Go Back

Thaburi Chapter 132

• 1. Ĩ JEHOVA, ririkana ũhoro wa Daudi, mĩtangĩko yothe ĩrĩa onire;
• 2. Ũririkane ũrĩa ehĩtire harĩ Jehova, agĩkĩĩgirithia harĩ Kĩhoti ũcio wa Jakubu:
• 3. Niĩ-rĩ, ndigatonya hema, nĩyo nyũmba yakwa, na ndikahaica kĩrumia gĩakwa kĩa ũrĩrĩ;
• 4. Maitho makwa-rĩ, ndikareka mone toro, kana imone ciakwa icũnge,
• 5. O nginya ngonera Jehova handũ ha gũikara, o we Kĩhoti wa Jakubu ngorũo ndĩmuoneire gĩtũũro!
• 6. Nĩ kũigua twaiguire atĩ rĩtũire Efiratha, tũkĩrĩkora mĩgũnda ya mũtitũ-inĩ.
• 7. Nĩtũgakĩingĩre gĩikaro-inĩ gĩake! nĩtũinamĩrĩre gĩturũa-inĩ kĩa makinya make.
• 8. Arahũka, Jehova, ũgĩtonye kĩhurũko-inĩ gĩaku, wee, o na ithandũkũ rĩrĩ rĩa hinya waku!
• 9. Athĩnjĩri aku ta nĩmehumbe ũthingu; andũ arĩa maiguaine nawe nĩmakũngũiye nĩ gũkena!
• 10. Tondũ wa ndungata yaku Daudi-rĩ, tiga kũhutatia ũthiũ wa ũrĩa waku mũitĩrĩrie-maguta.
• 11. Jehova nĩehĩtire akĩrĩkĩria Daudi na ma, na ũhoro ũcio ndangĩũgarũrĩra, akiuga, Gĩtĩ gĩaku kĩa ũnene nĩ arĩa a gũciarũo nĩ mwĩrĩ waku ngagĩikaragĩria.
• 12. Ariũ aku mangĩtũũra mamenyereire kĩrĩkanĩro gĩakwa, gwata maũira makwa marĩa ngamarutaga-rĩ, ariũ ao o nao magaikaragĩra gĩtĩ kĩu gĩaku kĩa ũnene tene o na tene.
• 13. Nĩ gũtuĩka Jehova nĩethurĩire Zayuni, nĩ kwĩendera aakwĩendeire gũgĩtuĩka gĩtũũro gĩake:
• 14. Gũkũ nĩkuo kĩhurũko gĩakwa o nginya tene; nĩkuo ngũtũũra, tondũ nĩ kwenda ndĩkwĩendeire.
• 15. Ũmathi wakuo nĩ kũrathima ndĩĩũrathimaga mũno; ngĩa ciakuo nĩ kũhũnia ndĩrĩcihũnagia irio.
• 16. Athĩnjĩri-Ngai akuo ngũmahumba ũhonokio, na andũ akuo, acio tũrĩ ũiguano nao, no matũũre makũngũyagia nĩ gũkena.
• 17. Nĩkuo ngatũma rũhĩa rũa Daudi rũthundũkĩre; ũcio wakwa mũitĩrĩrie-maguta nĩ tawa ndĩmũigĩire wa gwakanaga.
• 18. Thũ ciake nĩ kũhumba ngacihumbaga njono, nowe mwene, thũmbĩ yake ya ũnene nĩ kũgaacĩra ĩkagaacĩra ĩrĩ mũtwe wake.

Home