Go Back

Thimo Chapter 15

• 1. Icokia ihoreri nĩ gũthengia rĩthengagia marũrũ, no njiinũ nĩ gũthombotha ithombothaga marakara.
• 2. Rũrĩmĩ rũa mũndũ mũũgĩ nĩrũhũthagĩra ũmenyi na njĩra njega, ĩndĩ tũnua twa irimũ tũitũrũraga ũkĩgu o gũitũrũra.
• 3. Maitho ma Jehova monaga kũndũ guothe, magacũthagĩrĩria andũ arĩa oru o na arĩa ega.
• 4. Rũrĩmĩ rũrĩa rũhoreragia nĩ ta mũtĩ wa muoyo, ĩndĩ rũrĩa rũhong’oraga ũhoro no gũthutha mũndũ ngoro.
• 5. Kĩrimũ kĩa ũũra-matũ nĩkĩagagĩra ũtaari wa ithe bata, no mũndũ wa kũrũmbũiya akĩrũithio atuĩkaga mũbarĩrĩri.
• 6. Mũciĩ wa mũndũ mũthingu gũikaraga mũthithũ mũnene, ĩndĩ uumithio wa arĩa aaganu nĩ wa mĩtangĩko mĩtheri.
• 7. Mĩromo ya andũ arĩa ogĩ ĩhunjagia ũmenyi, ĩndĩ ngoro ya ũrĩa kĩrimũ ndĩũĩ gwĩka ũguo.
• 8. Igongona rĩa mũndũ mwaganu no kĩndũ kĩĩ magigi he Jehova, no mahoya ma andũ arĩa arũngĩrĩru nĩ gũkena amakenagĩra.
• 9. Njĩra ya arĩa aaganu nĩ kĩndũ kĩĩ magigi harĩ Jehova, no mũndũ ũthingatanaga o na ũthingu nĩ kwenda amwendaga.
• 10. Kũrĩ iherithio rĩũru rĩetereire ũrĩa ũtigĩte njĩra; mũndũ ũthũũraga kũrũithio, ũcio nĩ wa gũkua.
• 11. Kwa-ngoma, o gwata Ininanĩro-inĩ, kũrĩ o ũthiũ-inĩ wa Jehova: makĩria ma ũguo, githĩ ti ngoro cia ciana cia kĩrĩndĩ!
• 12. Mũtendi ndendaga kũrũithio; ndangĩĩtĩkĩra gũthiĩ harĩ andũ arĩa ogĩ.
• 13. Ngoro ngenu ĩtũmaga gĩthiithi kĩa mwene gĩthere, ĩndĩ ngoro yatũũra na kĩeha nĩgĩthuthaga mũndũ roho.
• 14. Ngoro ya mũndũ wĩ mbuguĩro ĩcaragĩrĩria ũmenyi, no kanua ka arĩa irimũ, kĩrĩa karĩaga no ũkĩgu.
• 15. Matukũ ma arĩa maranyamarĩka no moru o mothe, no mũndũ wa ngoro njaũku, ũcio e na ndĩa ya kĩrũma.
• 16. Kaba kũnyihĩrũo indo, hamwe na gwĩtigĩra Jehova, gũkĩra mũthithũ mũnene hamwe na kĩnyarirĩko.
• 17. Kaba rũĩga rũa nyeni, harĩ kĩendano, gũkĩra njaũ ya gĩtuĩro hamwe na gĩthũũrano.
• 18. Mũndũ wa marũrũ nĩ gũthombotha athombothaga mahiũrania, ĩndĩ ũrĩa ũtahiũhaga kũrakara, ngũĩ nĩ kũhoreria amĩhoragĩria.
• 19. Njĩra ya kĩgũta nĩ ta kũndũ kũirige na mĩigua, no ya mũndũ mũrũngĩrĩru nĩ nyenje ĩgatuĩka kĩng’aratua.
• 20. Mwana mũũgĩ atũmaga ithe akene, no mũndũ kĩrimũ nĩ kũrurũka arurũkaga nyina.
• 21. Ũrimũ nĩguo ũrĩ gĩkeno harĩ mũndũ ũtarĩ wĩcirio, no mũndũ mũtaũku, nĩ kũrũnga erũngagĩra mũgendere wake.
• 22. Kũndũ gũtarĩagwo kĩrĩra, mathondeko makuo nĩ gũthata mathataga, no kũrĩa kwĩ na aheani aingĩ a kĩrĩra nĩ kũrũma marũmaga.
• 23. Mũndũ nĩakenaga nĩ kanua gake gũcokia ũhoro wega, nakĩo kiugo kĩarĩtio o ihinda rĩagĩrĩire, kaĩ nĩ kĩega-ĩ!
• 24. Harĩ mũndũ ũrĩa mũũgĩ, njĩra ya muoyo no ya mwambato, nĩ getha ethengere kũrĩa thĩ Kwa-ngoma.
• 25. Mũciĩ wa mũndũ mwĩtũũgĩria, Jehova nĩ kuombororia akawombororia, no atũũre arũmĩtie mũhaka wa mũtumia wa ndigwa.
• 26. Mathugunda moru nĩ kĩndũ kĩĩ magigi harĩ Jehova, ĩndĩ ndeto nyendeku nĩ iria theru.
• 27. Mũhahatĩria wa indo nĩ mũciĩ wake mwene anyamaragia, ĩndĩ mũndũ ũthũire mahaki nĩ wa gũtũũra.
• 28. Ngoro ya mũndũ mũthingu yambaga gwĩcũrania ũrĩa ĩgũcokia, no kanua ka ũrĩa mwaganu nĩgaitũrũraga maũndũ moru.
• 29. Mũndũ mwaganu, Jehova amũikaraga haraya, ĩndĩ nĩaiguaga kũhoya kwa ũrĩa mũthingu.
• 30. Maitho kuona ũtheri nĩ gũkenia gũkenagia ngoro, na kũigua ũhoro mwega nĩ kũnoria kũnoragia mahĩndĩ.
• 31. Gũtũ kũrĩa gũthikagĩrĩria mũrũithĩrie ũrĩa ũrehage muoyo, kuo nĩ gwa gũtũũrania na andũ arĩa ogĩ.
• 32. Mũregi gũtaarũo nĩ mwĩmeni we mwene, ĩndĩ ũrĩa wa gũthikĩrĩria akĩrũithio nĩagĩaga na wĩcirio.
• 33. Gwĩtigĩra Jehova nĩkuo ũtaari ũrĩa wĩkagĩra mũndũ ũũgĩ, na gũtĩĩka gũtongoirio nĩ kwĩnyihia.

Home