Go Back

Thimo Chapter 23

• 1. Waikara thĩ kũrĩa irio na mwathi-bũrũri-rĩ, barĩrĩra wega atĩ ũcio nũ ũkũng’etheire:
• 2. Nĩ kaba ũngiĩigĩrĩra kahiũ mũmero akorũo ũrĩ mũndũ wa mũhaaha.
• 3. Rũkũri rũu rũake, ndũkanarũcemekere, amu nĩ irio cia gũkũhenereria.
• 4. Tiga kwĩnogia na kwenda gwĩtongia; tigana na ũũgĩ waku mwene.
• 5. Githĩ wenda gũkũũrĩra maitho kĩndũ gũtarĩ? amu gũtirĩ nganja ũtonga nĩwĩmeragia mathagu o ta nderi ĩkĩgũrũka yerekeire o matu-inĩ.
• 6. Tiga kũrĩa irio cia mũndũ wa riitho rĩa ũkarĩ, na ndũkanacemekere rũkũri rũu rũake,
• 7. Amu-rĩ, ũguo anonaga ngoro-inĩ yake, noguo atariĩ; gũkwĩra egũkwĩra, Rĩa, na ũnyue! na ngoro yake ndĩrĩ harĩ wee.
• 8. Kenyũ kau warĩa nĩũgũcoka gũgatahĩka, onacio ndereti ciaku njega ikũũre o tũhũ.
• 9. Tiga kwaria ũhoro na kĩrimũ, amu ndeto ciaku no kũrurũka angĩrurũka ũũgĩ wacio.
• 10. Menya gũkanakũũra mũtĩ wa ndĩĩra wa mũhaka, na ndũkanaingĩrĩre mĩgũnda ya andũ a ndigwa,
• 11. Nĩ gũkorũo mũmarĩhithĩria nĩ ũrĩa wĩ na hinya, na nĩwe ũngĩkamacirĩrĩra harĩ wee.
• 12. Ĩringĩrĩrie ngoro ĩthikĩrĩrie ũtaari, o na matũ namo makĩigue ciugo cia ũmenyi.
• 13. Ndũkaage kũherithagia mwana, amu wamũhũra na rũthanju, ndangĩtuĩka wa gũkua.
• 14. No kinya ũmũhũrage na rũthanju, ũkĩgiranie muoyo wake na Kwa-ngoma.
• 15. Mũrũ wakwa, ngoro yaku ĩngĩgĩa na ũũgĩ-ũrĩa-wa-ma, ngoro yakwa o nayo no ĩkene;
• 16. Ĩĩ-ni, higo ciakwa no icanjamũkage rĩrĩa mĩromo yaku yaaria maũndũ marĩa marũngĩrĩru.
• 17. Ngoro yaku nĩĩmenye gũkaigua ũiru nĩ ũndũ wa andũ a mahĩtia; wee-rĩ, mũthenya wothe tindaga na ũhoro wa gwĩtigĩra Jehova:
• 18. Amu nĩ ma, no gũkagĩa na thutha mwega, na kĩĩrĩgĩrĩro gĩaku gĩtigatura.
• 19. Wee, mũrũ wakwa, igua, nĩ getha ũkĩũhĩge; erekagĩria ngoro yaku ĩgerage o njĩra.
• 20. Ndũkanegwatanie na inyui-cia-njohi, ona kana arĩa ndĩa-nyama,
• 21. Amu ũrĩa ũrĩagwo nĩ njohi, o nake ũrĩa kĩrĩi, magakinya gũkĩara; ũgũta-rĩ, no kwĩhumbithia mũndũ matangari.
• 22. Thikagĩrĩria thoguo mũgũciari, na ũmenye gũkarũrũka nyũkwa na aatuĩka nĩ mũkũrũ.
• 23. Ĩgũrĩre ũhoro-ũrĩa-wa-ma, na menya gũgacoka kũwendia; ĩĩ-ni, gũra ũũgĩ, o na ũtaaro, na mbuguĩro.
• 24. Ithe wa mũndũ mũthingu nĩ wa gũikaraga e mũkenyũku mũno, mwĩciarĩri mwana mũũgĩ no gũkena arĩkenaga nĩ ũndũ wake.
• 25. Gĩkenagie thoguo na nyũkwa, ĩĩ-ni, mũtumia ũcio wagũciarire, gĩtũme aikarage e mũkenyũku.
• 26. Mũriũ, njerekeria ngoro yaku, maitho maku ta nĩ makenagio nĩ njĩra ciakwa.
• 27. Thima-rĩ, mũka wa maraya ahaana ta mũtaro mũriku, mũndũ-wa-nja mũgeni-rĩ, nĩ irima ikunderie rĩa gũtegana.
• 28. Ĩĩ-ni, nĩ kuoheria ohagĩria andũ ta njangiri, na nĩatũmaga kĩrĩndĩ-inĩ kũingĩhe mĩgarũka.
• 29. Nĩ mũndũ ũrĩkũ uugaga, Wũi? nĩ ũrĩkũ uugaga, Ĩya-ĩ? nĩ ũrĩkũ ũtindaga na mahiũrania? nũ ũikaraga o akĩguguna? nũ ũgĩaga nguraro cia tũhũ? ĩ, mũtunĩhi maitho nĩ ũrĩkũ?
• 30. Githĩ ti arĩa matindaga marũmanĩrĩire na njohi? githĩ to arĩa marakagĩra ndibei ĩrĩa ningĩrĩrie?
• 31. Atĩrĩ, wee-rĩ, tiga kũbara ndibei o na yagĩtunĩha, na yakorũo nĩĩrakengakenga ĩrĩ gĩkombe-inĩ, na yatuĩka nĩĩnyorokaga wega ĩkĩmerũka:
• 32. Amu mũthia-inĩ, nĩ kũrũmana ĩrũmanaga ta njoka, kũratha ĩkarathana o ta nduĩra.
• 33. Maitho maku no kuona maũndũ magarũrũku, nayo ngoro yaku ĩkiuge maũndũ ma ũnanu.
• 34. Ĩĩ-ni, ũgĩtuĩke ta mũndũ wĩmamĩtie o iria-inĩ rĩrĩa inene gatagatĩ, kana ta mũndũ ũkomete mũthia-inĩ wa gĩtugĩ kĩa macua.
• 35. Ningĩ uuge atĩrĩ, Ngũthĩtwo-ĩ, na ndingĩtuurũo; ngahũrũo, na ndiigue ũndũ! O ndĩĩkĩhindũka rĩ? ngũgĩthiĩ gũthiĩ kũmĩetha o rĩngĩ!

Home