1. GWAKINYIRE atĩrĩrĩ, atĩ matukũ ma Ahasuerusu, (nake Ahasuerusu ũcio nĩwe wathamakaga kũndũ guothe gwata bũrũri wa Ahĩndĩ o nginya bũrũri wa Akushi, nakuo kwarĩ mabũrũri igana rĩa mĩrongo ĩĩrĩ na mũgwanja maathagwo nĩ abarũthi arĩa aarekagia kuo,)
2. o matukũ macio-rĩ, rĩrĩa Ahasuerusu ũcio mũthamaki aaikarĩire gĩtĩ gĩake kĩa ũnene nyũmba ya athamaki ĩrĩa yarĩ kũu Shushani,
3. na agĩkorũo athamakĩte mĩaka ĩtatũ-rĩ, nĩaarugithĩirie anene ake othe, o na ndungata ciake, iruga; nao andũ arĩa maarĩ ahoti a Perisia na Media, o arĩa maarĩ igweta inene, o na abarũthi a mabũrũri macio, magĩkorũo me hau mbere yake.
4. Nake akĩnina matukũ maingĩ, namo nĩ igana rĩa mĩrongo ĩnana, akĩonania ũtonga wa bũrũri ũcio mwega mũno aathamakaga, o na ũrĩa igweta rĩake rĩanenehete rĩgatũma atũũre atĩĩkĩte.
5. Na rĩrĩ, matukũ macio maahinga, mũthamaki ũcio akĩrugithĩria andũ othe, anene o na anyinyi, arĩa maarĩ nyũmba ya mũthamaki o kũu Shushani, iruga, narĩo rĩarugĩirũo nja ĩrĩa njirige mũgũnda-inĩ wa mahũa wa nyũmba ĩrĩa ya mũthamaki, mĩthenya mũgwanja.
6. Na rĩrĩ, hau haacunjurĩtio matama merũ, o na ma rangi wa nyeki nduru, o na wa bururu; namo mohereirũo icũhĩ cia betha itugĩ-inĩ cia mahiga marĩa mega merũ na mĩhĩndo ya gatani ĩrĩa njega, o na ya rangi wa zambarau; o namo morĩrĩ ma gũikarĩra mũndũ etiiranĩtie maathondeketwo na thahabu na betha, makaigwo kũndũ kwarĩtwo mahiga ma nyaigĩ ya mũthemba mwega, namo mahiga macio maarĩ matune, na merũ, na ma rangi wa ngoikoni, na mairũ.
7. Nao andũ makĩheo gĩa kũnyua na ikombe cia thahabu, na nĩkwarĩ ndibei nyingĩ mũno ya mũthemba ũrĩa wanyuagwo nĩ athamaki, o ta ũrĩa ũtana wa mũthamaki watariĩ; nacio ikombe icio-rĩ, hatirĩ o na kĩmwe kĩahaanaine na kĩrĩa kĩngĩ.
8. Naguo ũhoro wa kũnyua watariĩ o ta ũrĩa gwaathanĩtwo nĩ mũthamaki, naguo ũguo nĩ ta kuuga atĩ hatiarĩ mũringanĩrĩrio; nĩ ũndũ ũguo nĩguo mũthamaki aatuĩte gwĩkwo nĩ anene othe a nyũmba yake, atĩ meke mũndũ o mũndũ o ta ũrĩa maũndũ marĩa mekũmũkenia matariĩ.
9. O nake Vashiti, mũtumia wa mũthamaki, akĩrugithĩria atumia iruga o kũu nyũmba ĩo ya mũthamaki ti Ahasuerusu.
10. Na rĩrĩ, mũthenya wa mũgwanja, hĩndĩ ĩrĩa ngoro ya mũthamaki ũcio ti Ahasuerusu yakorirũo ĩkenete nĩ ũndũ wa ndibei-rĩ, agĩgĩatha Mehumani, na Bizatha, na Harabona, na Bigatha, na Abagutha, na Zetharu, na Karikasi, anene arĩa mũgwanja mehokeirũo maũndũ ma nyũmba yake thĩinĩ, arĩa maamũtungatagĩra,
11. akĩmera magĩre Vashiti, mũtumia wa mũthamaki, mamũrehe mbere yake ekĩrĩtwo tanji yake ya mũthamaki mũndũ-wa-nja, nĩ getha andũ ake, o na anene ake, monio ũrĩa athakarĩte; nĩ ũndũ aarĩ kĩĩrorerũa.
