1. Nake Jehova akĩĩra Musa atĩrĩ, Thiĩ ũtonye he Firauni, nĩ gũkorũo nĩnyũmĩtie ngoro yake, o na ngoro cia ndungata ciake, nĩguo nyonanie ciama ici ciakwa harĩ o;
2. o na ningĩ nĩ getha wee mwene ũkaaragia ũhoro ũkĩĩiguagĩrũo nĩ mũrũguo, o na mũrũ wa mũrũguo, na matũ mao, ũkĩmera ũrĩa maũndũ matariĩ marĩa njĩkĩte Misiri, na ciama ciakwa iria ningĩte kuo; nĩ getha mũmenye atĩ niĩ nĩ niĩ Jehova.
3. Nao Musa na Haruni magĩthiĩ, magĩtonya he Firauni, makĩmwĩra atĩrĩ, Jehova o we Ngai wa Ahibirania ekuuga ũũ: Nĩ nginya hĩndĩ ĩ ũgũtũũra ũregete kwĩĩ’nyihĩria? Reka andũ akwa mathiĩ, nĩ getha makandungatĩre.
4. Kana hihi ũngĩrega kũreka andũ akwa mathiĩ, rũciũ nĩngarehithie ngigĩ itonye mĩhaka-inĩ ya bũrũri waku
5. nacio nĩikaiyũra thĩ imĩhumbe, o nginya mũndũ aremwo nĩ kũmĩona; nacio nĩikarĩa kĩrĩa gĩothe gĩatigaririo nĩ mbura ya mbembe gĩkĩhonoka, na irĩe mũtĩ o wothe wanyu ũrĩa ũmerete mũgũnda;
6. nacio nyũmba ciaku nĩikaiyũrũo nĩcio, o na nyũmba cia ndungata ciaku ciothe, o na nyũmba cia andũ a Misiri othe naguo ũndũ ũtariĩ ta ũcio, maithe manyu, o na kana maithe mao, matirĩ maawona gwata mũthenya ũrĩa maambĩrĩirie gũtũũra thĩ o nginya ũmũthĩ. Nake akĩhũndũka, akiuma he Firauni.
7. Nacio ndungata cia Firauni ikĩmwĩra atĩrĩ, Nĩ nginya hĩndĩ ĩ mũndũ ũyũ egũtũũra atũrehagĩre ũgwati? Reka andũ aya mathiĩ magatungatĩre Ngai wao. Kana hihi ndũgũkĩmenya atĩ o na rĩu bũrũri wa Misiri nĩ mwanangĩku?
8. Musa na Haruni magĩgĩcokio he Firauni, agĩkĩmera atĩrĩ, Mwĩthiĩrei mũgatungatĩre Jehova Ngai wanyu no rĩrĩ, andũ arĩa megũthiĩ nĩ arĩkũ hihi?
9. Musa agĩkiuga atĩrĩ, Tũgũthiĩ ithuothe, hamwe na aanake aitũ, na athuri aitũ, na ciana ciitũ cia tũhĩĩ, na cia airĩtu, na tũthiĩ na mbũri ciitũ, o na ũhiũ witũ; nĩ gũkorũo twĩ na gĩathĩ gĩa gũthĩnjĩra Jehova.
10. Nake akĩmera atĩrĩ, Kaĩ Jehova arokĩmũikaria o ta ũguo ingĩreka mũthiĩ na andũ anyu arĩa anyinyi-ĩ! Atĩrĩ, nĩnguona atĩ nĩmũcirĩire gwĩka ũũru.
11. Hau ndingĩĩtĩkĩra o na hanini; no rĩrĩ, inyuĩ arũme inyuiki thiĩi mũgatungatĩre Jehova, nĩ ũndũ ũguo nĩguo mwendete. Nao magĩkĩingatwo makiuma he Firauni.
12. Nake Jehova akĩĩra Musa atĩrĩ, Tambũrũkia guoko gwaku ũkũroretie ndwere ciothe cia bũrũri wa Misiri, nĩguo ngigĩ igĩe bũrũri wothe wa Misiri, irĩe tũmĩtĩ tuothe tũrĩa tũmeraga thĩ, twa mĩthemba yothe, tũrĩa tuothe tũtigarĩtio nĩ mbura ya mbembe.
13. Musa agĩkĩroria rũthanju rũake ndwere ciothe cia bũrũri wa Misiri arũnyitĩte na guoko, nake Jehova akĩrehe rũhuho ruumĩte mwena wa irathĩro, naruo rũkĩhurutana kũu bũrũri ũcio mũthenya ũcio wothe, o na ũtukũ; na kwaroka gũkĩa, rũhuho rũu rũa mwena wa irathĩro rũkĩrehe ngigĩ.
