2. Arĩriai itũũra rĩa Jerusalemu maũndũ ma kũrĩhoreria ngoro; anĩrĩrai mũrĩĩre atĩrĩ, atĩ mbaara ĩrĩa rĩrarĩ nayo nĩyathira, o na atĩ waganu warĩo nĩwohanĩrũo; o na ningĩ atĩ nĩrĩhũrĩtwo na guoko kwa Jehova rĩgacokerithio maita merĩ nĩ ũndũ wa mehia marĩo mothe.
3.
He mũgambo wa mũndũ ũkwanĩrĩra, akoiga atĩrĩ, Thondekai njĩra ya Jehova o kũu werũ-inĩ; araganĩriai Ngai witũ njĩra ya gĩtwari o kũu rũng’ũrĩ-inĩ.
4. Ihũhi ciothe nĩigathikwo ciambatĩre, o nacio irĩma ciothe, o na ithũngũri ciothe, inyihio ciaraganio; o nakuo kũrĩa kuogomu kũrũngario, nakuo kũrĩa gũtarĩ kwaraganu kwaraganio wega.
5. Naguo riri wa Jehova nĩũkaguũranĩrio, nao andũ othe a gũkũ thĩ mawonanĩre me hamwe, nĩ gũkorũo nĩ kanua ka Jehova kaarĩtie ndeto icio.
6.
He mũgambo wa mũndũ ũkuuga atĩrĩ, Anĩrĩra. Nake ũngĩ agacokia atĩrĩ, Ngwanĩrĩra njuge atĩa? Uga atĩrĩ, Andũ othe mahaana ta nyeki, o naguo ũthaka wao wothe ũtariĩ o ta wa mahũa ma gĩthaka.
7. Nyeki ĩo nĩyũmaga, o namo mahũa macio makahoha, nĩ gũkorũo mĩhũmũ ya Jehova nĩĩmahũmũkĩire; ti-itherũ andũ mahaana o ta nyeki.
8. Nyeki nĩyũmaga, o namo mahũa makahoha; no rĩrĩ, kiugo kĩa Ngai witũ gĩgatũũra tene na tene.
9. Atĩrĩrĩ, wee ũheaga Zayuni ũhoro ũrĩa mwega-rĩ, ta haica kĩrĩma kĩrĩa kĩraya igũrũ; wee ũheaga Jerusalemu ũhoro mwega-rĩ, ta haicia kayũ gaku na igũrũ na hinya mũno; ta gĩkahaicie o na igũrũ na ũtige gwĩtigĩra; ĩra matũũra ma Juda atĩrĩ, Ũyũ nĩwe Ngai wanyu!
10.
Atĩrĩrĩ, Mwathani Jehova agoka o ta njamba ĩrĩ hinya mũno, na guoko gwake nĩkuo gũkamwathanagĩra; atĩrĩrĩ, ũtungati wake e naguo, o na irĩhanĩria rĩake rĩrĩ o mbere yake.
11.
Mbũri cia rũũru rũake agarĩithagia o ta mũrĩithi, natuo tũgondu atuoyage na moko make, atũkuuage tũrĩ gĩthũri-inĩ gĩake; nacio ng’ondu iria ikuongithia acitwarage o kahora.
12. Atĩrĩrĩ, nũ ũrĩ wathima maĩ ma kũndũ guothe na rũhĩ rũake, kana akĩgera matu na kũmathima marata, kana akĩoya tĩri wa thĩ akĩwĩkĩra kĩbaba-inĩ gĩa kũũthima, kana irĩma ciothe cia thĩ agĩcithima na ratiri, kana o nacio ithũngũri agĩcithima na gĩthimi?
13.
Roho wa Jehova-rĩ, nũ wamwonereirie maũndũ, kana akĩruta Jehova maũndũ nĩ ũndũ wa ũrĩa arĩ mũmũhei kĩrĩra?
14. Ũcio-rĩ, nũ aahoire kĩrĩra, na ningĩ nũ wamũmenyithirie maũndũ, o na akĩmũruta gũthiĩ na njĩra cia gũtua cira na kĩhooto, na akĩmũruta maũndũ ma uũgĩ, o na akĩmuonia ũrĩa angĩhota gũkuũkĩrũo nĩ maũndũ?
15. Atĩrĩrĩ, ndũrĩrĩ ihaana o ta gataata ka maĩ karĩ ndoo-inĩ, nacio cionagwo ihaana o ta karũkũngũ kanini karĩa gatigĩtwo ratiri-inĩ. Atĩrĩrĩ, ithama cia gũkũ thĩ-rĩ, acioyaga na igũrũ o ta irĩ kĩndũ gĩtarĩ coho.
