Bani, na Sherebia, na Jamini, na Akubu, na Shabethai, na Hodia, na Maaseia, na Kelita, na Azaria, na Jozabadu, na Hanani, na Pelaia, o na Alawii, makĩmenyithia andũ acio wega ũhoro wa watho ũcio; nao andũ makĩrũgama o handũ hao.
8. Nao magĩthoma ciugo iria cia watho ũcio wa Ngai ciarĩ ibuku-inĩ rĩu, magĩcitaũranĩra na mũgambo mũnene, nĩguo andũ mamenye wega gĩtũmi gĩacio.
9. Nake Nehemia, barũthi, na Ezara, mũthĩnjĩri-Ngai ũrĩa mwandĩki-marũa, o na Alawii arĩa maarutaga andũ maũndũ, makĩĩra andũ othe atĩrĩ, Mũthenya wa ũmũthĩ nĩ mwamũrĩre Jehova Ngai wanyu; menyai mũgĩe na kĩeha, o na kana mũrĩre. Nĩ gũkorũo andũ othe nĩmaarĩrire rĩrĩa maaiguire ciugo icio cia watho wa Ngai.
10. Nake agĩkĩmera atĩrĩ, Wĩthiĩrei mũkarĩe nyama noru, na mũkanyue indo irĩ mũrĩo, o nake mũndũ ũrĩa ũtarĩ kĩndũ aigĩirũo mũmũgaĩre rũgai rũake; nĩ gũkorũo mũthenya wa ũmũthĩ nĩ mwamũrĩre Mwathani witũ; o na ningĩ tigai kũigua ũũru, nĩ ũndũ gũkenera Jehova nĩkuo hinya wanyu.
11. Tondũ ũcio Alawii magĩgĩkiria andũ othe, makĩmeraga atĩrĩ, Kirai, nĩ gũkorũo mũthenya wa ũmũthĩ nĩ mwamũre; o na ningĩ tigai kũigua ũũru.
12. Nao andũ acio othe magĩgĩĩthiĩra makarĩe irio o na manyue, o na matwarĩre andũ arĩa angĩ rũgai rũao, o na makene mũno, nĩ ũndũ nĩmaamenyire wega ndeto icio moimbũrĩirũo.
13. Naguo mũthenya wa ĩĩrĩ-rĩ, anene a nyũmba cia maithe ma andũ acio othe, o na athĩnjĩri-Ngai, o na Alawii, makĩũngana othe harĩ Ezara, ũcio mwandĩki-marũa, nĩguo matege matũ maigue ũhoro wa watho ũcio.
14. Nao magĩkĩona kwandĩkĩtwo watho-inĩ ũcio ũrĩa Jehova aathanĩte na kanua ka Musa, atĩ gĩathĩ-inĩ kĩa mweri wa mũgwanja ciana cia Isiraeli nĩciagĩrĩirũo nĩ gũikaraga ithũnũ-inĩ;
15. na atĩ nĩciagĩrĩirũo nĩ gũkinyĩria andũ othe ũhoro ũcio, o na iũhunjanĩrie matũũra-inĩ ma cio mothe, o na kũu Jerusalemu, ikiugaga atĩrĩ, Ũmai mũthiĩ kĩrĩma-inĩ, mũgĩre honge cia mĩtamaiyũ ya mũgũnda na cia mĩtamaiyũ ya gĩthaka-inĩ, o na honge cia mĩhandathi, o na honge cia mĩkĩndũ, o na honge cia mĩtĩ mĩtungu cia gwaka ithũnũ, o ta ũrĩa kwandĩkĩtwo.
16. Tondũ ũcio andũ magĩkiuma, magĩthiĩ, magĩcigĩra, makĩĩakĩra ithũnũ mũndũ o mũndũ; magĩgĩaka igũrũ rĩa nyũmba ciao, o na nja ciao, o na nja iria cia nyũmba ya Ngai, o na handũ harĩa haariĩ he Kĩhingo-inĩ kĩa Maĩ, na Kĩhingo-inĩ kĩa Efiraimu.
17. Nakĩo kĩrĩndĩ kĩu gĩothe kĩahũndũkire kiumĩte kũrĩa gĩatwarĩtwo gĩatahwo-rĩ, gĩkĩĩakĩra ithũnũ, gĩgĩikara ithũnũ-inĩ icio; nĩ gũkorũo kuuma o matukũ ma Joshua wa Nuni gwata mũthenya ũcio ciana cia Isiraeli itirĩ hĩndĩ ciekire ũguo. Na gũgĩkĩgĩa gĩkeno kĩnene mũno.
18. Ningĩ Ezara agathomagĩra andũ ibuku rĩu rĩa watho wa Ngai o mũthenya, kuuma o mũthenya wa mbere nginya o mũthenya wa mũthia. Nao magĩkĩrĩa gĩathĩ kĩu gĩa ithũnũ mĩthenya mũgwanja; naguo mũthenya wa ĩnana gũkĩgĩa gĩtũngano kĩnene gĩkoniĩ andũ othe, o ta ũrĩa mũtugo wa kũrũmĩrĩrũo watariĩ.