12. No rĩrĩ, Vashiti akĩrega gũthiĩ ta ũguo gwaathanĩtwo nĩ mũthamaki akera anene acio mehokeirũo maũndũ ma nyũmba yake; na tondũ ũcio mũthamaki agĩtũkũyana mũno, agĩcinwo nĩ marakara.
13. Hĩndĩ ĩo mũthamaki agĩgĩtuĩria ũhoro kũrĩ andũ arĩa ogĩ, o arĩa maamenyete irĩra cia matukũ ma tene; (tondũ ũguo nĩguo mũthamaki ũcio aamenyerete kũhoya kĩrĩra harĩ andũ othe arĩa maamenyete watho wa bũrũri wake o na matuĩro ma macira;
14. nao arĩa maamũrũmĩrĩire wathani-inĩ nĩ Karishena, me na Shetharu, na Adamatha, na Tarashishi, na Meresu, na Marisena, na Memukani, nao nĩ anene arĩa mũgwanja a Perisia na Media, o arĩa metĩkĩrĩtio kuonanaga na mũthamaki, na nĩo maaikaranagia nake.)
15. Nake mũthamaki agĩkĩũria andũ acio ũũ: Rĩu-rĩ, Vashiti, mũtumia wa mũthamaki, ũndũ ũrĩa tũngĩkĩmwĩka ũringaine na watho nĩ ũrĩkũ, tondũ wa kũrega gwĩka ũrĩa aathĩtwo nĩ mũthamaki Ahasuerusu na ũndũ wa kanua ka anene arĩa mehokeirũo maũndũ ma nyũmba yake?
16. Nake Memukani agĩcokia ũhoro e hau mbere ya mũthamaki o na anene ake, akiuga atĩrĩ, Kwĩhia kũrĩa Vashiti, mũtumia wa mũthamaki, ehĩtie-rĩ, ti mũthamaki wiki ehĩtie; no nĩehĩtie anene othe, o na andũ othe a mabũrũri marĩa maathagwo nĩ abarũthi arĩa a mũthamaki Ahasuerusu.
18. Na rĩrĩ, o na ũmũthĩ atumia a anene a Perisia na Media, arĩa maiguĩte ũndũ ũyũ wĩkĩtwo nĩ mũtumia wa mũthamaki-rĩ, nĩmarĩĩra anene aku othe, mũthamaki ũyũ, o ro ũguo. Na tondũ ũcio nĩgũgũcoka kũgĩa rũmena rũnene, o na marakara.
19. Tondũ ũcio, mũthamaki witũ, ũngĩona arĩ wega-rĩ, ndagũthaitha ũtũme atĩ watho ta ũrĩa wathanagwo nĩ athamaki ũhunjanĩrio nĩwe, na wandĩkwo mawatho-inĩ ma Aperisia na Amedia nĩ getha ndũkae kũgarũrũo, wa atĩ Vashiti ndakanacoke gũũka harĩ we, wee Ahasuerusu mũthamaki witũ; naguo ũhoro wake wa gũtuĩka mũtumia wa mũthamaki, wee mũthamaki witũ, ũũhe ũngĩ ũrĩa mwega kũmũkĩra.
21. Naguo uuge ũcio wa Memukani ũgĩkenia mũthamaki o na anene ake; nake mũthamaki agĩgĩĩka o ta ũguo Memukani oigĩte,
22. nĩ ũndũ nĩaatwarithirie marũa mabũrũri mothe marĩa maathagwo nĩ abarũthi arĩa aarekagia, o bũrũri o ta ũrĩa mwandĩkĩre waguo watariĩ, na rũrĩrĩ o rũrĩrĩ o ta ũrĩa mwarĩrie waruo watariĩ; namo nĩ ma atĩ mũthuri o wothe atuĩke mũnene wa mũciĩ wake, na aaragie o ta ũrĩa angĩenda.