Go Back

Thaburi Chapter 85

• 1. Ĩ JEHOVA, nĩwakeneire bũrũri waku; gũtahwo kwa Jakubu nĩwakũgarũrĩte.
• 2. Kuohera nĩwoheire kĩrĩndĩ gĩaku waganu wakĩo, ũhĩtia wakĩo wothe ũgakĩũhumbĩra.
• 3. Matũkũya maku nĩ gũthengia wamathengetie mothe, mwaki wa marakara maku ũgakĩũhutatĩra.
• 4. Gĩtũcokererie, wee Ngai mwene ũhonokio witũ, na mathirĩka macio wĩ namo nĩ ũndũ witũ ũtũme magĩthire.
• 5. Kaĩ ũgũtũũra ũtũrakarĩire o kinya tene? nĩ gũtambia ũgũtambia marakara maku nginya njiarũa na njiarũa?
• 6. Githĩ wee ndũngĩĩtĩkĩra gũcoka kũrurumũkia ngoro ciitũ, kĩrĩndĩ gĩaku gĩgĩgũkenere?
• 7. Tuonie ũtugi waku, Jehova, ũgĩtwĩtĩkĩrie ũhonokio waku.
• 8. Nĩngũthikĩrĩria njigue ũrĩa Mũrungu, o we Jehova, ekuuga, amu kĩrĩndĩ gĩake, o acio marĩ ũiguano nake, no ũhoro wa thayũ angĩkĩhe, nakĩo nĩkĩmenye gĩgacokerera ũrimũ wa mwĩĩro.
• 9. Gũtirĩ nganja ũhonokania wake ũikaraga hakuhĩ na arĩa amwĩtigĩri, nĩ getha riri ũtũũre bũrũri witũ:
• 10. Ũtugi na ũhoro-wa-ma ituĩke nĩicemainie, ũthingu na thayũ-rĩ, igakĩmumunyana;
• 11. Ũhoro-wa-ma ũtuĩke nĩũramera ũgĩkunũkaga thĩ, naguo ũthingu ũgũcũthagĩrĩrie ũrĩ igũrũ matu-inĩ.
• 12. Ĩĩ-ni, Jehova no aheanage kĩndũ o gĩothe kĩega, naguo bũrũri ũyũ witũ ũrutage uumithio waguo.
• 13. Ũthingu-rĩ, nĩguo ũrĩmũthiaga mbere, ũtũmage makinya make matuĩke njĩra ya gũthiagĩrũo.

Home