Go Back

Thaburi Chapter 58

• 1. MAŨNDŨ ma kĩhooto nomo mũkiugaga, athamaki aya? cira no mũtuaga o ũrĩa kwerekereire, ciana ici cia kĩrĩndĩ?
• 2. Aca, tiguo; ngoro cianyu thĩinĩ no ũũru mwĩkithagia; ũtoi wa moko manyu nĩguo mũgeragĩra bũrũri.
• 3. Andũ arĩa aaganu matuĩkaga orũri o kuuma maaciarũo; o moima nda norĩo magwataga kũũngũtũka, makaaragia mathara.
• 4. Ũrũrũ wao nĩ ta ũrũrũ wa nyamũ-ya-thĩ; matariĩ ta nduĩra gĩtaigua, ĩrĩa ĩthingĩte matũ;
• 5. Ĩrĩa ĩtangĩthikĩrĩria mĩgambo ya arĩa macithuuthagĩra, o na maatuĩka nĩmaramĩthuuthĩra na wara mũnene.
• 6. Ng’ethũranga magego mao, Ngai, macio me tũnua twao; makamburu ma mĩrũthi ĩo mĩĩthĩ, ũkĩmakũũre, wee Jehova!
• 7. Andũ acio nĩmahũĩrĩrĩre mathire, ta maĩ ma kĩguũ, ũrĩa maikũrũkaga na ihenya: mũndũ aagereka mĩguĩ yake-rĩ, nĩĩikare ta ĩrengetwo mĩthia.
• 8. Marotuĩka ta ndinoho, ũrĩa ĩtwekaga o igĩthiaga: marohaana ta kĩhuno kĩhunĩtwo nĩ mũndũ mũka, kĩrĩa gĩtonete riũa!
• 9. O nyũngũ cianyu itanaigua mwaki wa mĩigua-rĩ, we no amĩhurutithĩrĩrie rũhuho rũnene, ĩrĩa mĩigũ na ĩrĩa mĩakanu o ũndũ ũmwe.
• 10. Ũrĩa mũthingu nĩ gũkena agakena akĩona irĩhanĩria rĩu: acio aaganu, agathambia makinya make thakame-inĩ yao.
• 11. Nao andũ makiuge atĩrĩ, Ti-itherũ ngerenwa no kũrĩ ya mũndũ mũthingu: ti-itherũ nĩkũrĩ Ngai ũtuanagĩra gũkũ thĩ!

Home