Go Back

Thaburi Chapter 38

• 1. Ĩ JEHOVA, tiga kũndũithia wĩ na mathũgũta, o na kana ũ’herithie ũrĩ o na marũrũ.
• 2. Amu-rĩ, mĩguĩ yaku nĩĩndathĩte o thĩinĩ; guoko gwaku nĩkũra’hũra mũno.
• 3. Nyama cia mwĩrĩ wakwa itirĩ na handũ o na hamwe hega nĩ ũndũ wa mang’ũrĩka maku; na tondũ wa wĩhia wakwa mahĩndĩ makwa matingĩkirĩĩrĩria.
• 4. Amu mawaganu makwa nĩ kũ’huba ma’hubĩte nginya o kĩongo; kũnditũhĩra nĩmandĩtũhĩire gũkĩra, o ta mũrigo ũrĩa mũritũ.
• 5. Nguraro iria ndĩ nacio inungĩte kũnunga, ikagwata kuora, nĩ ũndũ wa ũũra-matũ wakwa.
• 6. Njikaraga o ’hacĩkĩte, ngakunguĩrĩra mũno; mũthenya wothe ’thiaga o ’thitĩte nĩ kĩeha.
• 7. Nĩ gũkorũo hũnĩro ciakwa ciiyũire ruo ta rũa mwaki; mwĩrĩ wakwa ndũrĩ na handũ o na hamwe hega.
• 8. Nĩ kũrigoya ndigoete, o na gwĩkĩrũo njĩkĩrĩtwo mĩtunda; no kũrarama ndaramaga nĩ ũrĩa ngoro yakwa ĩtangĩkĩte.
• 9. Mwathani, wendi wakwa wothe ũrĩ o mbere yaku; gũcaya gwakwa ti kũhitharu harĩ we.
• 10. Ngoro yakwa gũtuuma nĩĩratuuma mũno, hinya wakwa no gũ’thira ũra’thira: gwata ũtheri wa maitho makwa o naguo nĩũnyumĩte.
• 11. Andũ arĩa anyendi, na arata akwa, marũgamaga methengetie itũhũhũ-inĩ rĩakwa; kinya o andũ aitũ, makerũgamĩra o hanene.
• 12. Arĩa nao macaragia muoyo wakwa nĩ mĩtego mandegagĩra; acio mendaga kũnjĩka ũũru magakĩaragia ũhoro o wa kĩũnũhu, mũthenya wothe magatinda o magĩĩciria maũndũ ma ũrĩa-ma.
• 13. No niĩ-rĩ, ta ndĩ gĩtaigua gĩtarĩ matũ, ndiiguaga; njikaraga ta kĩrimũ gĩtatumũraga kanua.
• 14. Ĩĩ-ni, nduĩkĩte ta mũndũ ũtaiguaga, na kanua gake gatangĩona ũndũ wa gũcokia.
• 15. Nĩ gũkorũo wee, Jehova, nowe ndĩĩrĩgĩrĩire: gũcokia nĩwe ũrĩcokia, o wee Mwathani Ngai wakwa.
• 16. Nĩ tondũ njugĩte atĩrĩ, Njiguĩra, mamenye gũkangenerera: kũgũrũ gwakwa kwahigũka-rĩ, nĩmeĩ’nenehagĩria.
• 17. Na tondũ nĩngiriĩ gũtuĩka kĩgitũ, na matuurũo makwa maikaraga harĩ niĩ o hingo ciothe.
• 18. Tondũ ningĩ, waganu wakwa nĩngũumbũra; mehia makwa ngũgĩcokia mwĩrirũa nĩ ũndũ wamo.
• 19. No rĩ’, thũ ciakwa ii na kĩyo, o na gũkandĩra nĩ ngandĩru; ningĩ acio ma’thũũrĩte tũhũ, kũingĩha nĩmaingĩhĩte.
• 20. Acio nao arĩhi wega na ũũru nĩ muku mandumĩte, nĩ ũndũ nĩ maũndũ marĩa mega nũmagĩrĩra.
• 21. Ĩ Jehova, ndũkandiganĩrie; ĩ Ngai wakwa, tiga kũnjikara haraya.
• 22. Hiũha kũndeithia, wee Mwathani, o wee ũhonokio wakwa.

Home