Go Back

Thimo Chapter 20

• 1. Ndibei nĩ mũndũ mũtendi, njohi-rĩ, nĩ mũndũ wa ngũĩ, nake ũrĩa ũngĩhĩtithio nĩyo, o ũrĩkũ, ti mũũgĩ.
• 2. Itebebia rĩa mũthamaki nĩ ta mũthungurumo wa mũrũthi: mũndũ wa kũmũrakaria nĩ muoyo wake mwene areĩhĩria.
• 3. Gũthengera ngũĩ nĩ gwa kũheithia mũndũ gĩtĩo, ĩndĩ kĩrimũ, gũtirĩ gĩtenda mburugano.
• 4. Mũndũ mũgũta nĩaregaga kwenja mũgũnda tondũ wa heho ya gathano, na hingo ya magetha agetia irio, na gũtingĩkorũo kũrĩ.
• 5. Methugunda ma ngoro ya mũndũ matariĩ ta maĩ me irima iriku, ĩndĩ mũndũ mũtaũku nĩegwĩtahĩra.
• 6. Andũ arĩa angĩ nĩ a kwĩanĩrĩra o mũndũ ũtugi wake, ĩndĩ mũndũ mwĩhokeku, angĩoneka nũ?
• 7. Mũndũ wĩ maũndũ ma kĩhooto, o ũrĩa wa mĩthiĩre mĩgima, ciana iria atigaga, kaĩ nĩ cia gũkena-ĩ!
• 8. Mũthamaki rĩrĩa aikarĩire gĩtĩ gĩake gĩa ituĩro nĩ kũharagania aharaganagia ũũru wothe na maitho make.
• 9. Nũ ũngĩhota kuuga ũũ: Ngoro yakwa nĩndĩmĩthambĩtie, gũthirũo nĩ’thirĩtwo nĩ mahĩtia makwa, ngathera?
• 10. Gũthima na mahiga makĩrũkaine, o na ibaba ikĩrũkaine, kũu kwerĩ no magigi harĩ Jehova.
• 11. O na kaana kamenyekaga na ciĩko ciako, kana maũndũ mako nĩ makembu, na kana no marũngĩrĩru.
• 12. Gũtũ gwa kũigua, o na riitho rĩa kuona, cierĩ no Jehova waciũmbire.
• 13. Tiga kwendana na toro, ndũkae gũgakinya gũkĩara; ikaraga ũramũrĩtie maitho, na nĩũrĩhũnaga gĩa kũrĩa.
• 14. Mũgũri akĩgũra oigaga, Ti kĩega, ti kĩega! na aarĩkia gwĩthiĩra agacoka kwĩraha.
• 15. Thahabu no kũrĩ, o na ruru no nyingĩ, ĩndĩ mĩromo ĩrĩ ũmenyo nĩ ithaga rĩĩ bata mũno.
• 16. Ũrĩa watuĩka ithenya rĩa mũgeni-rĩ, kiumanie na kuoya nguo yake! kĩmũtue o we ngwatio ya thirĩ harĩ andũ acio a kũngĩ!
• 17. Irio cionekete na maheni, nĩicamagĩra mũndũ mũrĩo, no kahinda kau kangĩ kanua gake gakaiyũra o mũthanga.
• 18. Ũndũ o wothe ũgĩthugundwo ũrũmagio na kũrĩĩrũo kĩrĩra; ũgĩthiĩ ita-rĩ, thiaga ũrĩ mũtaarĩrie o wega.
• 19. Mũcangi na ndeto cia mũhuhu nĩatuhũraga maũndũ ma ndundu: mũndũ wa mĩromo ĩtatumagia, ndũkanakĩmathithanie nake.
• 20. Mũgeki ithe kana nyina, kĩmũrĩ gĩake gĩkahorera nduma-inĩ oĩrĩa njirũ ci!
• 21. Igai rĩngĩgwatwo na mũhiũhũko kĩambĩrĩria marigĩrĩrio marĩo matingĩtuĩka marathime.
• 22. Tiga kuuga atĩrĩ, Ũũru kwĩrĩhĩria nĩndĩĩwĩrĩhĩria! eterera Jehova, nake nĩarĩkũhonokia.
• 23. Gũthima na mahiga makĩrũkaine nĩ ũndũ wĩ magigi harĩ Jehova; ratiri ya maheni o nayo ti njega.
• 24. Mĩgendere ya mũndũ nĩ Jehova ũmwathagĩra: mũndũ aakĩhota atĩa kwĩmenyera gĩtũmi kĩa njĩra ĩo agerete?
• 25. Nĩ mũtego harĩ mũndũ kuuga na kĩhĩko, Kĩndũ gĩkĩ nĩndaamũrĩra Ngai, na aarĩkia kwĩhĩta ũguo, acoke kwĩũrangia.
• 26. Mũthamaki mũũgĩ nĩ kũhuhũra ahuhũraga andũ arĩa aaganu ta mũũngũ; nĩ ta arehagĩre kĩgaragari igũrũ rĩao, kĩrĩa gĩa gũkonyora ngano.
• 27. Roho wa mũndũ nĩguo kĩmũrĩ kĩa Jehova, gĩthuuthuuragia mũndũ nginya tũturi twa nda tuothe tũrĩa twĩ thĩinĩ mũno.
• 28. Mũthamaki aigagwo nĩ gũtugana na gũtuĩka wa ma; gĩtĩ gĩake kĩa ũnene nĩ ũtugi ũtiiragĩrĩra.
• 29. Hinya wa aanake nĩguo ũgemu wao, nao athuri, ũthaka wao nĩ mũtwe ũrĩ mbuĩ.
• 30. Mĩtuuru ya kũhũrũo nĩĩthambagia mũndũ ũũru wake; mahiũkia nĩ gũtonya mamũtonyaga o kinya tũturi twa nda tũrĩa twĩ thĩinĩ mũno.

Home