16. Kĩrĩti kĩa Lebanoni gĩtimũiganĩte gĩa gũtuĩka ngũ cia gũcinwo, o na kana nyamũ ciakuo ikaigana cia kũmũrutĩra mahaki ma njino.
17. Ndũrĩrĩ ciothe ikĩonwo nĩwe-rĩ, acionaga ihaana o ta kĩndũ hatarĩ, o na agaciona o ta itarĩ kĩene, o na ta irĩ cia tũhũ mũtheri.
18.
Atĩrĩrĩ, Mũrungu-rĩ, mũgakĩmũhianania na ũ? Kana nĩ mũhianĩre ũrĩkũ mũgakĩmũgerekania naguo?
19. Mĩhinano ya gwacũhio-rĩ, mũturi nĩwe wambaga kũmĩtura, nake mũturi wa thahabu agacoka akamĩhumba igũrũ guothe na thahabu, ningĩ akamĩgathĩkĩra irengeri cia betha.
20. Na rĩrĩ, mũthĩni ũrĩa ũtangĩona kĩndũ ta kĩu gĩa kũruta-rĩ, ethuragĩra mũtĩ wa mũthemba ũrĩa ũtangĩbutha, agacoka agecarĩria mwai mũũgĩ nĩ getha amwaĩre mũhianano wa gwacũhio wa gũtũũra ũrũmĩte wega.
21. Anga mũtirĩ mwamenya, o na kana mũkaigua ũhoro? Githĩ mũtiaheirũo ũhoro gwata o kĩambĩrĩria? Anga mũtikĩrĩ mwamenyithio wega gwata o hĩndĩ ĩrĩa thĩ yombirũo?
22. Ũyũ nĩwe ũikaraga igũrũ rĩa thĩ ĩno o gacũmbĩrĩ-inĩ ga gĩthiũrũrĩ kĩa harĩa matu mayo maaturĩra, o nao andũ arĩa mamĩtũũraga-rĩ, makonagwo nĩwe matariĩ o ta ndaahi; na ningĩ ũyũ nĩwe ũtambũrũkagia matu marĩa mairũ o ta marĩ gĩtama gĩa kũhumba handũ, o na akamatambũrũkia o ta marĩ hema ya gũtũũrũo;
23. ningĩ nĩwe ũtũmaga anene matuĩke kĩndũ hatarĩ, nao aciri a gũkũ thĩ akamatua o ta marĩ a tũhũ mũtheri.
24. Ti-itherũ acio ti ahande; ti-itherũ mbeũ ciao itihurĩtwo; ti-itherũ itina ciao itiikũrũkĩtie mĩri na thĩ; ningĩ aamahũmũkĩra mĩhũmũ yake-rĩ, nĩ kũũma momaga, nakĩo kĩhuhũkanio kĩa rũhuho gĩkamahuruta o ta maragara ma mahuti.
26. Ta tiirai maitho manyu na igũrũ mũmenye ũrĩa warĩũmbire, o we ũcio uumagaragia mbũtũ ciarĩo agĩcitaraga; icio ciothe-rĩ, aciĩtaga marĩĩtwa ma cio o ĩmwe ĩmwe mwanya; tondũ wa ũrĩa hinya wake ũnenehete mũno, o na ũndũ wa ũrĩa ũhoti wake wĩ na hinya, gũtirĩ o na ĩmwe yacio yagaga gũkorũo ho.
27. Nĩ kĩ gĩgũtũma wee Jakubu warie ũhoro, o nawe Isiraeli uuge ũũ: Atĩrĩrĩ, mĩthiĩre yakwa nĩĩhithĩtwo Jehova, o naguo ũhoro wakwa wa gũtuĩrũo cira wa kĩhooto-rĩ, ndũrũmbũyagio nĩ Ngai wakwa?
28. Anga wee ndũrĩ wamenya, o na kana ũkĩigua, atĩ Ngai ũrĩa ũtũũraga tene na tene, Jehova, o we ũrĩa wombire ituri ciothe cia thĩ, ndoragwo nĩ hinya, o na kana akanoga? Ũhoro wake wa ũrĩa amenyaga maũndũ ndũngĩtuĩrĩka.
30. Aanake o nao nĩmakorũo nĩ hinya na manoge, o nao andũ arĩa matarĩ akũrũ nĩ kũhĩngwo makahĩngwo mũno.
31. No rĩrĩ, andũ arĩa mehokete Jehova nĩo magacokererũo nĩ hinya wao ũrĩa morĩtwo nĩguo. Makombũka na igũrũ na mathagu o ta nderi, na mateng’ere, na matinoge; o na ningĩ magetwaraga o ro ũguo na magũrũ, na matiũrũo nĩ hinya o na atĩa.