3. Anene akuo nĩmarekagia ngombo ciao igatahe maĩ, nacio ciakinya ithima-inĩ, ikaaga maĩ; nacio igagĩcoka na ndigithũ ciacio cia gũtaha maĩ irĩ theri, igagĩconoka, na ikehumba mĩtwe.
4. Ningĩ acimbi mĩgũnda nĩ aconoku o nao, na makehumba mĩtwe, nĩ ũndũ wa ũrĩa bũrũri watũkangĩte, nĩ gũkorũo gũtirĩ mbura yurĩte bũrũri ũcio.
5. Ĩĩ, ti-itherũ o na thwariga ĩciarĩire werũ-inĩ nĩĩteaga njaũ yayo, nĩ ũndũ wa kwaga nyeki,
6. o nacio njagĩ ikarũgama ithũngũri-inĩ iria ii rũng’ũrĩ, ikĩheehaga ta mbwe, nacio ikora maitho nĩ ũndũ wa kwaga nyeki ya kũrĩa.
7. O na harĩa mawaganu maitũ meyonanĩtie na magatũcirithia-rĩ, wĩrutanĩrie nĩ ũndũ wa rĩĩtwa rĩaku kĩũmbe, wee Jehova, amu makũhutatĩra maitũ nĩ maingĩ mũno, na nĩtũkwĩhĩtie.
8. Atĩrĩrĩ, wee mwĩhoko wa Isiraeli, na mũmahonokia hĩndĩ ĩrĩa maagwatwo nĩ mĩnyamaro, nĩ kĩ gĩtũmĩte ũtuĩke o ta mũgeni bũrũri-inĩ, o na ta mũgendi ũkerũrĩte mũciĩ nĩguo araarĩrĩre kuo?
9. Nĩ kĩ gĩtũmĩte ũikare ta mũndũ mũmaku, ũgagĩtuĩka ta njamba ĩtangĩhota kũhonokania? Githĩ wee Jehova ndũkĩrĩ o thĩinĩ witũ, na ithuĩ tũgetanio na rĩĩtwa rĩaku? Menya ũkanatũtirika.
10. Atĩrĩrĩi, Jehova ekwĩra andũ aya ũũ: Ũguo noguo mendete kũũrũra, na makarega kũgirĩrĩria magũrũ mao; tondũ ũcio Jehova nĩairĩtio ngoro nĩo; na rĩu nĩ hĩndĩ egũkĩririkana waganu wao, amaherithie nĩ ũndũ wa mehia mao.
11. Ningĩ Jehova agĩcoka akĩnjĩra atĩrĩ, Tiga kũhoera andũ aya atĩ nĩguo mone wega.
12. Hĩndĩ ĩrĩa mekwĩhinga kũrĩa irio-rĩ, ndikaigua mũkayo wao, o na hĩndĩ ĩrĩa mekũndutĩra ihaki rĩa njino, o na kana indo iria mahũthĩire kũndutĩra-rĩ, ndikametĩkĩra; no nĩ kũnina ngamaninithia na rũhiũ rũa njora, na ng’aragu, o na mũthiro.
13. Hĩndĩ ĩo ngĩgĩcoka ngiuga atĩrĩ, Wũi, Mwathani Jehova! Rĩu-rĩ, anabii nĩmaramera atĩrĩ, Mũtikona rũhiũ rũa njora, o na kana mũgĩe na ng’aragu; no atĩ nĩũgũtũũra ũmarũmĩirie ũhoro wa atĩ kũndũ gũkũ gũtũũre gwĩ thayũ kũna.
14. Hĩndĩ ĩo Jehova agĩkĩnjĩra atĩrĩ, Anabii acio nĩ ũhoro wa maheni marathaga, makĩgwetaga rĩĩtwa rĩakwa; ndiigana kũmarekia, kana ngĩmahe kĩrĩra, o na kana ngĩmaarĩria; mamũrathagĩra mohoro ma cioneki cia maheni, o na ũragũri wa tũhũ, na maũndũ hatarĩ, o na mathara marĩa mathugundĩte na ngoro ciao o ene.
15. Tondũ ũcio Jehova nĩaarĩtie ũhoro wa anabii acio marathaga mohoro makĩgwetaga rĩĩtwa rĩake, na tiwe wamarekirie, o acio moigaga atĩ rũhiũ rũa njora o na ng’aragu itikoneka bũrũri ũyũ, akoiga atĩrĩ, Anabii acio nĩmakaninwo na rũhiũ rũa njora o na ng’aragu.
16. O nao andũ arĩa marathagĩrũo mohoro nĩ anabii acio-rĩ, magaikio na kũu njĩra-inĩ cia Jerusalemu moragĩtwo nĩ ng’aragu ĩrĩa ĩkagĩa kuo, o na njũragano ya rũhiũ rũa njora; na gũtikoneka wa kũmathika, o ene, kana atumia ao, kana ariũ ao, o na kana airĩtu ao; nĩ ũndũ nĩngatũma macokererũo nĩ waganu wao ũrĩa maaneka.
17. Wee nawe nĩũkamahe ũhoro ũyũ, uuge atĩrĩ, Rekei maitho makwa maite maithori ũtukũ na mũthenya, na matigatuĩkĩrĩre, nĩ gũkorũo mũirĩtu ũrĩa mwarĩ wa andũ akwa nĩ mũhehenjeku agathuthwo ũũru mũno, na agatihio itihia inene.
19. Rĩu-rĩ, anga nĩũregete Juda o kũmũrega? Anga ngoro yaku mĩĩthũũrĩte Zayuni biũ? Nĩ kĩ gĩgĩtũmĩte ũtũhũre, hakaaga kĩhonia? Tũtũire tũcũthĩrĩirie kũgĩe thayũ, no rĩrĩ, hatirĩ wega o na ũrĩkũ wonekaga; o na tũgeterera ihinda rĩa kũhonanio, na no kũgegeara gũtheri kuonekaga.
20. Nĩtũkuumbũra waganu witũ, wee Jehova, o na mehia ma maithe maitũ; nĩ ũndũ nĩtũkwĩhĩtie.
21. Tondũ wa rĩĩtwa rĩaku-rĩ, twagũthaitha ũtige gũtũthũũra, o na kana ũreke gĩtĩ gĩa ũthamaki kĩa riri waku gĩthahio; ririkana kĩrĩkanĩro kĩrĩa warĩkanĩire na ithuĩ, ndũgagĩthũkie.
22. Nĩharĩ ngai o na ĩmwe ya maheni ya andũ arĩa matakũũĩ ĩngĩhota gũtũma mbura yure? O na kana matu mahote kwĩyuria mbura mo mene? Githĩ wee towe ũngĩhota, wee Jehova Ngai witũ? Tondũ ũcio wee nĩwe tũrĩcũthagĩrĩria; nĩ gũkorũo wee nowe wĩkaga maũndũ macio mothe.