1. Inyuĩ andũ a nyũmba ya Isiraeli, ta thikĩrĩriai mũigue ũhoro ũrĩa Jehova ekũmwĩra.
2. Jehova ekuuga ũũ: Tigai kwĩmenyeria mĩthiĩre ya ndũrĩrĩ iria ingĩ, o na kana mũhũthĩre kũragũria njata cia igũrũ, mũgegeario nĩcio, nĩ gũkorũo andũ a ndũrĩrĩ icio nĩo matũũraga magegearĩtio nĩcio;
3. nĩ ũndũ irĩra cia andũ a cio no cia tũhũ. Amu gũtemagwo mũtĩ mũtitũ, ũgacoka kũrutĩrũo wĩra nĩ mũndũ, akawacũhia na ithanwa rĩrĩa agwete na guoko gwake.
4. Thutha wa ũguo makaũgemia na betha o na thahabu; magacoka makoya nyondo, makaũhũrĩrĩra na mĩcumarĩ nĩguo maũrũmie, nĩ getha ndũkae kwenyenya.
5. Mĩhianano ĩo-rĩ, ĩtariĩ o ta kĩbuuri kĩrĩa gĩthecereirũo mũtĩ mũgũnda, na gĩtingĩaria; ningĩ no mũhaka ĩkuuwo, nĩ ũndũ ndĩngĩhota gwĩtwara. Menya ũmĩĩtigĩre, nĩ ũndũ ndingĩhota gwĩka ũũru, o na kana ĩkagĩa na hinya wa gwĩka wega.
7.
Nũ ũtangĩgĩgwĩtigĩra, wee Mũthamaki wa ndũrĩrĩ? Amu nowe wagĩrĩire gwĩtigĩrũo, kuona atĩ thĩinĩ wa andũ othe arĩa ogĩ a ndũrĩrĩ, o na maũndũ-inĩ mao mothe marĩa makonainie na ũthamaki, hatirĩ o na ũmwe wao ũhaanaine nawe.
8. No rĩrĩ, othe hamwe nĩ akĩgu, na magatwarĩrĩrio nĩ thuti ta marĩ nyamũ; naguo ũtaarani wa mĩhianano no ta wa mũtĩ ta mĩhianano ĩo yo mĩene.
9. Ĩgemetio na betha ĩhũrahũrĩtwo ĩgatuĩka ta ithuma, nayo ĩrutĩtwo Tarishishi, ningĩ ĩkagemio na thahabu ĩrutĩtwo Ufazu; nayo nĩ ya wĩra wa aai-mĩtĩ, o na ĩkarutĩrũo wĩra na moko ma aturi-thahabu; ningĩ ĩkahumbwo nguo cia rangi wa bururu na wa zambarau, nacio ikoragwo itumĩtwo nĩ andũ arĩa ohĩgĩrĩru wĩra ũcio.
10. No Jehova nĩwe Ngai ũrĩa wa ma; ningĩ nĩwe Ngai ũrĩa wĩ muoyo, o na mũthamaki ũrĩa ũtũũraga tene na tene; thĩ ĩthingithaga nĩ ũndũ wa matũkũya make, nacio ndũrĩrĩ itingĩĩtiiria mathũgũta make.
12. Jehova nĩwe wombire thĩ na hinya wake, ningĩ nĩ ũũgĩ wake ũtũmaga ĩikare irũmĩte; ningĩ nĩwe watambũrũkirie matu-mairũ na ũtaũku ũrĩa ataũkĩirũo nĩguo.
13. Hĩndĩ ĩrĩa aagũũthũka-rĩ, maĩ marĩa me igũrũ nĩ kũruruma marurumaga, na nĩwe ũtũmaga thaatũ wambate uumĩte ituri-inĩ ciothe cia thĩ, na agathondeka heni cia kũrehanage na mbura, ningĩ nĩwe ũrutaga huho kũndũ gwake kũrĩa acihaĩte.
14. Andũ othe nĩmaagĩte ũmenyo, magatwarĩrĩrio nĩ thuti ta marĩ nyamũ, nao aturi othe a thababu nĩ aconorithie nĩ mĩhianano yao ya gwacũhio; nĩ gũkorũo mĩhianano yao ya gũtwekio nĩ ya maheni matheri, na ndĩrĩ mĩhũmũ ya muoyo thĩinĩ wayo.
15. Mĩhianano ĩo no ya tũhũ, na ndĩngĩĩhokeka o na hanini; nayo hĩndĩ ĩrĩa ĩgaitĩka kũherithio-rĩ, nĩ kũũra ĩkora biũ.
16. No rĩrĩ, ũrĩa wĩgwatĩirũo nĩ Jakubu agatuĩka wake-rĩ, ndatariĩ ũguo, nĩ ũndũ nĩwe mũũmbi wa indo ciothe, naguo mũhĩrĩga wa Isiraeli nĩguo egwatĩire ũtuĩke igai rĩake, nake etagwo Jehova Mũnene wa Ita.
18. Nĩ ũndũ Jehova ekuuga ũũ: Ihinda rĩrĩ nĩrĩo ngũingata andũ arĩa matũũraga bũrũri ũyũ ta maikĩtio na kĩgũtha, na ndĩmanyaririthie, nĩ getha magwatwo nĩ mĩnyamaro.
19. Wũi-ĩiya-wakwa nĩ ũndũ wa itihia rĩrĩa ndĩhĩtio-ĩ! Itihia rĩakwa nĩ rĩũru mũno! No nĩ kuuga njugĩte ũũ: Atĩrĩrĩ, ti-itherũ mathĩna macio no niĩ ndĩĩgĩĩrĩrĩire, na no mũhaka ndĩmakirĩrĩrie.
20. Hema yakwa nĩyanangĩtwo, o nayo mĩhĩndo yayo yothe ĩgatuĩkanga; ciana ciakwa nĩciĩthiĩrĩire ikanjeherera, na rĩu itikĩrĩ ho; hatikĩrĩ mũndũ wa gũcoka kwamba hema yakwa o na rĩ, o na wa kuoherera matama mayo.
21. Nĩ gũkorũo arĩithi o nao nĩmatwarĩrĩirio nĩ thuti ta marĩ nyamũ, na makarega kũrongoria Jehova. Tondũ ũcio maũndũ mao ti magaacĩru, nacio ndũru ciao ciothe cia mbũri nĩ hurunjũku.
22. Atĩrĩrĩ, ta iguai kayũ ka mbu ya atĩ he ngothogotho nene ĩkuuma na kũu bũrũri wa mwena wa gathigathini. Matũũra ma Juda nĩmekwanangĩka makire ihooru, na matuĩke ma gũtũũragwo nĩ mbwe.
23. Atĩrĩrĩ, wee Jehova, nĩnjũĩ atĩ gũtirĩ mũndũ wa gũkũ thĩ ũngĩhota gwĩthondekera mĩthiĩre yake we mwene, o na kana arũngĩrĩrie makinya make njĩra-inĩ ĩrĩa yerekereire.
24. Atĩrĩrĩ, wee Jehova, ’herithia, no ũ’herithie na kĩhooto; ndũkandũithie na marakara maku, nĩ getha hihi ndũka’ninũkie.
25. Ndũrĩrĩ iria itakũũĩ-rĩ, reke ikorũo nĩ mang’ũrĩka maku arĩ cio, o hamwe na mbarĩ cia andũ arĩa matakayagĩra rĩĩtwa rĩaku, nĩ ũndũ nĩmahukĩtie Jakubu; ĩĩ, nĩmamũhukĩtie, makamũninũkia biũ, o naguo ũtũũro wake makawananga biũ.