Go Back

Isaia Chapter 64

• 1. Atĩrĩrĩ, na arĩ korũo watarũranga matu, nĩguo ũikũrũke gũkũ thĩ, nĩ getha ithuuri ithingithe waikara harĩ cio,
• 2. o ta hĩndĩ ĩrĩa mwaki ũmundagia gĩthaka kĩũmũ, na ũgatũma maĩ matherũke, nĩ getha ũtũme rĩĩtwa rĩaku rĩmenyeke nĩ thũ ciaku, nacio ndũrĩrĩ ciinainage nĩ ũndũ wa ũrĩa wĩ harĩ cio!
• 3. Hĩndĩ ĩrĩa wekire maũndũ ma kũmakania tũtamatanyĩte-rĩ, nĩguo waikũrũkire gũkũ thĩ, nacio ithuuri igĩthingitha nĩ ũndũ wa ũrĩa wĩ harĩ cio.
• 4. Nĩ gũkorũo kuuma tene o tene, andũ matirĩ maaigua maũndũ ta macio, na gũtirĩ gũtũ kũrĩ kwaigua ũguo, o na kana riitho rĩkĩĩonera Ngai ũhaana tawe, wee ũgunaga andũ arĩa maikaraga magũcũthĩrĩirie.
• 5. Wee ũkoragia ũtugi waku mũndũ o wothe ũrĩa wĩkaga maũndũ ma ũthingu akenete, o arĩa maririkanaga kũhingia maathani maku. Atĩrĩrĩ, wee nĩwarakarĩte, na ithuĩ tũgĩkĩrĩrĩria kwĩhia, tũgĩgĩikara mehia-inĩ maitũ ihinda iraya; na githĩ nĩtũgakĩhonokio?
• 6. Nĩ gũkorũo ithuothe nĩtũtuĩkĩte o ta mũndũ wĩ na thahu, o naguo ũthingu witũ wothe ũtariĩ o ta nguo thũku mũno; na ithuĩ ithuothe tũrahoherera o ta ithangũ, namo mahĩtia maitũ magatũhuruta o ta ũrĩa rũhuho rũhurutaga maragara.
• 7. Na gũtirĩ mũndũ o na ũmwe ũkayagĩra rĩĩtwa rĩaku, o na kana ũkwĩhĩka anyitane nawe; nĩ gũkorũo wee nĩũtũhithĩte ũthiũ waku, na ũgatũng’ũria nĩ ũndũ wa mahĩtia maitũ.
• 8. No rĩrĩ, wee Jehova, nĩwe ithe witũ; ithuĩ twĩ rĩũmba, nawe nĩwe mũtũũmbi, na ithuothe tũrĩ wĩra wa moko maku.
• 9. Tiga kũgĩa na matũkũya marũrũ mũno, wee Jehova, o na kana ũtũũre ũririkanaga mehia tene na tene. Atĩrĩrĩ, ta rora, twagũthaitha, wone atĩ tũrĩ andũ aku ithuothe.
• 10. Matũũra maku marĩa maamũre maanatuĩka werũ, o narĩo Zayuni rĩgatuĩka werũ, Jerusalemu rĩgagĩkira ihooru.
• 11. Nyũmba iitũ ĩrĩa thaka nyamũre, o kũndũ kũrĩa maithe maitũ maakũgoocagĩra, nĩ njine na mwaki, o nacio indo ciitũ ciothe iria cia kwendeka nĩcianangĩtwo.
• 12. Rĩu-rĩ, Jehova, anga nĩũkwĩgirĩrĩria gũtũteithia kũhaanĩte ũũ, na wĩkirĩre o ro ũguo ki, ũgĩtũnyarire ũrũrĩte mũno?

Home