1. Atĩrĩrĩ, inyuĩ mũrũmagĩrĩra maũndũ ma ũthingu, ta ’thikĩrĩriai, o inyuĩ mũcaragia Jehova. Ta rongoriai kĩhumo kĩanyu, o ũrĩa mwombirũo ta mwacũhĩtio rũaro-inĩ rũa ihiga, o na mũkenjwo mũthima-inĩ wamo.
2. Ta rongoriai ithe wanyu Iburahimu, o na Sara ũrĩa wamũciarire inyuothe; nĩ gũkorũo hĩndĩ ĩrĩa aarĩ o wiki nĩguo ndamwĩtire, na ngĩmũrathima, ngĩgĩtũma aingĩhe.
3. Nĩ gũkorũo Jehova nĩahoreretie Zayuni, o na akahoreria kũndũ gwakuo guothe kũrĩa kwanangĩtwo, o naguo werũ wakuo wothe akaũtua o ta Edeni, o naruo rũng’ũrĩ rũakuo ruothe akarũtua o ta mũgũnda wa Jehova; nakuo kũu guothe gũkaiyũra gĩkeno o na gũcanjamũka ngoro, na gũtũũre gũcokanagĩrio ngatho o gũkĩinagwo nyĩmbo.
6. Tiirai maitho manyu na kũu matu-inĩ, mũcoke mũcũthĩrĩrie thĩ ĩrĩa yaraganĩte mũhuro wamo; nĩ gũkorũo igũrũ nĩrĩgathira biũ o ta ndogo, o nayo thĩ ĩkũre o ta nguo, o nao andũ arĩa mamĩtũũraga makue o ro ũguo; no rĩrĩ, ũhoro wakwa wa kũhonokania nĩũgũtũũra wonekaga kuo tene na tene, o naguo ũhoro wakwa wa ũthingu ndũrĩ hingo ũkaninwo.
7. Ta ’thikĩrĩriai, inyuĩ mũũĩ ũhoro wa ũthingu, o inyuĩ mũrũmĩtie watho wakwa na ngoro cianyu; tigai gwĩtigĩra kũmenwo nĩ andũ, o na kana mũmakio nĩ irumi iria mamũrumaga.
8. Nĩ gũkorũo nĩmakarĩĩka nĩ memenyi maninwo biũ o ta nguo, na marĩĩke nĩ tũgunyũ o ta marĩ guoya wa ng’ondu; no rĩrĩ, ũhoro wakwa wa ũthingu ũgũtũũra tene na tene, o naguo ũhoro wakwa wa kũhonokania wonekage kinya njiaro-inĩ ciothe.
9. Ũkĩra wĩambararie, wee guoko kwa Jehova; ũkĩra wĩĩkĩre hinya, wĩambararie o ta ũrĩa weambararirie matukũ marĩa ma tene o tene, o hĩndĩ ya njiaro cia mĩndĩ na mĩndĩ. Atĩrĩrĩ, githĩ wee tiwe ũrĩa watinangirie Rahabu tũcunjĩ, o we ũrĩa wathecangire ndamathia?
11. Nao andũ a Jehova arĩa makũũrĩtwo nĩmakahũndũrũo, makinye Zayuni makĩinaga; magatũũra makenete, ta mekĩrĩtwo thũmbĩ ya gĩkeno ĩtagathira, na macanjamũke ngoro o magĩkenaga wega, nakĩo kĩeha o na mũcayo nĩikora biũ.
12. Niĩ-rĩ, nĩ niĩ ũrĩa ũkũhoragĩria. Wee nĩwe ũ, atĩ nĩkĩo wĩtigagĩra mũndũ ũrĩa ũgũkua, na ũgetigĩra mũrũ wa mũndũ wa gũkũ thĩ ũrĩa ũgatuwo o ta nyeki;
13. nawe ũkariganĩrũo nĩ Jehova ũrĩa wakũũmbire, o we ũrĩa watambũrũkirie matu-mairũ, o na akĩhanda gĩtina kĩrĩa kĩrũmu gĩa thĩ; na ũgatindaga hingo ciothe wĩtigĩrĩte marakara ma mũhinyanĩrĩria hĩndĩ ĩrĩa ekwĩhaarĩria aninane? Namo marakara ma ũcio mũhinyanĩrĩria-rĩ, me bata wa kĩ?
