2. Atĩrĩrĩ, handai kĩbebero kĩrĩma-inĩ kĩrĩa gĩtarĩ mĩtĩ: anĩrĩrai acio me hakuhĩ na mĩgambo mĩnene mũkĩmahenagĩria na moko, nĩguo matonye ihingo-inĩ cia arĩa me igweta.
4. Ta thikĩrĩriai mũigue inegene rĩa kĩrĩndĩ kĩingĩ irĩma-inĩ igũrũ, o ta harĩ andũ aingĩ mũno! Iguai inegene rĩa ngũĩ, ta arĩ ndũrĩrĩ iria ithamakagĩrũo nĩ athamaki icokanĩrĩire hamwe! Nĩ Jehova Mũnene wa Ita ũronganithia itungati ciake nĩ ũndũ wa ita.
5. Andũ acio maroka harĩ we moimĩte bũrũri wĩ kũraya, makoima o ituri-inĩ cia kũrĩa igũrũ rĩaturĩra; ĩĩ, ti-itherũ, nĩ Jehova ũroka na indo ciake cia mbaara cia mathũgũta make, nĩguo anine thĩ yothe.
6.
Ta rĩrai na kĩgi, nĩ gũkorũo mũthenya wa Jehova nĩũkuhĩhĩirie; naguo ũgoka ta arĩ ũninani uumĩte he Mwene-Hinya-Wothe.
7. Tondũ ũcio moko mothe nĩmakaregera, na ngoro cia andũ othe iringĩke,
8. na matuĩke nda, ningĩ magwatwo nĩ ruo na kĩeha; makagwatwo nĩ ruo o ta rũa mũndũ-wa-nja akĩrũmwo, o mũndũ wao agegio nĩ ũrĩa ũngĩ, namo mothiũ mao mahaane ta nĩnĩmbĩ cia mwaki.
9. Atĩrĩrĩ, mũthenya ũcio wa Jehova nĩũroka, na gũtikaiguanĩrũo tha; no nĩgũkagĩwo na matũkũya na marakara meĩ mũno, namo matũme thĩ ĩkire ihooru, na manine ehia ayo biũ mamĩehere.
10. Nĩ gũkorũo o kũu igũrũ njata cia ndũire o na iria ihenahenagia irĩ gĩtutu, itigacoka kwara na ũtheri wacio. Riũa narĩo-rĩ, nĩ nduma rĩgekĩrũo rĩkĩratha, o naguo mweri ndũkarehanĩre ũtheri waguo.
11. Nĩ kũhũra ngahũra thĩ nĩ ũndũ wa ũũru wayo, nao andũ arĩa aaganu ndĩmaherithie nĩ ũndũ wa waganu wao, naruo rũng’athio rũa andũ arĩa etĩi nĩngarũnina, o naguo mwĩĩkĩrĩro wa arĩa me itua-nda ndĩũnyihie.
12. Na nĩngatũma andũ a gũkũ thĩ magĩe bata gũkĩra thahabu ĩrĩa therie mũno, ĩĩ, ti-itherũ makĩre o na thahabu ĩrĩa theru mũno ya Ofiri.
13. Tondũ ũcio nĩngatũma igũrũ rĩinaine, o nayo thĩ ĩthingithio yeherio handũ hayo, nĩ ũndũ wa matũkũya ma Jehova Mũnene wa Ita, mũthenya ũrĩa marakara make magakorũo me meĩ mũno.
14. Na nĩgũgakinya atĩrĩ, atĩ o ta ũrĩa thwariga ĩrĩa ĩkũguĩmwo, o na mbũri iria itarĩ na mũcokereria, ciũraga-rĩ, ũguo noguo andũ acio makagarũrũka, mũndũ o mũndũ acoke kũrĩ andũ ao kĩũmbe, na mũndũ o mũndũ ore acoke bũrũri wao kĩũmbe.
15. Nake mũndũ o wothe ũrĩa ũgakorererũo nĩagathecwo oimĩranio; ningĩ mũndũ o wothe ũrĩa ũkagwatwo mũgwate nĩakoragwo na rũhiũ rũa njora.
16. Twana twao o natuo tũkabacanio na thĩ makĩĩonagĩra na maitho mao, na indo cia nyũmba ciao itahwo, na atumia ao magwatwo na hinya.
17. Atĩrĩrĩ, nĩ Amedi ngaarahũra mamokĩrĩre, nao matikarũmbũiya betha, kana makenio nĩ thahabu o na atĩa.
18. Arathani ao arĩa matungaga mota nĩo makoraga aanake ao, na matigacaĩra maciaro ma nda, kana maitho mao maiguĩre twana tha.
19. Itũũra rĩa Babuloni rĩrĩa rĩrĩ riri gũkĩra kũndũ kũrĩa kũngĩ guothe gũthamakagwo nĩ athamaki, o rĩu rĩtũmaga Akalidei metĩe nĩ ũndũ wa ũthaka warĩo-rĩ, rĩgekwo maũndũ matariĩ o ta marĩa mekirũo Sodomu na Gomora rĩrĩa Ngai aamang’aũranirie.
20. Itũũra rĩu rĩtigacoka gũtũũrũo o na rĩ, kana rĩikarũo nĩ andũ nginya njiarũa na njiarũa, o na kana Aarabu maambe hema ciao kuo, kana arĩithi maraarie ndũru ciao cia ũhiũ kuo.
21. No rĩrĩ, nyamũ cia werũ nĩcio ikaraaraga kuo, na nyũmba ciao ciiyũrũo nĩ nyamũ iria igambaga mũgambĩre mũũru, na nyaga itũũrage kuo, na nokuo marimũ marĩa mahaana thenge magatũhaga.
22. Njũi nĩcio ikagambagĩra nyũmba ciao iria nene, na mbwe igambagĩre nyũmba cia athamaki akuo iria ciakenagia maitho. Na rĩrĩ, ihinda rĩa ituĩro rĩu rĩarĩo rĩtigairie hanini rĩkinye, na matukũ marĩo matikaraihĩrĩrio.