14. Nacio ngigĩ icio igĩthiĩ ikĩiyũra bũrũri wothe wa Misiri, igĩikara ndwere ciothe cia kũu Misiri; nacio ikĩĩha o mũno mũno; na gũtirĩ kwagĩa ngigĩ ingĩ ta icio mbere ĩo, o na gũtikoneka ingĩ tacio.
15. Nĩ ũndũ-rĩ, ciahumbire thĩ yothe ya bũrũri ũcio o nginya ũkĩgĩa nduma; nacio ikĩrĩa tũmĩtĩ tuothe tũrĩa twamerete bũrũri ũcio, o na maciaro mothe ma mĩtĩ ĩrĩa yatigĩtio nĩ mbura ya mbembe, na gũtiatigarire gathangũ o na kamwe karuru kũndũ guothe bũrũri wa Misiri, o na ge ka mũtĩ, kana ga tũmĩtĩ tũrĩa twamerete mĩgũnda.
16. Hĩndĩ ĩo Firauni agĩĩta Musa na Haruni na ihenya akĩmera atĩrĩ, Nĩnjĩhĩtie Jehova Ngai wanyu, o na inyuĩ inyuene.
17. Tondũ ũcio ndamũthaitha mũnjohere wĩhia ũcio wakwa ihinda o rĩrĩ rĩmwe riiki, na mũ’hoere Jehova Ngai wanyu nĩ getha anjehererie o ũndũ ũyũ wa kũnina andũ.
18. Agĩkiuma he Firauni akĩhoya Jehova.
19. Nake Jehova akĩhũndũra rũhuho, naruo rũgĩcoka kũhurutana na hinya mũno, mwena wa irathĩro, rũkĩoya ngigĩ icio, rũgĩthiĩ gũciikia o Iria Itune, na gũtiatigarire gakigĩ o na kamwe ndwere ciothe cia Misiri.
20. No rĩrĩ, Jehova akĩũmia ngoro ya Firauni, na ndaigana kũreka ciana cia Isiraeli ithiĩ.
21. Nake Jehova akĩĩra Musa atĩrĩ, Ta tambũrũkia guoko ũkũroretie igũrũ, nĩ getha bũrũri wothe wa Misiri ũgĩe nduma ndumanu mũno o ta ĩngĩhota kũhutio ĩiguwo.
22. Nake Musa agĩtambũrũkia guoko gwake akũroretie igũrũ, nakuo gũkĩgĩa nduma gũgĩtumana mũno bũrũri wothe wa Misiri mĩthenya ĩtatũ;
23. nao andũ othe, mũndũ o mũndũ, gũtirĩ wahotire kuona ũrĩa ũngĩ, o na kana mũndũ o na ũrĩkũ akiuma harĩa aaikarĩte ihinda rĩa mĩthenya ĩtatũ; no ciana ciothe cia Isiraeli ciarĩ na ũtheri kũrĩa ciaikaraga.
24. Nake Firauni agĩĩta Musa, akĩmwĩra atĩrĩ, Mwĩthiĩrei mũgatungatĩre Jehova; o nao andũ anyu arĩa anyinyi nĩmathiĩ; na mbũri cianyu, o na ũhiũ wanyu, icio ciiki nĩciikare gũkũ.
25. Nake Musa akĩmwĩra atĩrĩ, Aca, no rĩrĩ, o nakĩo gĩa kũruta magongona no mũhaka ũtwĩtĩkĩrie, hamwe na gĩa kũrutwo mahaki ma njino, nĩ getha tũkarutĩre Jehova Ngai witũ magongona.
26. O na ũhiũ nĩtũgũthiĩ naguo; gũtirĩ ihũngũ o na rĩmwe rĩgũtigwo; nĩ gũkorũo ũcio nĩguo ũtũbatairie nĩguo tũgatungatĩre Jehova Ngai witũ naguo; tondũ-rĩ, tũtingĩmenya o na hanini kĩrĩa tũkabatario nĩkĩo tũkĩrutĩra Jehova igongona, tiga o hĩndĩ ĩrĩa tũgakorũo tũkinyĩte kuo.
27. No rĩrĩ, Jehova akĩũmia ngoro ya Firauni, na ndaigana kũreka mathiĩ.
28. Ningĩ Firauni akĩmwĩra atĩrĩ, Njeherera haha, na wĩmenyerere tũtikanacoke kuonana ũthiũ na ũthiũ o na rĩ; tondũ mũthenya ũrĩa ũgacoka kũnyona ũthiũ-rĩ, no gũkua ũgakua.
29. Nake Musa akĩmwĩra atĩrĩ, Nĩwoiga wega ndigacoka kuonana nawe o rĩ, o rĩ.