1. Na rĩrĩ, thutha wa maũndũ macio, marakara ma mũthamaki Ahasuerusu maahorahora, akĩririkana Vashiti, na ũrĩa ekĩte, o na itua rĩrĩa aatuĩrĩirũo rĩa ũrĩa egwĩkwo.
2. Hĩndĩ ĩo ndungata cia mũthamaki iria ciamũtungatagĩra igĩkĩmwĩra atĩrĩ, Mũthamaki witũ, reka ũcarĩrio airĩtu ethĩ ciĩrorerũa;
3. nawe, mũthamaki witũ, ũthure anene mabũrũri-inĩ maku mothe, ũmatue ongania a airĩtu arĩa ethĩ othe ciĩrorerũa, marehwo nyũmba ya mũthamaki gũkũ Shushani, maigwo nyũmba ĩrĩa itũũragwo nĩ andũ-a-nja, na maroragwo nĩ Hegai, mũnene ũrĩa wĩhokeirũo maũndũ ma nyũmba ya mũthamaki, ũcio ũikaragia andũ-a-nja; na maheo indo iria mabatairio nĩcio nĩ ũndũ wa gwĩtheria.
5. Na rĩrĩ, kũu Shushani nyũmba ya mũthamaki kwarĩ Mũyahudi wetagwo Moridekai, mũrũ wa Jairu wa Shimei wa Kishu, Mũbenjamini;
6. nake nĩ gũtahwo aatahĩtwo akarutwo Jerusalemu, e hamwe na andũ arĩa maatahanĩirio na Jekonia, mũthamaki wa Juda, ũrĩa watahĩtwo nĩ Nebukadinezaru, mũthamaki wa Babuloni, agatwarũo nĩwe bũrũri wake.
7. Nake agĩkorũo nĩwe warerete Hadasa, na nĩwe Esiteri, mwarĩ wa ithe mũkũrũ, nĩ ũndũ ndaarĩ na ithe o na kana nyina, nake mũirĩtu ũcio aarĩ kĩĩrorerũa, na agathakara mũno; nao ithe na nyina maakua, Moridekai akĩmwĩyoera agatuĩke mwarĩ.
8. Na tondũ ũcio gũgĩgĩkinya atĩrĩ, atĩ wathani wa mũthamaki waiguwo, o na ũrĩa aatuĩte gwĩkwo, nao airĩtu aingĩ magĩgĩkorũo monganĩirio kũu Shushani nyũmba ya mũthamaki nĩguo maroragwo nĩ Hegai-rĩ, Esiteri o nake agĩtwarũo kũu nyũmba ya mũthamaki, aroragwo nĩ Hegai ũcio waikaragia andũ-a-nja.
9. Nake mũirĩtu ũcio nĩaamũkenirie, agĩgĩĩkwo maũndũ mega ma ũtugi nĩwe, nacio indo iria ciaheanagwo cia gwĩtheria, akĩmũhe o narua, o na akĩmũheithia irio ciake cia mũthenya o mũthenya, o na ningĩ akĩmũhe ndungata mũgwanja cia airĩtu arĩa maaheanagwo marutĩtwo kũu nyũmba ya mũthamaki, nake akĩmũthamia harĩa aaikaire, me na airĩtu acio ake mũgwanja, akĩmũtwara handũ hega mũno gũkĩra hau hangĩ thĩinĩ wa nyũmba ĩo yaikaragwo nĩ andũ-a-nja.
10. Nake Esiteri ndaakiumbũrĩte rũrĩrĩ rũao, o na kana andũ ao, nĩ ũndũ Moridekai nĩaamũtaarĩte akamwĩra ndakoimbũranĩre ũndũ ũcio.
11. Nake Moridekai agĩtũũra ahĩtũkagĩra hau nja ya nyũmba ĩo yaikaragwo nĩ andũ-a-nja mĩthenya yothe, nĩguo amenye ũrĩa Esiteri atariĩ, o na ũrĩa ũhoro wake ũrĩikara.
