1. Ningĩ nĩũgathondeka kĩgongona gĩa gũcinagĩrũo ũbumba igũrũ rĩakĩo, ũgĩthondeke na mũtĩ wa mũthemba ta mũgaa.
2. Nakuo kũraiha gwakĩo, gũtuĩke mũkono ũmwe, na kwarama gwakĩo gũtuĩke o mũkono ũmwe, gĩtuĩke gĩĩ thikwea; na kũraiha na igũrũ gwakĩo gũtuĩke mĩkono ĩĩrĩ; nacio hĩa ciakĩo ituĩke kĩndũ o ro kĩmwe nakĩo.
3. Na ũgakĩhumba guothe na thahabu ĩrĩa therie mũno, o igũrũ rĩakĩo, na mĩena-inĩ guothe, o na hĩa-inĩ ciakĩo. Ningĩ ũgĩthondekere mũnyamũ wa thahabu, ũkĩrigicĩrie mĩena yothe mĩthia-inĩ ya igũrũ.
4. Ningĩ ũgĩthondekere icũhĩ igĩrĩ cia thahabu, ũciĩkĩre mũhuro wa mũnyamũ ũcio o mbaru-inĩ ciakĩo cierĩ, mĩena-inĩ yerĩ yakĩo, nacio nĩ cia gũtonyagio mĩtĩ ĩrĩa mĩraya ya gũgĩkuua.
5. Ningĩ ũgathondeka mĩtĩ ĩo ĩĩrĩ na mũtĩ wa mũthemba ta mũgaa, ũmĩhumbe igũrũ guothe na thahabu.
6. Na ũcoke ũige kĩgongona kĩu mwena wa na nja wa gĩtama kĩrĩa gĩa kũhakania, kĩrĩa kĩĩ hakuhĩ na ithandũkũ rĩa ũira, o hau nyumĩrĩra ya gĩikaro-gĩa-tha kĩrĩa kĩrĩ igũrũ rĩa ithandũkũ rĩu rĩa ũira, o hau tũrĩtũnganaga nawe.
7. Nake Haruni agacinagĩra ũbumba igũrũ rĩakĩo, o na mahuti marĩa manungaga wega. Na rũcinĩ o rũcinĩ hĩndĩ ĩrĩa egũthondeka matawa-rĩ, nĩguo arĩmacinaga.
8. Ningĩ hĩndĩ ĩrĩa Haruni agakoragwo agĩakia matawa o hwaĩ-inĩ-rĩ, hĩndĩ ĩo ningĩ nĩguo akamacina, nĩguo ũbumba ũcinagĩrũo mbere ya Jehova hĩndĩ ciothe o njiaro-inĩ cianyu ciothe.
9. Mũtikanacinĩre ũbumba wa mũthemba ũngĩ igũrũ rĩakĩo, kana ihaki rĩa njino, kana ihaki rĩa mũtu; o na ningĩ mũtikanaitĩrĩrie igongona rĩa indo cia kũnyuwo igũrũ rĩakĩo.
10. Nake Haruni ahorohagĩrie kĩgongona kĩu kĩa ũbumba hĩa-inĩ ciakĩo, o mwaka rĩmwe; akĩhorohagĩrie na thakame ya igongona rĩa mehia o ro ũguo, o mwaka rĩmwe, njiaro-inĩ cianyu ciothe; nĩ ũndũ kĩgongona kĩu nĩ kĩamũrĩre Jehova mũno mũno.
11. Nake Jehova akĩarĩria Musa, akĩmwĩra atĩrĩ,
12. Hĩndĩ ĩrĩa ũgũtara ciana cia Isiraeli nĩ ũndũ wa kũmenya ũrĩa ciigana-rĩ, hĩndĩ ĩo ũkũmatara, o mũndũ nĩarutagĩre Jehova kĩndũ kĩa horohio ya muoyo wake, nĩ getha thĩinĩ wao hatikagĩe ihũra rĩa kũmanina ũkĩmatara.
13. Kĩndũ kĩrĩa marĩrutaga nĩ rĩrĩ, nĩ atĩ o mũndũ akĩhĩtũka athiĩ harĩa arĩa marĩkĩtie gũtarũo maikarĩte, akaruta nuthu ya cekeri, o ta ũrĩa cekeri ya handũ harĩa haamũre ĩigana ĩgĩtarũo: (nayo cekeri ĩo ĩiganaine na gera mĩrongo iĩrĩ;) nuthu ĩo ya cekeri ĩgĩtuĩke nĩyo ĩrĩrutagĩrũo Jehova.
14. Mũndũ o wothe ũrĩa ũkinyĩtie mĩaka mĩrongo ĩĩrĩ, o na agakĩria hau-rĩ, arĩrutaga kĩndũ kĩu gĩa kũrutĩrũo Jehova, akĩhĩtũka athiĩ harĩa arĩa marĩkĩtie gũtarũo maikarĩte.
15. Na rĩrĩ, gĩtonga gĩtikaruta makĩria ma nuthu ĩo ya cekeri, kana mũthĩni arute kĩndũ kĩnyinyi kũrĩ yo, rĩrĩa mekũrutĩra Jehova nuthu icio cia kũhoroheria mĩoyo yanyu.
16. Nacio cekeri icio cia horohio ũciĩtie ciana cia Isiraeli ũcitue cia wĩra wa hema-ya-gũtũnganwo, ituĩke cia gũtũma ciana cia Isiraeli iririkanagwo nĩ Jehova, nĩ ũndũ wa kũhoroheria mĩoyo yanyu.
