Go Back

Esiteri Chapter 5

• 1. Na gũgĩkinya atĩrĩ, atĩ mũthenya wa ĩtatũ Esiteri akĩĩhumba nguo ciake iria ciĩhumbagwo nĩ athamaki atumia, akĩrũgama handũ nja harĩa haarĩ thĩinĩ mũno, kũu nyũmba-inĩ ya mũthamaki, o harĩa hang’ethanũire na nyũmba ĩo ya mũthamaki; nake mũthamaki agĩkorũo aikarĩire gĩtĩ gĩake kĩa ũnene o nyũmba-inĩ yake ya ũthamaki, ang’etheire itonyero-inĩ rĩayo.
• 2. Na gũgĩkinya atĩrĩ, atĩ mũthamaki ona Esiteri, mũtumia wake, arũngiĩ hau nja ĩo, agĩĩtĩkĩrĩka nĩwe, agĩkĩmwambararĩria rũthanju rũake rũa ũnene rũa thahabu rũrĩa aanyitĩte na guoko. Tondũ ũcio Esiteri agĩthengerera hakuhĩ, akĩhutia rũthanju rũu mũthia-inĩ waruo.
• 3. Nake mũthamaki agĩkĩmũũria atĩrĩ, Esiteri, mũthamaki ũyũ mũtumia, ũbatairio nĩ kĩ? O naguo ũndũ ũrĩa ũkwenda kũ’hoya nĩ ũrĩkũ? Ũndũ ũrĩa ũkuuga wĩkwo-rĩ, o na ũngĩkorũo ũkuuga ũheo nuthu ya mabũrũri marĩa njathaga-rĩ, ti-itherũ nĩũgwĩkwo.
• 4. Nake Esiteri akiuga ũũ: Kũngĩkorũo wee, mũthamaki wakwa, nĩũkuona arĩ wega-rĩ, ndagũthaitha mũũke ũmũthĩ na Hamani iruga-inĩ rĩrĩa ngũrugithĩirie.
• 5. Nake mũthamaki akiuga atĩrĩ, Ta tũmai Hamani ahĩkĩrĩrie, nĩ getha gwĩkwo o ta ũrĩa Esiteri oigĩte. Nake mũthamaki o na Hamani magĩgĩthiĩ iruga-inĩ rĩu Esiteri aarugithĩtie.
• 6. Nake mũthamaki, arĩ iruga-inĩ rĩu rĩa kũnyua ndibei, akĩũria Esiteri atĩrĩ, Ũkwenda wĩkwo atĩa hihi, na ũndũ ũcio nĩũgwĩtĩkĩrĩrũo? Nĩ kĩ wendete kũ’hoya? Nĩ ũndũ-rĩ, ũndũ ũcio nĩũgwĩkwo, o na ũngĩkorũo nĩ nuthu ya mabũrũri marĩa njathaga ũkũ’hoya.
• 7. Hĩndĩ ĩo Esiteri agĩcokia, akiuga atĩrĩ, Ũndũ ũrĩa ngũcaria njĩkwo, mũthamaki ũyũ, o na ihoya rĩrĩa ngũkũhoya, nĩ rĩrĩ,
• 8. nĩ atĩ ingĩkorũo nĩnjĩtĩkĩrĩkĩte nĩwe, nawe, mũthamaki wakwa, ũngĩkorũo nĩwonete arĩ wega kũnjĩtĩkĩrĩra ihoya rĩakwa, o na ũnjĩke ũndũ ũrĩa ngũhoete-rĩ, wee, mũthamaki ũyũ, mwĩ na Hamani, mũgoka iruga-inĩ rĩrĩa ngamũrugithĩria, na rũciũ nĩngeka o ta ũguo wee, mũthamaki ũyũ, ũnjĩrĩte njĩke.
• 9. Na mũthenya ũcio Hamani agĩkiuma kũu, agĩĩthiĩra akenete na ngoro yake mũno; no rĩrĩ, hĩndĩ ĩrĩa Hamani onire Moridekai kĩhingo-inĩ kĩa mũthamaki, na akĩona atĩ ndekũmũrũgamĩra, o na kana ageka ũndũ o na ũmwe ta wa kũmũtĩa, agĩgĩtũkũyana mũno nĩ ũndũ wake.
• 10. No rĩrĩ, o na gwatuĩka ũguo, Hamani nĩegirĩrĩirie gwĩka ũndũ, akĩinũka gwake mũciĩ o ro ũguo; nake akĩrekania arata ake magĩrũo, o na Zereshu mũtumia wake.
• 11. Nake Hamani akĩmaganĩra riri wa ũtonga wake, o na ũhoro wa ũrĩa ciana ciake ciingĩhĩte, o na wa maũndũ mothe marĩa mũthamaki aamwĩkĩte nĩ ũndũ wa kũmũtũũgĩria, o na wa ũrĩa aamwambatĩrĩtie atuĩke mũnene gũkĩra anene arĩa angĩ, o na ndungata iria ingĩ cia mũthamaki.
• 12. O na ningĩ Hamani akiuga atĩrĩ, He! O nake Esiteri, mũtumia wa mũthamaki-rĩ, ndanareka mũndũ o na ũmwe atonyanie na mũthamaki iruga-inĩ rĩrĩa ekũrugithĩtie tiga o niĩ nyiki; o na ningĩ no njĩtĩtwo iruga-inĩ rũciũ nĩwe twĩ na mũthamaki witũ.
• 13. No rĩrĩ, maũndũ macio mothe matirĩ ũndũ mangĩng’una naguo ingĩtuĩka ngũtũũra nyonaga Moridekai, Mũyahudi ũcio, aikarĩte kĩhingo-inĩ kĩa mũthamaki.
• 14. Hĩndĩ ĩo Zereshu, mũtumia wake, o na arata ake othe, magĩkĩmwĩra atĩrĩ, Thondekithia mũtĩ wa mĩkono mĩrongo ĩtano kũraiha na igũrũ, na rũciũ rũcinĩ ũroke kwaria na mũthamaki ũhoro wa atĩ Moridekai acuurio mũtĩ-inĩ ũcio igũrũ; thutha wa ũguo ũgagĩcoka ũthiĩ iruga-inĩ, mwĩ na mũthamaki, ũcanjamũkĩte. Naguo ũndũ ũcio ũgĩkenia Hamani; nake agĩgĩthondekithia mũtĩ ũcio.

Home