Thaburi 71

Go Back

Thaburi Chapter 71

1. WEE, JEHOVA, nĩwe ndahĩire; ndũkanakĩreke njonoke.
2. Tondũ wa ũthingu waku-rĩ, ndeithũra, ũkĩ’hatũre; nyinamĩrĩria gũtũ, ũ’honokie.
3. Harĩ niĩ tuĩka ta ndũmba ya ihiga, ya ũtũũro, harĩa ndĩrĩingagĩra hingo ciothe: wee nĩwathĩte atĩ ’honokagio; nĩ amu rũaro rũakwa rũa ihiga, o na kĩhingo gĩakwa kĩa hinya, no wee.
4. Ĩ Ngai wakwa, ’hatũra guoko-inĩ kwa ũrĩa mwaganu, guoko-inĩ kwa mũndũ muogogi na ũrĩa ũtarĩ tha.
5. Nĩ gũkorũo wee, Mwathani Jehova, nowe kĩĩrĩgĩrĩro gĩakwa; ũtũire wĩ mwĩhoko wakwa kuuma ndĩ o mũnyinyi.
6. Ndũire ndiirĩrĩirũo nĩwe kuuma o ndaciarũo; wee nĩwe wandutire nda ya maitũ; hingo ciothe nowe ndĩĩgĩkumagia.
7. Harĩ andũ aingĩ niĩ nduĩkĩte ta ũrirũ; no rĩ’, irahĩro rĩakwa rĩa hinya, no wee.
8. Kanua gakwa karĩiyũraga o ũhoro wa gũgũkumia, gatindage gakĩgana gũtĩĩka gwaku mũthenya wothe.
9. Ndũkae kũnde hingo ya ũkũrũ; menya gũkandiganĩria hinya wakwa watua kũnyihĩrĩra.
10. Nĩ gũthima thũ ciakwa nĩciaragia ũhoro wakwa; acio moheirie muoyo wakwa nĩmarĩkanagĩra,
11. Makoiga atĩrĩ, Ngai nĩamũtiganĩirie: mũthingatei mũmũnyite, amu ndakĩrĩ na mũmũteithũri!
12. Ĩ Ngai, tiga kũnjikara haraya; Ngai wakwa, no kĩhiũhe kũndeithia.
13. Acio magendagĩra ngoro yakwa, ta nĩmaconoke, na maninwo; nĩmahumbwo nĩ rũmena, na kĩnyararo, acio mendaga kũnjĩka ũũru.
14. No niĩ-rĩ, ngũikara hingo ciothe ndĩ o na wĩrĩgĩrĩro, na ngakĩragĩrĩria o gũgũkumia.
15. Kanua gakwa no kaganage ũthingu waku, ndindage o ngĩgana ũhonokio waku mũthenya wothe; amu ũhoro ũcio ndiũĩ mũigana waguo.
16. Ngũũka ngĩkumagia mawĩko ma ũhoti ma Mwathani Jehova; ũthingu waku nĩguo ndĩrĩgwetaga, o waku wee wiki
17. Ngai, nĩwe ũtũire ũndutaga kuuma ndĩ o mũnyinyi, na nginya rĩu no nyumbũraga maũndũ ma magegania marĩa waneka.
18. O na ndakũra, nduĩke ndĩ na mbuĩ, Ngai, menya gũkĩndiganĩria, o nginya ngakorũo ndĩkĩtie kuumĩrĩria andũ a rũciaro rũrũ ũhoro wa hinya waku, maũndũ ma ũhoti waku ngakĩonia mũndũ o wothe ũrĩa ũgũũka thutha.
19. Ningĩ ũthingu waku, Ngai, ũkinyĩte o kũrĩa igũrũ: ĩ wee waneka maũndũ manene ũũ-rĩ, nũ ũngĩ, Ngai, ũkĩhaana tawe?
20. Wee-rĩ, o wee ũtuonetie mĩnyamaro mĩingĩ o na mĩũru, no ũrĩcoka gũtũriũkia, ũtũrute thĩ tũrĩ kũrĩa kũriku mũno, ũtũcokie igũrũ rĩngĩ.
21. Ũnene wakwa, wongerere; kĩnjokerere, ũ’nyamarũre.
22. Niĩ na niĩ no ngũcokagĩrie ngatho ngĩinagia kĩnanda, ngathage ũhoro waku wa ma, wee Ngai wakwa; kĩnanda kĩa mũgeto-rĩ, nĩkĩo ndĩrĩkũinagĩra nakĩo, o wee Ũrĩa Mũtheru wa Isiraeli.
23. Rĩrĩa ngũkũgooca na rũĩmbo, mĩromo yakwa nĩĩrĩkũngũyagia mũno, o gwata ngoro yakwa nayo, ĩno ũkũũrĩte.
24. Rũrĩmĩ rũakwa rũrĩtindaga rũkĩaria ũhoro wa ũthingu waku mũthenya wothe: nĩ gũkorũo arĩa endi kũnjĩka ũũru nĩ gũconoka maconokete, kũgegeara nĩ agegearu.

Home