Go Back

Thaburi Chapter 139

• 1. JEHOVA, gũ’thuuthuuria nĩũ’thuuthuurĩtie, ũgakĩ’menya.
• 2. Wee nĩũmenyaga ũhoro wakwa, gũikara thĩ o na gũũkĩra; ũkoragwo ũkũũraine itaranio ciakwa ũrĩ o kũraya.
• 3. Ũthũngũrũraga kũgenda gwakwa o na gũkoma, ũgakĩmenya ikĩro ciakwa o ciothe.
• 4. Amu gũtirĩ kiugo kĩngĩkinya rũrĩmĩ-inĩ rũakwa, gĩtamenyekete nĩwe kĩrĩ gĩothe, wee Jehova.
• 5. Nĩ kũ’hingĩrĩria ũ’hingĩrĩirie na thutha o na mbere, na ũgatũũra o ũnjigĩrĩire guoko.
• 6. Ũmenyi ũigana ũũ nĩ wa magegania, nĩ kũngĩra ũngĩrĩte; ũrĩ o igũrũ igũrũ, ndũngĩkinyĩrĩka nĩ niĩ.
• 7. Ingĩkĩgera na kũ, njũranwo na roho waku? kana ingĩkĩũrĩra na kũ, ’thenge ũthiũ-inĩ waku?
• 8. Ingĩhaica ndonye o kũu igũrũ, wee nĩkuo ũrĩ; ingĩara ũrĩrĩ wakwa kwa ngoma, ningĩ ũrĩ o kuo.
• 9. Ingĩoyana na mathagu ma ũtheri gũgĩkĩa, mandware ngatũũre o gĩturi kĩa iria rĩrĩa inene-rĩ,
• 10. O na ndĩ o kũu, no guoko gwaku kũngĩndwaraga, guoko gwaku kwa ũrĩo no gũikare o kũ’nyitĩte.
• 11. Ingiuga atĩrĩ, Nduma nĩyo ĩgũkĩ’humba, ũtheri ũyũ ũ’thiũrũrũkĩirie ũgĩtuĩke ũtukũ;
• 12. O na nduma nayo, harĩ wee ti nduma kũrĩ, ũtukũ-rĩ, ũcangararaga o ta mũthenya; nduma na ũtheri no ũndũ ũmwe harĩ wee.
• 13. Amu kinya o higo ciakwa nowe waciũmbire; wee nĩwe wandathĩkanirie ndĩ nda ya maitũ.
• 14. Nĩndagũcokeria ngatho, tondũ mũũmbĩre ũrĩa nyũmbĩtwo nĩ wa magegania o marĩa me kĩmako; mawĩko maku-rĩ, nĩ ma magegania mũno; niĩ mwene nĩnjũĩ ũguo o wega.
• 15. Mahĩndĩ makwa kũhithara matiakũhitharĩire rĩrĩa ndakũmbĩirũo hitho-inĩ, na ngĩramwo na wara mũnene ndĩ o nguruĩ ya thĩ.
• 16. Maitho maku no maanyonaga hĩndĩ ĩo ndarĩ o kĩongero, na matukũ mothe nĩmaandĩkĩtwo thĩinĩ wa mbuku yaku, matukũ o marĩa ndatarĩirũo, na matarĩ maragĩa, o na ũmwe.
• 17. Itaranio ciaku, Mũrungu, ĩ itikĩrĩ na bata mũno harĩ niĩ! ĩ mũigana wacio nĩ mũnene atĩa!
• 18. Ingĩtua gũcitara, nĩ nyingĩ gũkĩra mũthanga: ningĩ ndahĩndũka, ndĩ o ro ho hamwe nawe.
• 19. Na arĩ korũo, Ngai, andũ arĩa aaganu wamoraga! gĩtiganei na niĩ, aiti-thakame aya!
• 20. Amu makũng’athagiria o moingumanitie; thũ ciaku-rĩ, igwetaga rĩĩtwa rĩaku tũhũ.
• 21. Githĩ ndingĩthũũra acio magũthũire, wee Jehova? acio magũũkagĩrĩra, githĩ ndingĩira ngoro nĩo?
• 22. Gũthũũra ndĩmathũũrĩte o biũ; ndĩmageranagĩria na thũ ciakwa.
• 23. ’Thuuthuuria, Mũrungu, ũmenye ngoro yakwa; ngeria, ũmenye maũndũ marĩa ndĩrathugunda,
• 24. Wone kana thĩinĩ wakwa nĩhagĩĩte na njĩra ya kwĩreherere kĩeha, ũkĩndware o na njĩra ĩrĩa itarĩ gĩturi.

Home