Go Back

Thaburi Chapter 96

• 1. Ĩ ITĨKAI kũinĩra Jehova rũĩmbo rũerũ! mũinĩre Jehova, inyuĩ andũ othe a thĩ.
• 2. Inĩrai Jehova, gathai rĩĩtwa rĩake; hunjagiai ũhoro wa ũhonokania wake mũthenya o mũthenya.
• 3. Ganai ũhoro wa riri wake ndũrĩrĩ-inĩ, mawĩko make ma magegania, mũkĩmaganĩre iruka ciothe cia andũ.
• 4. Nĩ ũndũ Jehova nĩ mũnene, na nĩ wa kũgoocwo mũno: we nĩ wa gwĩtigĩrũo gũkĩra ngai ciothe.
• 5. Thima-rĩ, ngai icio ciothe cia irĩndĩ no indo itarĩ kĩene, ĩndĩ Jehova nĩwe wombire igũrũ.
• 6. Mbere-inĩ yake hatũũraga ũtĩĩku o na ũkaru; kũu gwake kwamũre gũgagĩtũũra hinya o na ũthaka.
• 7. Rahai Jehova, inyuĩ mĩhĩrĩga yothe ya irĩndĩ, rahai Jehova atĩ nĩwe wĩ riri na e na hinya.
• 8. Rahai Jehova nĩ kũgwetaga riri wa rĩĩtwa rĩake: ũkai na ihaki, mũgĩtonye nja-inĩ ciake.
• 9. Ĩ gĩthathaiyei Jehova mũgemete ũgemu ũrĩa wa ũtheru; tetemekai mwĩ mbere yake, inyuĩ andũ othe a thĩ.
• 10. Ugai ndũrĩrĩ-inĩ atĩrĩ, Nĩ hĩndĩ Jehova agwatĩte gũthamaka; ĩĩ-ni, thĩ nĩ kũrũmio ĩrũmĩtio, ũndũ ĩtangĩenyenyeka: arĩciragĩra irĩndĩ ciakuo o ũrĩa kwerekereire.
• 11. Igũrũ ta nĩrĩkene, thĩ nayo nĩĩcanjamũke; iria rĩrĩa inene nĩrĩrurume, gwata kĩrĩa gĩothe kĩrĩiyũire;
• 12. Werũ-inĩ nakuo nĩgũkenũrũrũke, gwata indo ciothe iria ii kuo; hĩndĩ ĩo mĩtĩ yothe ya mũtitũ no yuge ngemi;
• 13. Nĩgwĩkwo ũguo mbere-inĩ ya Jehova, tondũ nĩegũũka; gũũka nĩegũũka gũthamaka thĩ: arĩthamakaga mabũrũri na ũthingu, atuithanagie irĩndĩ na wĩhokeku wake.

Home