17. Ningĩ Jehova akĩarĩria Musa, akĩmwĩra atĩrĩ,
18. Nĩũgathondeka kĩnyũngũ gĩa gwĩthambĩrũo gĩa gĩcango, na kũgũrũ gwakĩo gũthondekwo o gwa gĩcango, ũkĩige gatagatĩ ka hema-ya-gũtũnganwo na kĩgongona, ũcoke ũgĩĩkĩre maĩ;
19. nao Haruni na ariũ ake methambagĩre moko mao o na magũrũ mao ho.
20. Hĩndĩ ĩrĩa megũtonya hema-ya-gũtũnganwo-rĩ, nĩ gwĩthamba marĩĩthambaga na maĩ nĩ getha matigakue, o na methambage magĩkuhĩhĩria kĩgongona nĩ ũndũ wa gũtungatĩra Jehova ho, magĩcina indo iria arutĩirũo cia magongona ma ihaki rĩa njino.
21. Ũguo nĩguo marĩĩthambaga moko mao o na magũrũ, nĩguo matigakue; naguo ũndũ ũcio ũtuĩke kĩrĩra kĩa watho wa kũrũmagĩrĩrũo nĩo tene na tene, naguo ũguo nĩ ta kuuga ũrũmagĩrĩrũo nĩ Haruni we mwene, na rũciaro rũake, njiaro-inĩ ciao ciothe.
22. O na ningĩ Jehova akĩarĩria Musa, akĩmwĩra atĩrĩ,
23. Oya mahuti marĩa manungaga wega mĩthemba ĩrĩa mĩega makĩria, nayo nĩyo ũũkĩ wa ngoma wĩtagwo manemane wa mũthemba mwega mũtweku wa cekeri magana matano ũgĩthimwo, na ningĩ ũkoya ndarathini nuthu ya cekeri icio, naguo ũguo nĩ ta kuuga cekeri magana merĩ ma mĩrongo ĩtano igĩthimwo, o na mahuti ma rũũĩ-inĩ mũthemba wĩ mũrĩo wĩtagwo karamathĩ, wa cekeri magana merĩ ma mĩrongo ĩtano o ro ũguo.
24. O namo mahuti ma mũtĩ ũrĩa ũngĩ ũnungaga wega wa mũthemba ta ndarathini, ũkoya cekeri magana matano, o ta ũrĩa cekeri cia handũ harĩa haamũre ciigana igĩthimwo, o na ningĩ ũkoya maguta ma ndamaiyũ ibaba ithano;
25. na rĩrĩ, macio mothe-rĩ, nĩũkamathondeka matuĩke maguta maamũre ma gũitanagĩrĩrio manungaga wega, mathondeketwo o ta ũrĩa mũndũ mũũhĩgĩrĩru ũtukania ũcio wamo athondekaga. Macio nĩmo magatuĩka maguta maamũre ma gũitanagĩrĩrio.
26. Nayo hema-ya-gũtũnganwo ũmĩitĩrĩrie maguta macio, na ithandũkũ rĩa ũira,
27. na metha, hamwe na indo ciayo ciothe, na mũtĩ wa kũigĩrĩrũo matawa, hamwe na indo ciaguo, na kĩgongona kĩrĩa gĩcinagĩrũo mahuti marĩa manungaga wega,
28. na kĩgongona kĩrĩa gĩcinagĩrũo indo iria irutĩtwo cia mahaki ma njino, hamwe na indo ciothe ciakĩo, o na kĩnyũngũ kĩrĩa gĩa gwĩthambĩrũo hamwe na kũgũrũ gwakĩo.
30. Nake Haruni na ariũ ake ũkamaitĩrĩria maguta, ũmaamũre ũmatherie, nĩ getha mandungatagĩre wĩra-inĩ ũcio wa athĩnjĩri-Ngai.
31. Nawe ũkaaria na ciana cia Isiraeli ũciĩre atĩrĩ, Maguta macio nĩmo megũtuĩka maguta maamũre ma gũitanagĩrĩrio njiaro-inĩ cianyu ciothe nĩ ũndũ nĩ makwa.
32. Na rĩrĩ, maguta macio matikanahakwo mwĩrĩ wa mũndũ o na ũrĩkũ, na ningĩ mũtikanathondeke mangĩ mahaanaine namo mathombocanĩtio tamo; maguta macio nĩ maamũre, na mũmatuage o maamũre.
33. Mũndũ o wothe ũrĩa ũrĩthondekaga mangĩ mathombocanĩtio tamo, o na ũrĩa wothe ũrĩmaitagĩrĩria mũndũ wa nyũmba ĩngĩ, nĩakaingatwo athengio kũrĩ andũ ao.
34. Nake Jehova akĩĩra Musa atĩrĩ, Oya mahuti ma mĩthemba ĩrĩa ĩnungaga wega, nayo nĩyo thitakiti, na onuka, na garibane, o mahuti macio manungaga wega hamwe na ubani ũrĩa mwega mũno; nayo mĩthemba ĩo yothe, o mũthemba ũiganane na ũrĩa ũngĩ ratiri ciaguo.
35. Ũcoke ũthondeke mahuti macio matuĩke ũbumba wĩ na mũtararĩko ta wa mahuti mathondeke nĩ mũndũ mũũhĩgĩrĩru ũthondeki wamo, naguo ũbumba ũcio ũtukanio na cumbĩ, na ũtuĩke kĩndũ gĩtheru kĩamũre.