Go Back
Thama Chapter 2
-
1. Na rĩrĩ, nĩkwarĩ mũndũ ũmwe wa nyũmba ya Lawii wahikirie mũirĩtu ũmwe wa nyũmba o ro ĩo ya Lawii.
-
2. Nake mũndũ-wa-nja ũcio akĩgĩa ihu, agĩciara kahĩĩ, na rĩrĩa onire atĩ nĩ kaana gathaka mũno, agĩkahitha mĩeri ĩtatũ.
-
3. Na rĩrĩ, rĩrĩa onire atĩ ndangĩhota gũtũũra akahithĩte, agĩgathondekera gathandũkũ ka marura, agĩgathinga na rami, agĩcoka agĩkahaka rami mũtwekatweku, agĩĩkĩra kaana kau thĩinĩ, agĩkaiga ithanjĩ-inĩ thĩinĩ kũu hũgũrũrũ-inĩ cia rũũĩ.
-
4. Nake mwarĩ wa nyina akarũgamaga harayaraya na hau kaarĩ, nĩguo amenyage ũndũ ũrĩa ũngĩgakora.
-
5. Na rĩrĩ, mwarĩ wa Firauni agĩikũrũka nĩguo agethambe rũũĩ, nacio ndungata ciake cia airĩtu igĩcangacanga kũu hũgũrũrũ-inĩ cia rũũĩ; nake akĩona gathandũkũ kau ithanjĩ-inĩ thĩinĩ, akĩrekia mũirĩtu ũrĩa wamũtungataga, akĩmwĩra akagĩre.
-
6. Agĩgĩkahingũra, akĩona kaana, na atĩrĩ, gakenge kau gakĩrĩra. Nake agĩkaiguĩra tha, akiuga atĩrĩ, Kaana gaka nĩ ka Mũhibirania.
-
7. Nake mwarĩ wa nyina akĩũria mwarĩ wa Firauni atĩrĩ, Nĩũkwenda ’thiĩ ngagwĩtĩre mũtumia Mũhibirania mũreri wa ciana, nĩguo akuongithĩrie kaana gaka?
-
8. Nake mwarĩ wa Firauni akĩmwĩra atĩrĩ, Ĩ nĩguo, gĩthiĩ. Nake mũirĩtu ũcio agĩthiĩ, agĩĩta nyina wa kaana kau.
-
9. Nake mwarĩ wa Firauni akĩmwĩra atĩrĩ, Oya kaana gaka, ũthiĩ nako ũkanyongithĩrie, na nĩndĩrĩkũheaga mũcara. Nake mũtumia ũcio akĩoya kaana kau, agĩgĩcoka gũkongithagia.
-
10. Nako kaana kau gagĩkũra, agĩcoka agĩgatwara kũrĩ mwarĩ wa Firauni, gagĩgĩtuĩka mũrũwe. Nake agĩgatua Musa, akiuga atĩrĩ, Nĩ ũndũ ndakarutire maĩ-inĩ.
-
11. Na gũgĩkinya atĩrĩ, atĩ matukũ macio, hĩndĩ ĩrĩa Musa aakorirũo atuĩkĩte mũndũ mũgima, akiumagara agĩthiĩ kũrora andũ a rũrĩrĩ rũao, akĩona mĩrigo ĩrĩa maatitikithagio, ningĩ akĩona Mũmisiri akĩringa Mũhibirania, mũndũ wa rũrĩrĩ rũu rũao.
-
12. Nake agĩcũthĩrĩria mwena ũyũ, o na ũyũ ũngĩ, na rĩrĩa onire atĩ hatirĩ mũndũ wĩ hakuhĩ akĩringa Mũmisiri ũcio akĩmũũraga, agĩcoka akĩmuumbĩka mũthanga-inĩ.
-
13. Naguo mũthenya ũyũ ũngĩ agĩcoka akiumagara, akĩona andũ erĩ Ahibirania makĩhũrana; nake akĩĩra ũrĩa wogitĩte ũrĩa ũngĩ atĩrĩ, Ũkũringa mũthiritũguo nĩkĩ?
-
14. Nake mũndũ ũcio akĩmũũria atĩrĩ, Wee nawe-rĩ, nũ ũgũtuĩte mũnene witũ, o na mũtũtuithania? Anga o na niĩ ũgwĩciria ũnjũrage ta ũrĩa ũroragire Mũmisiri ũrĩa? Nake Musa agĩgĩĩtigĩra, akiuga atĩrĩ, Kaĩ ũndũ ũcio nĩ mũmenyeku-ĩ!
-
15. Na rĩrĩ, hĩndĩ ĩrĩa Firauni aaiguire ũhoro ũcio, akĩenda kũũraga Musa. No rĩrĩ, Musa akĩĩyũrĩra, akiuma kwa Firauni, agĩthiĩ gũtũũra bũrũri wa Midiani, agĩgĩikara thĩ handũ henjetwo gĩthima.
-
16. Na rĩrĩ, mũthĩnjĩri-ngai wa Midiani agĩkorũo arĩ na airĩtu ake mũgwanja, nao magĩũka gũtaha maĩ, makĩiyũria mĩharatĩ, nĩ getha manyuithie ũhiũ wa ithe wao.
-
17. Na hagĩũka arĩithi makĩmaingata; no rĩrĩ, Musa agĩũkĩra akĩmateithia, akĩmanyuithĩria ũhiũ wao maĩ.
-
18. Na hĩndĩ ĩrĩa maakinyire kũrĩ ithe wao Reueli, akĩmoria atĩrĩ, Ĩ kaĩ mwoka narua atĩa ũmũthĩ?
-
19. Nao makĩmwĩra atĩrĩ, Nĩ mũndũ Mũmisiri ũtũhonokirie harĩ arĩithi; o na ningĩ makĩria, aatũtahĩra maĩ, aatũnyuithĩria ũhiũ.
-
20. Nake akĩũria airĩtu acio ake atĩrĩ, Mũndũ ũcio arĩ ha rĩu? Mũmũtigire nĩ ũndũ kĩ? Thiĩi mũmwĩte, oke arĩe irio.
-
21. Nake Musa agĩĩtĩkĩra gũtũũra kwa mũndũ ũcio, nake mũndũ ũcio akĩhe Musa mwarĩwe ũrĩa wetagwo Zipora.
-
22. Nake agĩgĩciara kahĩĩ, ithe agĩgatua Gerishomu, nĩ ũndũ oigire atĩrĩ, Ndũũrĩte bũrũri wene ndĩ mũgeni kuo.
-
23. NA GŨGĨKINYA atĩrĩ, atĩ matukũ maingĩ maathira, mũthamaki wa Misiri agĩkua, o nacio ciana cia Isiraeli igĩcaya nĩ ũndũ wa ũkombo, nacio ikarĩraga, nakĩo kĩrĩro gĩacio gĩkĩiguwo nĩ Ngai nĩ ũndũ wa ũkombo ũcio.
-
24. Nake Ngai akĩigua mũcayo wao, agĩkĩririkana kĩrĩkanĩro kĩrĩa aarĩkanĩire na Iburahimu, o na Isaaka, o na Jakubu.
-
25. Nake Ngai akĩbara ciana cia Isiraeli, agĩitĩka kũrũmbũiya ũhoro wacio.
Home