Go Back

Thaburi Chapter 22

• 1. NGAI wakwa, Ngai wakwa, ũkĩndiganĩirie nĩkĩ? ũgũgĩikara haraya nĩkĩ, ũkaaga kũndeithia, ũgakĩraihanĩrĩria na ciugo ciakwa ngĩrarama?
• 2. Ĩ Ngai wakwa, ngũkaya mũthenya, na ndũngĩnyamũkĩria; o na gwata ũtukũ, na ndingĩona ũhurũko.
• 3. No ĩndĩ, wee wĩ mũtheru, o wee ũtũire ũikarĩire gĩtĩ kĩa ũnene harĩa ũgoocagĩrũo nĩ Isiraeli.
• 4. Maithe maitũ nĩwe mehokaga; maakwĩhokaga, nawe ũkamahatũraga.
• 5. We nĩwe maakayagĩra, magakĩhatũka; nowe mehokaga, na matiigana gũconorithio.
• 6. No niĩ-rĩ, nduĩkĩte o kĩgunyũ, ti ta mũndũ; ndĩ kĩmene kĩa andũ, ndurũkĩtwo nĩ kĩrĩndĩ.
• 7. Arĩa othe maranyona no gũ’thekerera mara’thekerera; nĩ gũ’thiorera mara’thiorera mĩromo, na makanyinĩria mĩtwe yao, makoiga,
• 8. No kĩrekererie Jehova ũhoro waku! rekei akĩmũhatũre arĩ we; nĩamũteithũrithie, kuona atĩ nĩekenagĩra nĩwe!
• 9. Nĩ ma, wee nĩwe wandutire ihu-inĩ; nĩwe watũmaga ngĩe na wĩhoko ndĩ o nyondo-inĩ cia maitũ.
• 10. No harĩ wee ndaikirio kuuma o ndaciarũo; kuuma o rĩrĩa ndarĩ nda ya maitũ ũtũire ũrĩ o Mũrungu wakwa.
• 11. Tiga kũnjikara haraya, tondũ mĩnyamaro ĩĩ hakuhĩ, nĩ amu hatirĩ na wa gũkĩndeithia.
• 12. Ndĩ mũrigicĩrie nĩ ndegwa nyingĩ cia njamba, ngahĩtĩrĩrio nĩ mategwa marĩa me hinya ma Bashani.
• 13. Ikũnjathamĩria inua ciacio, ta mũrũthi ũgũtamburanga o ũkĩrumaga.
• 14. Njitĩkĩte thĩ ta maĩ, mahĩndĩ makwa mothe nĩ mareganu, ngoro yakwa yororoete ta mũhũra, ĩkaringũka ĩrĩ o hayo nda-inĩ yakwa.
• 15. Hinya wakwa ũũmagarĩte ta rũgĩo, naruo rũrĩmĩ rũgakĩgwatana na thĩa nĩ kũng’ara; nĩ kũngomia ũrakĩngomia rũkũngũ-inĩ rũa gĩkuũ.
• 16. Amu ndĩ mũrigicĩrie nĩ magui, ndĩ mũhingĩrĩrie nĩ kĩũngano kĩa arĩa eki-naĩ; nĩ gũ’theca ma’thecete hĩ o na nyarĩrĩ.
• 17. Mahĩndĩ makwa, ndahota kũmatara mothe; nao no maitho mangarangĩire o meĩndoreire.
• 18. Magwete kũgayana nguo ciakwa, itonyo rĩakwa magakĩrĩcukĩra mĩtĩ.
• 19. No wee, Jehova-rĩ, tiga gũikara haraya; wee mũndangĩri, hiũha kũndeithia!
• 20. Teithũra muoyo wakwa harĩ rũhiũ rũa njomo; ũyũ wakwa wa mũmwe-rĩ, ũkĩmũteithũre harĩ hinya wa ngui.
• 21. ’Honokia kanua-inĩ ka ngatia, o gwata hĩa-inĩ cia mbogo - Ĩ nĩguo, ũrĩ kũnyamũkĩria!
• 22. Rĩu no ’memerekerie andũ aitũ ngumo ya rĩĩtwa rĩaku; ngũgũkumĩria kĩũngano-inĩ gĩa kĩrĩndĩ gatagatĩ.
• 23. Inyuĩ etigĩri Jehova, mũkumiei; mbeũ ya Jakubu, inyuothe, mũgoocei; na mũmũguoyohere, inyuothe mbeũ ya Isiraeli.
• 24. Tondũ ndarurũkĩte mĩtandiũko ya ũrĩa mũtandiũre, kana akamĩnyira; o na ndanamwĩhithĩra ũthiũ; no rĩrĩ, aamũrĩrĩra, we no kũmũigua akĩmũiguire.
• 25. Gĩtũmi gĩa gũkumia kũrĩa ndĩragũkumia ndĩ kĩũngano-inĩ kĩnene kiumĩte o harĩ wee: ngũkĩhingia mĩĩhĩtwa yakwa ndĩ mbere ya arĩa amwĩtigĩri.
• 26. Andũ arĩa ahoreri nĩmarĩe mahũne; nĩmagooce Jehova, acio mamũrongoretie: ngoro cianyu irotũũra nginya tene na tene.
• 27. Ituri ciothe cia thĩ no ikaririkana, na icokerere Jehova; mĩhĩrĩga yothe ya ndũrĩrĩ nĩĩgakũinamĩrĩra.
• 28. Tondũ ũthamaki nĩ wa Jehova; nowe mũthamaki wa ndũrĩrĩ.
• 29. Andũ arĩa aaramu a thĩ othe nĩ kũrĩa makarĩa na mamũinamĩrire; arĩa othe aikũrũki rũkũngũ-inĩ no magaturia ndu mbere yake, o mũndũ ũrĩa ũtangĩhota gwĩtũũrĩria muoyo.
• 30. Mbeũ ĩrĩ o kuo ya kũmũtungatagĩra; ũhoro wa Mwathani-rĩ, ũrĩheagwo rũciaro rũrĩa rũĩ thutha.
• 31. Acio nĩmagoka maheane ũhoro wa ũthingu wake harĩ kĩrĩndĩ kĩrĩa gĩgaciarũo, atĩ nĩwe wekire ũguo.

Home