Go Back

Jeremia Chapter 11

• 1. ĨNO NĨYO ndũmĩrĩri ĩrĩa yakinyĩrĩire Jeremia yumĩte he Jehova, akĩĩrũo atĩrĩ,
• 2. Ta thikĩrĩriai mohoro ma kĩrĩkanĩro gĩkĩ, mũcoke mũhe andũ a Juda, o na andũ arĩa matũũraga Jerusalemu, ũhoro wamo.
• 3. Mere ũũ: Atĩrĩrĩ, Jehova Ngai wa Isiraeli ekuuga atĩrĩ, Kũgwatwo nĩ kĩrumi-rĩ, nĩ mũndũ ũrĩa ũtaiguaga mohoro ma kĩrĩkanĩro gĩkĩ,
• 4. o gĩkĩ ndarĩkanĩire na maithe manyu mũthenya ũrĩa ndamarutire bũrũri wa Misiri, o kũu kwahaanaga ta mwaki wa gũtwekia igera, ngiuga atĩrĩ, Athĩkagĩrai uuge wakwa, na mwĩkage o ta ũrĩa maũndũ mothe matariĩ marĩa ndĩrĩmwathaga, nĩguo mũtuĩke andũ akwa, na niĩ nduĩke Ngai wanyu
• 5. nĩ getha ndũme mwĩhĩtwa ũtũũre ũrũmĩte ũrĩa ndehĩtire ngĩĩra maithe manyu atĩ nĩngamahe bũrũri wĩ bũthi wa iria o na ũũkĩ, o ta ũũ gũtariĩ ũmũthĩ. Hĩndĩ ĩo na niĩ ngĩgĩcokia ũhoro ngiuga atĩrĩ, Ĩĩ, Jehova, kũroekwo o ũguo.
• 6. Nake Jehova akĩnjĩra atĩrĩ, Hunjanĩria mohoro maya mothe ĩnatũũra-inĩ ma Juda, o na ing’aratua-inĩ cia Jerusalemu, uuge atĩrĩ, Thikĩrĩriai mohoro ma kĩrĩkanĩro gĩkĩ, na mũmahingie.
• 7. Nĩ ũndũ ndũire ndaaraga maithe manyu na kĩyo mũno gwata mũthenya ũrĩa ndamarutire bũrũri wa Misiri, o nginya ũmũthĩ, ta arĩ kũroka ndokaga gũũkĩra rũcinĩ tene mũthenya o mũthenya nĩguo ndĩmataare, ngoiga atĩrĩ, Athĩkagĩrai uuge wakwa.
• 8. No matiigana kũwathĩkĩra, o na kana magĩtega matũ, no othe, mũndũ o mũndũ agĩkĩrĩrĩria na gwĩtwaraga ũremi ũrĩa wa ngoro yake njũru. Ũndũ ũcio nĩguo watũmire ndĩmaherithie na mohoro mothe ma kĩrĩkanĩro kĩu, o kĩu ndamaathĩte mahingagie, nao makĩaga gũkĩhingia.
• 9. Ningĩ Jehova akĩnjĩra atĩrĩ, Ndundu ya njũkanĩrĩro nĩyonekete thĩinĩ wa andũ a Juda, o na thĩinĩ wa andũ arĩa matũũraga Jerusalemu.
• 10. Nĩmacokereire mawaganu ma maithe mao, o acio maaregire kũigua ndeto ciakwa, nao merekeire harĩ ngai ingĩ nĩguo macitungatĩre. Ti-itherũ andũ a nyũmba ya Isiraeli, o na a nyũmba ya Juda, nĩmathahĩtie kĩrĩkanĩro gĩakwa kĩrĩa ndarĩkanĩire na maithe mao.
• 11. Tondũ ũcio Jehova ekuuga ũũ: Atĩrĩrĩ, nĩngamarehithĩrie ũũru ũrĩa ũtagathemeka nĩo, nao nĩmakangaĩra, no ndikamaigua.
• 12. Hĩndĩ ĩo andũ a matũũra ma Juda, o na arĩa matũũraga Jerusalemu, nĩmagathiĩ magakaĩre ngai iria macinagĩra ũbumba: no itikamahonokia hĩndĩ ya thĩna wao o na hanini.
