1. O NA NINGĨ ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
2. Ndũkanahikĩrie mũka kũndũ gũkũ, o na kana ũgĩe na ihĩĩ kana airĩtu kuo.
3. Nĩ ũndũ-rĩ, Jehova nĩaarĩtie ũhoro wa ihĩĩ o na airĩtu arĩa maciaragĩrũo kũndũ gũkũ, o na akaaria ũhoro wa manyina mao arĩa mamaciaraga, o na ningĩ akaaria ũhoro wa maithe mao arĩa mamaciaragĩra bũrũri ũyũ, akoiga atĩrĩ,
4. Magakua gĩkuũ kĩũru mũno; matikarĩrĩrũo, o na kana mathikwo, no magatuĩka o ta rũrua rũharaganĩtio gũkũ thĩ guothe; nĩ kũninwo makaninwo na rũhiũ rũa njora, o na ng’aragu, nacio ciimba ciao ituĩke nyama cia kũrĩo nĩ nyamũ cia rĩera-inĩ, o na nyamũ cia gĩthaka.
5. Nĩ gũkorũo Jehova ekuuga atĩrĩ, Menye ũtonye mũciĩ ũrĩa wĩ kĩrĩro, o na kana ũrĩranĩre, o na kana ũcakayanĩre; nĩ ũndũ nĩnjehereirie andũ aya ũhoreri wakwa o na maũndũ marĩa ndamekaga ma ũtugi, o na ma kũiguanĩra tha; ũguo nĩguo Jehova ekuuga.
6. Andũ aya othe, o arĩa anene na arĩa anyinyi, magakuĩra bũrũri ũyũ, na matigathikwo, kana andũ mamarĩrĩre, o na kana metihangie mwĩrĩ nĩ ũndũ wao, o na kana metue ihara nĩ ũndũ wao;
7. ningĩ matikenyũrangĩrũo mĩgate he kĩeha, nĩguo mahukũre nĩ ũndũ wa gĩkuũ, o na kana andũ mamanyuithie gĩa kũnyua, nĩguo mamakirie maithori arĩa makuĩrĩirũo nĩ maithe mao, o na kana manyina mao.
8. Ningĩ ndũkanatonye nyũmba ya kũrĩĩrũo gĩathĩ nĩguo atĩ mũikaranie nao, mũrĩe na mũnyue.
9.
Nĩ gũkorũo Jehova Mũnene wa Ita, o we Ngai wa Isiraeli, ekuuga ũũ: Atĩrĩrĩ, nĩ gũtũma ngatũma kũndũ gũkũ gũtige gũcoka kũiguwo mũgambo wa ndũrũhĩ, o na kana gĩkeno, o na kana kũiguwo mũgambo wa mũhikania o na kana wa mũhikio, na inyuĩ nĩmũkeonera maũndũ macio o matukũ-inĩ manyu.
10. Na nĩgũgakinya atĩrĩ, atĩ hĩndĩ ĩrĩa ũkonia andũ aya mohoro macio mothe, nao makũũrie ũũ: Jehova oigĩte atĩ nĩegũtwĩka maũndũ macio mothe manene nĩ ũndũ kĩ? Ningĩ waganu witũ ũkĩrĩ ũrĩkũ? O na kana nĩ ũũru ũrĩkũ twĩkĩte Jehova Ngai witũ?
11. Hĩndĩ ĩo nĩũkamera atĩrĩ, Nĩ ũndũ maithe manyu nĩmaandirikire, (ũguo nĩguo Jehova ekuuga), makĩrũmĩrĩra ngai ingĩ, magĩcitungatĩra, o na magĩciinamĩrĩra magĩcihoya, niĩ na niĩ makĩndirika, na makĩrega kũrũmĩrĩra watho wakwa.
12. O na inyuĩ-rĩ, nĩmwĩkĩte ũũru gũkĩra maithe manyu; nĩ ũndũ inyuothe, mũndũ o mũndũ wanyu nĩatwarĩrĩirio nĩ ũremi wa ũũru wa ngoro yake, mũkaaga kũnjigua.
13. Tondũ wa maũndũ macio nĩngamũrutũrũra muume bũrũri ũyũ, ndĩmũtware bũrũri mũtoĩ, inyuene o na kana maithe manyu; nakuo kũu mũgatũũra mũtungatagĩra ngai ingĩ mũthenya o na ũtukũ; tondũ ndigũcoka kũmwĩka wega.
14. Tondũ ũcio Jehova ekuuga atĩrĩ, Matukũ nĩmagoka marĩa gũtagacoka kwĩhĩtwo gũkiugwo ũũ: O ta ũrĩa Jehova atũũraga muoyo, o we ũrĩa warutire ciana cia Isiraeli bũrũri wa Misiri; no kũrĩĩhĩtagwo atĩrĩ,
15. O ta ũrĩa Jehova atũũraga muoyo, o we ũrĩa warutire ciana cia Isiraeli bũrũri wa mwena wa gathigathini, o na mabũrũri mothe marĩa aacitwarithirie; amu nĩ gũcokia ngacicokia bũrũri wacio ũrĩa ndaheire maithe ma cio.
16. Atĩrĩrĩ, nĩ kũrekania ngarekania gũgetwo ategi ciũngũyũ aingĩ mũno; ũguo nĩguo Jehova ekuuga; nao nĩmagacitega ta irĩ ciũngũyũ; na thutha wa ũguo ndekanie gũgetwo aguĩmi aingĩ mũno, nao maciguĩme irĩma-inĩ ciothe, o na ithũngũri-inĩ ciothe, o na marima-inĩ mothe ma ndwaro cia mahiga.
17. Nĩ gũkorũo maitho makwa mabarĩte mĩthiĩre yacio yothe, na ndĩhithĩtwo nĩ getha ndikamĩone, o na kana waganu wacio ũkahumbwo nĩguo ndige kũwona na maitho makwa.
18. O mbere-rĩ, ngaamba gũciherithia na ũndũ wa gũtũma icokererũo nĩ waganu wacio o na ũũru wacio o ta maita merĩ ma ũrĩa ciĩkĩte cio nyene, nĩ ũndũ nĩithahĩtie bũrũri wakwa na ciimba cia indo ciacio iria irĩ magigi, na ikaiyũria kũndũ gũkũ ndacirathimĩire maũndũ ma cio marĩa ma thahu.
19. Atĩrĩrĩ, Jehova, wee hinya wakwa, o na kĩhingo gĩakwa kĩrĩa kĩrũmu, o nawe handũ hakwa ha kũũrĩra hĩndĩ ya mathĩna, ndũrĩrĩ nĩigoka harĩ wee ciumĩte ituri ciothe cia thĩ, nacio ciuge atĩrĩ, Maithe maitũ matirĩ kĩndũ maagaire tiga o maheni matheri, o na maũndũ ma tũhũ marĩa matarĩ kĩguni.