14. Mũndũ ũrĩa wohetwo na akarindũrũo nĩakohorũo narua mũno, nake ndagakua aharũrũke Kwa Ngoma, o na kana irio ciake ciage.
15. Nĩ gũkorũo niĩ nĩ niĩ Jehova Ngai waku, ũrĩa ũtũmaga iria rĩikie ndihũ o nginya makũmbĩ ma maĩ makaruruma; Jehova Mũnene wa Ita nĩrĩo rĩĩtwa rĩake.
16. Naguo ũhoro wakwa nĩndĩwĩkĩrĩte kanua gaku, ngakũhumbĩra na kĩĩruru gĩa guoko gwakwa, o niĩ ndatambũrũkirie matu-mairũ, na ngĩhanda gĩtina kĩrĩa kĩrũmu gĩa thĩ, o niĩ ngwĩra andũ a Zayuni atĩrĩ, Inyuĩ nĩ inyuĩ andũ akwa.
17.
Atĩrĩrĩ, wee Jerusalemu, hindũka uumĩre, ũrũgame na igũrũ, wee ũnyuithĩtio gĩkombe kĩiyũrĩte matũkũya ma Jehova, ũnengereirio nĩ guoko gwake we mwene, na ũkanyuĩra mbakũri ya gũtũma ũtũgũge, na ũkamĩinĩkĩrĩra.
18. Thĩinĩ wa ariũ ake othe arĩa aciarĩte-rĩ, hatirĩ o na ũmwe wa kũmũtongoria; o na ningĩ thĩinĩ wa ariũ ake othe arĩa arerete-rĩ, hatirĩ o na ũmwe wa kũmũnyita guoko.
19. Maũndũ maya merĩ nĩmo magũkorereire; nũ ũgagĩkũrĩrĩra? Namo maũndũ macio nĩmo maya - nĩ gũtigwo ũtigĩtwo ũkirĩte ĩhooru na ũkaninũkio, ningĩ ũgakorũo nĩ ng’aragu, o na ũkaninwo na rũhiũ rũa njora; kaĩ niĩ ngagĩkũhoreria atĩa?
20. Ariũ aku nĩmaringĩkĩte, na makagũa thĩ macemanĩrio-inĩ ma njĩra iria njariĩ o ta thwariga ĩnyitĩtwo na mũtego; nĩmarĩĩtwo nĩ matũkũya ma Jehova, na makahubwo nĩ ngũmano ya Ngai waku.
21. Tondũ ũcio igua ũhoro ũyũ, wee ũnyarirĩtwo, na ũkarĩwo, no ti ndibei ĩkũrĩĩte:
22. Jehova, Mwathani waku, o we Ngai waku ũrĩa ũciragĩrĩra andũ ake, ekuuga ũũ: Atĩrĩrĩ, nĩndĩkĩtie gũkwehereria gĩkombe kĩu gĩtũmĩte ũtũgũge, ngakĩruta guoko-inĩ gwaku, o na ngakwehereria mbakũri ĩrĩa ĩiyũrĩte matũkũya makwa; nawe ndũgacoka kũmĩnyuĩra rĩngĩ o na rĩ:
23. na nĩngacoka ndĩmĩĩkĩre moko-inĩ ma andũ arĩa makũnyariraga wee, arĩa makwĩrĩte atĩrĩ, Inamĩrĩra thĩ nĩ getha tũkũgere igũrũ; nawe ũgakoma mũkurumuthu waku ũtuĩke o ta thĩ, o na ũtuĩke o ta njĩra harĩ andũ acio makũgeraga igũrũ.