Go Back

Thimo Chapter 13

• 1. Mwana mũũgĩ nĩaiguaga ũtaari wa ithe, no mũndũ mũtendi ndarĩ irũithia angĩigua.
• 2. Mũndũ arĩrĩaga wega wa maciaro ma kanua gake, ĩndĩ ngoro cia mĩgarũka irĩrĩaga ũtoi.
• 3. Mwĩmenyereri kanua nĩ muoyo wake agitagĩra: mũtumũri mĩromo mũno nĩ mwanangĩko akagĩa naguo.
• 4. Ngoro ya kĩgũta nĩĩĩriragĩria, na ndĩone kĩndũ, no ngoro ya mũndũ wĩ kĩyo nĩ kũnorio ĩrĩnoragio.
• 5. Mũndũ mũthingu nĩathũire ũhoro wa maheni, ĩndĩ mũndũ mwaganu, maũndũ make me kĩheera, ningĩ me njono.
• 6. Mũndũ wa mĩthiĩre mĩgima, ũthingu nĩũmũgitagĩra: mũndũ wa mahĩtia, waganu nĩũmũturũraga.
• 7. Kũrĩ wĩtuaga mũtongu, na ndarĩ na kĩndũ: kũrĩ wĩtuaga mũkĩa, na e na ũtonga mũnene.
• 8. Gĩkũũri kĩa muoyo wa mũndũ nĩ ũtonga wake, ĩndĩ mũkĩa akĩĩhĩtĩrũo ndangĩigua.
• 9. Ũtheri wa andũ arĩa athingu nĩ gũcangarara ũcangararaga, no kĩmũrĩ kĩa mũndũ mwaganu nĩ kũhorio gĩkahorio.
• 10. Mwĩgerero ũrehage o njũgitano, ĩndĩ ũũgĩ wĩ na arĩa ataarĩki.
• 11. Indo cia njũka-narua nĩ kũhũa irĩhũagĩrĩra, no mwĩmathĩri na moko make nĩ kuongerereka arĩongererekaga.
• 12. Ũndũ mũtanye watũũrĩrĩra mũno, nĩũrũaragia mũndũ ngoro, ĩndĩ ũndũ mwĩrirĩrie wakinya, ũtuĩkaga ta mũtĩ wa muoyo.
• 13. Mũndũ wothe ũmenaga ũhoro nĩ kwĩũnũhithia eũnũhithagia, no ũrĩa mwĩtigĩri maathani nĩarĩgwataga ngerenwa.
• 14. Kĩrĩra kĩa mũndũ mũũgĩ nĩ gĩthima kĩa muoyo, nĩ gĩa gũtũma gũthengagwo mĩtego-inĩ ya gĩkuũ.
• 15. Ũgerekereri mwega wa maũndũ ũtũmaga mwene endeke, ĩndĩ njĩra ya mĩgarũka ĩrĩ na mĩhĩnga.
• 16. Mũndũ o wothe mũbarĩrĩri ekaga maũndũ make na ũmenyi, ĩndĩ kĩrimũ nĩ gũtandamũra gĩtandamũraga ũrimũ wakĩo.
• 17. Mũtũmwo mwaganu athiaga kũingĩra ũũru-inĩ, ĩndĩ mũrekio mwĩhokeku nĩakinyagia ũhorohu.
• 18. Mũregi ũtaaro akanyitwo nĩ ũthĩni, o na thoni, no mũndũ ũrũmbũyagia akĩrũithio agatuĩka wa gũtĩwo.
• 19. Ũndũ mwĩrirĩrie wakinyĩrĩrĩka nĩũiguithagia ngoro ya mũndũ wega, ĩndĩ harĩ irimũ, gũtigana na ũũru nĩ ũndũ ũrĩ magigi.
• 20. Thiaga thiritũ na andũ arĩa ogĩ, nawe no ũgĩe na ũũgĩ, no ũrĩa ũtindanagia na irimũ nĩ gũtuurũo agatuurũo.
• 21. Andũ a mahĩtia, ũũru nĩguo ũmathingataga, no andũ arĩa athingu makarĩhwo na maũndũ mega.
• 22. Mũndũ mwega atigagĩra o nginya acũkũrũ ake magai, naguo ũtonga wa mũndũ wa mahĩtia nĩ mũhoohio ũigĩirũo andũ arĩa athingu.
• 23. Mahianyũ ma arĩa athĩni nĩmoimaga irio nyingĩ, ĩndĩ nĩkũrĩ ũmathi ũninithagio nĩ wogogi.
• 24. Mũndũ wa kũiga rũthanju thĩ nĩ gũthũũra athũire mwana, no ũrĩa ũmwendete amũherithagia tene.
• 25. Mũndũ mũthingu arĩaga akehũnĩra, no nda ya ũrĩa mwaganu nĩ gũthirĩrũo ĩrĩthiragĩrũo.

Home