Go Back

Thimo Chapter 16

• 1. Mataarĩria ma ngoro nĩ andũ metaaragĩria, ĩndĩ irĩkia na rũrĩmĩ riumaga kwĩ Jehova.
• 2. Mĩthiĩre ya mũndũ yothe no mĩtheru, we akĩĩonera, no Jehova athimaga maroho.
• 3. Rekagĩrĩria Jehova maũndũ marĩa ũbataragio nĩ gwĩka, na mathugunda maku nĩmarĩhotekaga.
• 4. Jehova nĩombire kĩndũ o gĩothe nĩ ũndũ wa gĩtũmi gĩakĩo, ĩĩ-ni, o gwata arĩa aaganu akĩmomba nĩ ũndũ wa mũthenya ũrĩa wa ũũru.
• 5. Mũndũ o wothe wa ngoro ya ngũrũ nĩ kĩndũ kĩĩ magigi harĩ Jehova; o na kwanyitanwo moko, ndatũũra atarĩ mũherithie.
• 6. Waganu nĩũitũrũragio nĩ ũtugi na maũndũ marĩa ma ma; tondũ wa gwĩtigĩra Jehova, andũ nĩmathenganagĩra na ũũru.
• 7. Mĩthiĩre ya mũndũ yatuĩka no ĩrĩa ĩkenagia Jehova, atũmaga o gwata thũ ciake igĩe na ũiguano nake.
• 8. Kaba kũnyihĩrũo indo, hamwe na ũthingu, gũkĩra uumithio mũnene ũtarĩ wa kĩhooto.
• 9. Mũndũ nĩethugundagĩra na ngoro yake atĩ athiĩ na njĩra ’na, ĩndĩ makinya make nĩ Jehova ũmaroragia na harĩa mekũgera.
• 10. Nĩ ũgo ũrĩ mĩromo-inĩ ya mũthamaki; kanua gake gatingĩhĩtia ituĩro-inĩ.
• 11. Kĩgeri, o na ratiri, iria cia kĩhooto, nĩ cia Jehova; mahiga ma mondo, marĩa ma gũthima, mothe no wĩra wake.
• 12. Harĩ athamaki kũmaramara nĩ ũndũ wĩ magigi, nĩ amu gĩtĩ kĩa ũnene kĩrũmagio no ũthingu.
• 13. Mĩromo ĩrĩ ũthingu nĩyo ĩkenagĩrũo nĩ athamaki, na kwenda makenda mũndũ waragia ndeto njerekereru.
• 14. Marũrũ ma mũthamaki nĩ ta arekio a gĩkuũ, ĩndĩ mũndũ mũũgĩ no kũmahoreria.
• 15. Gũthererũo gĩthiithi nĩ mũthamaki kũrĩ muoyo; kwagĩrĩrũo nĩwe nĩ ta itu rĩa mbura ĩrĩa ya gũkũria.
• 16. Githĩ kũgĩa na ũũgĩ-ũrĩa-wa-ma ti kwega mũno kũrĩ kũgĩa na thahabu? ĩĩ-ni, kaba gwĩthurĩra kũgĩa na mbuguĩro gũkĩra kũgĩa na betha.
• 17. Andũ arĩa arũngĩrĩru, barabara yao nĩ mũndũ ethemagie ũũru-inĩ; ũrĩa ũmenyagĩrĩra njĩra yake nĩ muoyo wake aragitĩra.
• 18. Mwĩgatho ũrũmagĩrĩrũo nĩ mwanangĩko, ngoro ya ngũrũ nĩĩtũmaga mũndũ agũe.
• 19. Wega nĩ gũtuĩka wa ngoro horeri hamwe na athĩni, kũrĩ kũgayanaga mataha hamwe na andũ arĩa egereri.
• 20. Ũrĩa ũrũmbũyagia ũhoro, nĩ wega arĩonaga; mũndũ o wothe mwĩhoki Jehova, nĩwe mũkeni.
• 21. Ũrĩa wĩ na ũũgĩ-ũrĩa-wa-ma ngoro-inĩ yake atuagwo mũtaũku, na mĩromo ĩrĩa yaragia ciugo ii mũrĩo nĩyongererithagia andũ wĩruti.
• 22. Ũgerekereri wa maũndũ, harĩ ũrĩa wĩ naguo, nĩ itherũkĩro rĩa muoyo, ĩndĩ irimũ njũra-matũ, ũrimũ nĩguo kĩherithia gĩacio.
• 23. Ngoro ya mũndũ mũũgĩ nĩyũhĩgagia kanua gake, ĩgakĩongerera mĩromo yake ndeto cia wĩruti.
• 24. Ndeto njega nĩ ta mũruru wa ũũkĩ: harĩ ngoro ii na mũrĩo, na harĩ mahĩndĩ nĩ ũgima.
• 25. Kwĩ njĩra mũndũ onaga ta arĩ yo nũngarũ, no gĩturi kĩayo nĩ mĩirigo ya gũtonya gĩkuũ-inĩ.
• 26. Mũruti-wĩra, kũhũta gwake nĩkũrutithanagia nake, nĩ amu nĩ mũmero wake ũmũringagĩrĩria.
• 27. Mũũra-huhũ nĩathugundaga maũndũ ma gwĩka andũ arĩa angĩ ũũru, nayo mĩromo yake nĩ ta ĩrĩ na mwaki wa gũcinana.
• 28. Mũndũ mũtũrĩku nĩ kũhura ahuraga mahiũrania, mũndũ wa mũhuhu atigithanagia andũ marĩ ũrata mũnene.
• 29. Mũndũ mũtoi ahenagĩriria ũrĩa ũngĩ wa itũũra rĩao, agakĩmũtongoria na njĩra ĩtarĩ njega.
• 30. Ũrĩa ũikaraga ahingĩte maitho nĩ maũndũ ma rũtũrĩko arathugunda; ũrĩa ũhihinyainie mĩromo nĩ ũũru ararehithie.
• 31. Kĩongo kĩrĩ mbuĩ nĩ thũmbĩ ĩrĩ ũgemu; kuoneka kĩonekaga na njĩra ya ũthingu.
• 32. Ũrĩa ũtahiũhaga kũrakara nĩ mwega kũrĩ njamba; ũcio ũhotaga gwatha ngoro yake akĩrĩte ũrĩa wa kwĩgwatĩra itũũra.
• 33. Mbũgũ gũitwo nĩciitagwo rũũa-inĩ, ĩndĩ woni wacio wothe uumaga kwĩ Jehova.

Home