Go Back

Kohelethu Chapter 6

• 1. Nĩkũrĩ ũũru nyonete gũkũ thĩ kwaraga riũa, naguo nĩũritũhagĩra andũ mũno.
• 2. Naguo nĩ wa mũndũ ũrĩa ũheagwo nĩ Ngai ũtonga, na indo, o na gĩtĩo, na ndangĩkorũo aagĩte kĩndũ o na kĩ kĩa indo ciothe iria eriragĩria na ngoro yake; no rĩrĩ, Ngai akaaga kũmũhe hinya wa kũrĩa indo icio, no ikarĩagwo nĩ mũgeni; ũndũ ũcio o naguo no wa tũhũ, na nĩ mũrimũ mũũru.
• 3. O na mũndũ angĩciara ciana igana, na atũũre mĩaka mĩingĩ, o nginya matukũ ma mĩaka yake maingĩhe mũno, no aage gũkorũo aiyũrĩtwo nĩ wega ngoro, o na ningĩ makĩria akaaga gũthikwo aakua-rĩ, niĩ nguuga atĩrĩ, nĩakĩrĩtwo nĩ kĩhuno.
• 4. Nĩ ũndũ kĩhuno kĩu gĩũkaga tũhũ, na gĩgathirĩra o nduma-inĩ, na rĩĩtwa rĩakĩo rĩkahumbwo nĩ nduma o ro ĩo:
• 5. o na ningĩ kĩagĩte kuona riũa, kana kũrĩmenya: kĩu-rĩ, nĩkĩgĩaga na ũhurũko gũkĩra mũndũ ũcio;
• 6. ĩĩ, ti-itherũ ũguo nĩguo, o na angĩtũũra mĩaka ngiri maita merĩ, na aage maũndũ mega ma kũmũkenia; githĩ othe matigĩthiaga o handũ hamwe?
• 7. Mĩĩtungumanio yothe ya mũndũ nĩ ya kũiyũria kanua, no rĩrĩ, ngoro ndĩthiragwo nĩ mũhaaha.
• 8. Mũndũ ũrĩa mũũgĩ-rĩ, akĩrĩte kĩrimũ na kĩ? O na kana mũndũ ũrĩa mũkĩa ũmenyaga gwĩtwara wega mbere ya arĩa me muoyo?
• 9. Nĩ kaba gũcũthĩrĩria kĩrĩa gĩkuoneka gũkĩra mũcuracurĩko wa merirĩria; o naguo ũndũ ũcio, no wa tũhũ na gwĩthĩnia gũtheri.
• 10. Maũndũ mothe maanagĩa muoyo-rĩ, nĩmaaheirũo marĩĩtwa mamo gwata o tene, nake mũndũ nĩamenyekete ũrĩa atariĩ, atĩ ndangĩhota gũkararania na ũrĩa wĩ hinya kũmũkĩra.
• 11. Na rĩrĩ, kuona atĩ he maũndũ maingĩ matũmaga ndeto cia tũhũ ciongerereke-rĩ, mũndũ agunĩtwo nĩmo na njĩra ĩrĩkũ?
• 12. Nĩ ũndũ-rĩ, nũ ũngĩmenya maũndũ marĩa mũndũ aagĩrĩirũo nĩmo ihinda rĩrĩa e muoyo, o matukũ mothe ma muoyo wake wa tũhũ, marĩa aninaga, magathira o ta kĩĩruru? Ningĩ-rĩ, nũ ũngĩhota kwĩra mũndũ ũrĩa gũgatuĩka thutha wa aarĩkia kwehera gũkũ thĩ kwaraga riũa?

Home