Go Back

Thimo Chapter 24

• 1. Tiga gũkanaiguĩra andũ arĩa oru ũiru, na ndũkanerirĩrie gũtwarana hamwe nao;
• 2. Amu ngoro ciao ciĩcũranagia o ũhoro wa ndunyo, na mĩromo yao ĩgakĩaragia o ndeto cia kĩũnũhu.
• 3. Nyũmba yakagwo na njĩra ya ũũgĩ; ũtaũku nĩguo ũtũmaga ĩĩhande:
• 4. Nĩ ũmenyi ũiyũrithagia matheegi mayo ũmathi wothe ũrĩa wĩ bata na mwega.
• 5. Mũndũ mũũgĩ nĩwe wĩ na hinya, ĩĩ-ni, mũndũ ũrĩ ũmenyi nĩwe ũkĩragĩrĩria ũhoti.
• 6. Amu ũgĩthiĩ ita, thiaga ũrĩ mũtaarĩrie o wega; kũrĩa kwĩ na aheani aingĩ a kĩrĩra gũtũũraga kwĩgangarĩte.
• 7. Ũũgĩ-wa-ma wĩ igũrũ mũno, ndũngĩkinyĩrĩrĩka nĩ kĩrimũ; kĩo gĩtingĩĩtumũrĩra kanua kĩrĩ boi-inĩ.
• 8. Mũthugundi njĩra cia gwĩkana ũũru-rĩ, andũ mamwĩtaga o muungumania.
• 9. Mathugunda ma irimũ iria njũra-matũ nĩ ma ũhĩtia, na mũtendi nĩ kĩndũ kĩĩ magigi harĩ kĩrĩndĩ.
• 10. Ũngĩtuĩka wa kũũrũo nĩ hinya mũthenya wa mĩnyamaro-rĩ, hinya waku no mũnyinyi.
• 11. Teithũrithagia arĩa maratwarũo gĩkuũ-inĩ; acio makiriĩ kũũragwo-rĩ, menya ũrege kũmahonokia.
• 12. Ũngiuga ũũ, Ũhoro ũcio ithuĩ tũtiraũũĩ-rĩ, githĩ ũrĩa ũthimaga ngoro ndangĩtarania ũguo woiga? ũcio ũgitagĩra muoyo waku, we githĩ ndoĩ kana nĩguo? nake githĩ ndagathukĩra mũndũ o mũndũ kũringana na ũrĩa ekĩte?
• 13. Mũrũ wakwa, rĩa ũũkĩ, amu nĩ mwega; kĩrũme mũruru waguo, ũkĩrĩ wa gũgũcamĩra mũrĩo:
• 14. Ũkĩmenye atĩ ũũgĩ-ũrĩa-wa-ma noguo ũtariĩ harĩ ngoro yaku; ũngĩkorũo nĩũgĩĩte naguo-rĩ, no ũkagĩa na thutha mwega, na kĩĩrĩgĩrĩro gĩaku gĩtigatura.
• 15. Wee, mũndũ ũyũ mwaganu, ndũtige gũcemerera gĩtũũro kĩa ũrĩa mũthingu! ndũgĩtige kwananga kĩhurũko gĩake!
• 16. Amu mũndũ mũthingu agũaga magũa mũgwanja, o agĩcokaga gũũkĩra, ĩndĩ arĩa aaganu mona ũũru maturũragwo nĩguo gũturũrũo.
• 17. Thũ yaku yagũa, wee tiga gũkena; yaturũrũo-rĩ, ngoro yaku ndĩgacanjamũke:
• 18. Jehova ndagakĩone, ũndũ ũcio ũmũiguithie ũũru, acoke ahũndũre marakara make moime harĩ thũ ĩo.
• 19. Tigaga gwakanwo nĩ ngoro nĩ ũndũ wa andũ arĩa eki ũũru, na ndũkaiguage ũiru nĩ ũndũ wa acio aaganu,
• 20. Nĩ gũkorũo mũndũ ũrĩa mũũru ndarĩ thutha mwega akona; kĩmũrĩ kĩa ũrĩa mwaganu-rĩ, no kũhorio gĩkahorio.
• 21. Mũrũ wakwa, wee ĩtigagĩre Jehova, o gwata mũthamaki; ndũkanamathithanie na andũ arĩa mendaga kũgarũrithia maũndũ,
• 22. Amu-rĩ, mũtino wao ũkamakora na kĩhobanĩrio; iharagania rĩrĩa rĩngiuma kũrĩ acio erĩ, nũ ũkĩrĩũĩ?
• 23. MAYA NAMO no mohoro ma andũ arĩa ogĩ. Gũtĩĩra andũ maũthĩ cira-inĩ-rĩ, ti ũndũ mwega.
• 24. Mũndũ wĩraga ũrĩa mwaganu, Wee nĩwe mũthingu, nĩ kũgekwo arĩgekagwo nĩ andũ a mabũrũri, arĩthũũragwo nĩ ndũrĩrĩ o gũthũũrũo.
• 25. No arĩa marũithagia ũrĩa mwaganu nĩ wega marĩonaga, marĩikaraga o na kĩrathimo kĩega.
• 26. Wa gũcokia ũhoro icokio rĩrĩa rĩringaine, no ta aamumunya mũndũ mĩromo.
• 27. Amba ũtue mwako, ũwĩhaarĩrĩrie na kũu gĩthaka-inĩ; warĩkia, ũgĩcoke ũgĩake nyũmba yaku.
• 28. Ndũkanaigĩrĩre mũndũ ũrĩa ũngĩ ũndũ ũtarĩ ho; kũhenania, menya ũkahenania na mĩromo yaku.
• 29. Menya ũkoiga, Ngũmwĩka o ũguo anjĩkĩte, mũndũ ũcio ngũmũthukĩra kũringana na ũrĩa ekire!
• 30. Ndĩragereire mũgũnda-inĩ wa mũndũ kĩgũta, na mũgũnda-inĩ wa thabibu wa mũndũ ũtarĩ wĩcirio,
• 31. Na rĩrĩ, wothe ũrarĩ mũmeru mĩigua, ũkaiyũra, gĩthiithi kĩaguo nĩkĩrahumbĩtwo nĩ cong’em na rũirigo rũaguo rũa mahiga rũkamomoka.
• 32. Ndĩrawĩrorera o ngĩcũranagia ũhoro ũcio wega, ndĩrakĩguũka, na gũtaarĩka ndĩragĩtaarĩka;
• 33. Mũtugo waku nĩ ũũ: Nĩnyambe ngomakome, njoke toro hanini! nĩndekwo ngũnjanie hĩ kahinda ngĩkome!
• 34. Ũhoro ũcio-rĩ, ũgatũma ũkĩa waku ũgũkorerere ta mũitũ, ũtharĩkĩrũo nĩ ũnyamari ta arĩ mũndũ ũgwete ngo.

Home