Go Back

Thaburi Chapter 102

• 1. IGUA kũhoya gwakwa, Jehova, kũrĩra gwakwa reke gũgũkinyĩrĩre.
• 2. Ndũkeĩ’hithĩre ũthiũ mũthenya ũrĩa ndanyamarĩka; inamĩrĩria gũtũ ũnjigue; mũthenya ũrĩa ndakaya-rĩ, kĩnyamũkĩrie o narua.
• 3. Nĩ amu matukũ makwa nĩmarathirĩrĩkĩra ta ndogo, mahĩndĩ makwa namo mahĩĩte o ta gĩcinga.
• 4. Ngoro yakwa nĩ kũringĩka ĩringĩkĩte ta nyeki, ĩkahoha, ngakĩriganagĩrũo o na kũrĩa irio.
• 5. Tondũ wa mũcayo ũrĩa njayaga mahĩndĩ makwa nĩmagwatanĩte na nyama.
• 6. ’Huana o ta gakuua-ũrogi karĩa ka werũ-inĩ; nduĩkĩte ta ndundu, ĩrĩa ĩikaraga kũndũ kũrĩa kwĩ ihooru.
• 7. Ndaaraga itahingĩte riitho, o na ngahaana ta kanyoni ka mwaga karĩ o goiki gacũmbĩrĩ ka nyũmba.
• 8. Thũ ciakwa itindaga mũthenya wothe o igĩ’thirĩkia; acio mangũrũkĩire-rĩ, rĩrĩa mekũrumana marumanaga na niĩ.
• 9. Nĩ gũkorũo ndĩaga mũhu o ta arĩ irio, na ngundo ĩrĩa ’nyuaga ngamĩtukanagia na maithori,
• 10. Nĩ ũndũ wa mang’ũrĩka maku na gũthũgũta kũu ũ’thũgũtĩire: nĩ amu ũnjoete na igũrũ ũkandungumania na thĩ.
• 11. Matukũ makwa mahaanĩte ta kĩĩruru rĩrĩa kĩratambũrũka gĩcoke kĩbuĩrie; nĩ kũhoha ndĩrahoha ta nyeki.
• 12. No rĩrĩ, wee, Jehova, ũgũtũũra ũikarĩire gĩtĩ kĩa ũnene o nginya tene na tene, kũririkanwo gwaku gũkinyagĩrĩre njiaro na njiaro.
• 13. We nĩũkaarahũka ũiguĩre Zayuni tha, amu hingo yakuo ya gũkinyĩrio wega nĩĩkinyĩte, ĩĩ-ni, ihinda rĩrĩa rĩathĩrĩre nĩ ikinyu.
• 14. Amu mahiga marĩa makuo, ndungata ciaku no imakenagĩra, gwata o rũkũngũ rũakuo, ikenda rũĩkwo wega.
• 15. Nĩrĩo ndũrĩrĩ igetigĩra rĩĩtwa rĩa Jehova, athamaki othe a thĩ metigĩre riri waku:
• 16. Nĩ tondũ Jehova agakorũo acokete gwaka Zayuni, akoneka arĩ o na riri wake;
• 17. Agakorũo etĩkĩrĩte mahoya ma ũrĩa ũtigĩtwo e mwagi, kũhoya kwao agakĩaga gũkũrurũka.
• 18. Ũhoro ũcio no nginya wandĩkwo nĩ ũndũ wa rũciaro rũrĩa rũĩ thutha, na kĩrĩndĩ kĩrĩa gĩgatũmwo kĩgĩe kuo nĩgĩkagoocaga Jehova.
• 19. Nĩ tondũ nĩaaikirie maitho thĩ e kũu gwake gũtheru; e kũu igũrũ-rĩ, Jehova kũrora agĩkĩrora thĩ ĩno,
• 20. Atĩ aigue gũcaya kwa mũgwate, na ohore arĩa matuĩrĩirũo gũkua,
• 21. Nĩguo andũ maganage rĩĩtwa rĩa Jehova Zayuni, ngumo yake ĩmemerekagio kũu Jerusalemu,
• 22. Rĩrĩa irĩndĩ cia thĩ igakorũo ciũnganĩte, gwata mothamaki, nĩguo itungatĩre Jehova.
• 23. Niĩ hinya wakwa nĩaũnyihĩtie ndĩ njĩra, matukũ makwa agakĩmanyihia.
• 24. Ngakiuga atĩrĩ, Ĩ Ngai wakwa, tiga gũ’thengia o rĩrĩa ndaigananĩria matukũ makwa gatagatĩ! wee-rĩ, mĩaka yaku ĩthiaga ĩgĩkinyagĩrĩra njiaro na njiaro.
• 25. Tene tene nĩwe waarire gĩtina gĩa thĩ, o narĩo igũrũ-rĩ, no wĩra wa moko maku.
• 26. Icio no gũthira igathira, nowe nĩ gũikara ũgaikara; icio ciothe nĩ gũkũra igakũra itambuthĩke o ta nguo; ũgacigarũrĩra ta itonyo, nacio igarũrũke:
• 27. Ĩndĩ wee-rĩ, nowe ũrĩa we; mĩaka yaku ndĩkagĩa na gĩturi.
• 28. Ciana cia ndungata ciaku nĩ gũtũũra igagĩtũũra, mbeũ yacio nayo nĩ kũrũmio ĩkarũmio ĩrĩ o mbere-inĩ yaku.

Home