12. Na rĩrĩ, rĩrĩa hĩndĩ yakinyire atĩ airĩtu othe, o mũirĩtu athiĩ agatonye he mũthamaki Ahasuerusu, aarĩkia gwĩkwo o ta ũrĩa watho ũkoniĩ andũ-a-nja waathanĩtwo wĩkagwo, (nĩ ũndũ matukũ mao ma gwĩtheria maahingagio ũũ: mĩeri ĩtandatũ nĩ kwĩhaka mehakaga maguta ma manemane, nayo mĩeri ĩngĩ ĩtandatũ makehaka maguta o mangĩ manungaga wega, o na magetheria na indo ingĩ iria andũ-a-nja maamenyerete gwĩtheria nacio,)
13. hĩndĩ ĩo-rĩ, mũirĩtu agagĩtonya he mũthamaki ũũ: agakorũo arĩ mũhe nduhi ya kĩndũ kĩrĩa gĩothe ethurĩire kiumĩte indo-inĩ cia nyũmba ĩo yaikaragwo nĩ andũ-a-nja, agagĩtonya nakĩo kũu nyũmba ya mũthamaki.
14. Na hwaĩ-inĩ agagĩtonya kuo, ningĩ rũcinĩ akaroka gũtonyio nyũmba ĩrĩa ĩngĩ ya andũ-a-nja, aroragwo nĩ Shaashagazu, mũnene ũrĩa wehokeirũo maũndũ ma nyũmba ya mũthamaki, ũrĩa waroraga andũ-a-nja arĩa maarĩ thuriya cia mũthamaki, nake mũirĩtu o wothe ũrĩa woima kuo ndangĩcoka gũtonya he mũthamaki rĩngĩ o na atĩa, tiga o eyendeirũo nĩ mũthamaki, nake etwo nĩwe na ũndũ wa kũgwetwo rĩĩtwa rĩake.
15. Na rĩrĩ, ihinda rĩa Esiteri, mwarĩ wa Abihaili, ithe mũkũrũ wa Moridekai ũcio wamwĩyoeire agĩtuĩka mwarĩ, rĩakinya, atĩ nĩguo agatonye he mũthamaki-rĩ, ndaigana gwĩtia kĩndũ o na kĩ, tiga o kĩrĩa Hegai, mũnene ũcio wehokeirũo maũndũ ma nyũmba ya mũthamaki, ũcio waroraga andũ-a-nja, oigire aheo. Nake Esiteri aarĩ mwĩtĩkĩrĩku nĩ andũ othe arĩa maamuonaga.
16. Nake Esiteri agĩgĩtwarũo he Ahasuerusu, mũthamaki, o kũu nyũmba ya athamaki, mweri wa ikũmi, naguo nĩguo mweri ũrĩa wĩtagwo Tebethu, mwaka wa mũgwanja ĩrĩa aakorirũo athamakĩte.
17. Nake mũthamaki agĩkĩenda Esiteri gũkĩra andũ-a-nja arĩa angĩ othe, nake agĩĩtĩkĩrĩka nĩwe, o na akĩonwo nĩwe arĩ mwega gũkĩra airĩtu arĩa angĩ othe; na tondũ ũcio akĩmwĩkĩra tanji ĩrĩa ĩĩkagĩrũo mũtwe nĩ mũtumia wa mũthamaki, akĩmũtua mũtumia wake ithenya rĩa Vashiti.
18. Hĩndĩ ĩo mũthamaki agĩkĩrugithĩria anene ake othe, ona ndungata ciake, iruga, narĩo rĩgĩĩtwo iruga rĩa Esiteri; ningĩ akĩrekanĩra igoti mabũrũri make mothe, na akĩheana iheo o ta ũrĩa ũtaana wa mũthamaki watariĩ.
19. Na rĩrĩ, rĩrĩa kwonganirio airĩtu ihinda rĩa kerĩ-rĩ, Moridekai aakorirũo aikarĩte o kũu kĩhingo-inĩ kĩa mũciĩ wa mũthamaki.
20. Nake Esiteri ndaakorirũo oimbũrĩte ũhoro wa andũ ao, kana wa rũrĩrĩ rũao, o ta ũrĩa Moridekai aamũtaarĩte; nĩ gũkorũo Esiteri aatũire ekaga o ta ũrĩa aathagwo nĩ Moridekai, o ta hĩndĩ ĩrĩa aareragwo arĩ gwake mũciĩ.
21. Na rĩrĩ, matukũ o ro macio, hĩndĩ ĩo Moridekai aaikaraga kĩhingo-inĩ kĩa mũciĩ wa mũthamaki, andũ erĩ anene arĩa mehokeirũo maũndũ ma nyũmba ya mũthamaki, nao nĩo Bigithani na Tereshu, o arĩa maaikaragia mũrango wa kĩhingo kĩu, makĩrakara, magĩcaria njĩra ya kũũraga Ahasuerusu mũthamaki.