• 13. Nĩ ũndũ atĩrĩ, wee Juda, o ta ũrĩa matũũra ma bũrũri waku maingĩhĩte magĩtarũo-rĩ, ũguo noguo ngai ciaku ciingĩhĩte; na ningĩ o ta ũrĩa njĩra cia Jerusalemu ciigana igĩtarũo, ũguo noguo igongona ciigana iria ũhandĩte cia mambura ma ũũra-thoni, o igongona cia gũcinĩra Baali ũbumba.
• 14. Tondũ ũcio tiga kũhoera andũ aya, o na kana wanĩrĩre nĩ ũndũ wao na kĩrĩro kana ihoya; nĩ gũkorũo ndikamaigua hĩndĩ ĩrĩa mekũngaĩra nĩ ũndũ wa mathĩna mao.
• 15. Mwendwa wakwa egũgĩĩka atĩa gwakwa nyũmba, kuona atĩ nĩetĩkĩrĩte kũũmbwo nĩ andũ aingĩ? Anga mĩĩhĩtwa yaku o na nyama iria nyamũre cia kĩgongona-inĩ ciahota gũkũhonokia ũthirũo nĩ waganu waku? Amu hĩndĩ ĩrĩa weka maũndũ maku ma waganu-rĩ, no gũkena ũkenaga.
• 16. Rĩĩtwa rĩrĩa Jehova aagũtuire nĩrĩo rĩrĩ, Mũtamaiyũ mũruru, mwega, wĩ maciaro mega; no rĩu nĩacokete kũũgwatia mwaki hĩndĩ ĩrĩa kwagĩa ngwa nyingĩ, nacio honge ciaguo ciothe ikoinĩkanga.
• 17. Nĩ gũkorũo Jehova ũrĩa wakũhandire nowe ũcokete gũtua atĩ ũgwatwo nĩ kĩrumi, nĩ ũndũ wa ũũru ũrĩa wĩkagwo nĩ andũ a nyũmba ya Isiraeli, o na a nyũmba ya Juda, o ũcio meyendeire gwĩka o ene, magagĩ’thirĩkia mandakarie na ũndũ wa gũcinĩra Baali ũbumba.
• 18. Nake Jehova agĩcoka akĩndaũrĩra ũhoro ũcio wega, na niĩ ngĩũmenya; ningĩ wee ũgĩkĩnyonia ũrĩa ciĩko ciao itariĩ.
• 19. No rĩrĩ, niĩ ndagĩtariĩ ta gatũrũme kahoreri karĩa koimagarĩtio gagathĩnjwo, na ndiamenyete atĩ nĩharĩ ũũru ũcirĩirũo wa kũnjũkĩrĩra, gũkeranwo atĩrĩ, Rekei tũũnũhe mũtĩ ũyũ hamwe na maciaro maguo. Rekei tũmũng’ũrie oime bũrũri wa andũ arĩa marĩ muoyo, nĩ getha rĩĩtwa rĩake rĩtikanacoke kũririkanwo o rĩ, o rĩ.
• 20. No rĩrĩ, wee Jehova Mũnene wa Ita, wee ũciraga cira na kĩhooto, na ũkoiruria maũndũ marĩa mahithe meciria-inĩ o na ngoro-inĩ thĩinĩ, nĩ wega ũndĩhĩrie harĩ o wee mwene, nĩ ũndũ wee nĩwe nyumbũrĩire ũhoro wakwa wothe.
• 21. Tondũ ũcio Jehova nĩ kwaria aarĩtie ũhoro ũkoniĩ andũ a Anathothu arĩa macaragia gũkũruta muoyo, o arĩa moigaga ũũ: Atĩrĩrĩ, wee-rĩ, ndũrĩ hingo ũgacoka kũratha mohoro ũkĩgwetaga rĩĩtwa rĩa Jehova, nĩ getha tũtigakũũrage;
• 22. tondũ ũcio, Jehova Mũnene wa Ita agakiuga ũũ: Atĩrĩrĩ, nĩ kũherithia ngamaherithia; aanake nĩ kũũragwo makoragwo na hiũ cia njora, nao ariũ ao o na airĩtu ao moragwo nĩ ng’aragu.
• 23. Na gũtirĩ o na ũmwe wao ũgatigario, nĩ gũkorũo nĩngarehithĩrie andũ a Anathothu ũũru, o mwaka ũrĩa ũtuĩtwo wa kũmaherithia.

Home