2. Ũkĩra ũikũrũke ũkinye mũciĩ wa mũũmbi wa nyũngũ, na kũu nĩkuo ngakũiguithĩria ũhoro wakwa.
3. Niĩ na niĩ ngĩgĩikũrũka ngĩthiĩ kwa mũũmbi ũcio, na atĩrĩrĩ, ngĩmũkora akĩruta wĩra na ngari yake ya kũũmba nyũngũ.
4. Na rĩrĩ, hĩndĩ ĩrĩa nyũngũ ĩo ombaga na rĩũmba rĩu yathũkire o ĩkĩũmbwo na guoko gwake-rĩ, agĩgĩcoka agĩthondeka nyũngũ ĩngĩ na rĩũmba o rĩu, o ta ũrĩa mũũmbi ũcio onire yagĩrĩire gũthondekwo.
5. Hĩndĩ ĩo ndũmĩrĩri ya Jehova ĩgĩkĩnginyĩrĩra ngĩũrio ũũ:
6. Atĩrĩrĩ, inyuĩ andũ a nyũmba ya Isiraeli, githĩ ndingĩkĩmwĩka o ta mũũmbi ũcio? Ũguo nĩguo Jehova ekuuga. Atĩrĩrĩ, o ta ũrĩa rĩũmba rĩu rĩonagwo rĩtariĩ rĩĩ guoko-inĩ kwa mũũmbi-rĩ, ũguo noguo na inyuĩ muonagwo mũhaana mwĩ moko-inĩ makwa, inyuĩ andũ a nyũmba ya Isiraeli.
7. O hĩndĩ ĩrĩa yothe ingĩaria ũhoro ũkoniĩ rũrĩrĩ o na rũrĩkũ, o na kana ũkoniĩ kũndũ o na kũrĩkũ kũrĩa gũthamakagwo nĩ mũthamaki, wa kwahũra andũ akuo, na wa kuunangana, o na wa kũninana-rĩ,
8. rũrĩrĩ rũu, o rũu njarĩtie ũhoro waruo, rũngĩkagarũrũka rũtigane na ũũru waruo, niĩ na niĩ nĩngericũkwo ndige gwĩka ũũru ũcio njirĩire kũrũĩka.
9. Ningĩ hĩndĩ ĩrĩa yothe ingĩaria ũhoro ũkoniĩ rũrĩrĩ o na rũrĩkũ, o na kana ũkoniĩ kũndũ o na kũrĩkũ kũrĩa gũthamakagwo nĩ mũthamaki, wa kũrũtiirĩrĩra, o na wa kũũmĩrĩria andũ aruo-rĩ,
10. rũrĩrĩ rũu rũngĩcoka gwĩka maũndũ marĩa nyonaga me moru na rũage kũigua mũgambo wakwa, hĩndĩ ĩo niĩ na niĩ nĩngericũkwo ndige kũrũĩka wega ũcio ndoigire atĩ nĩngarũguna naguo.
11. Tondũ ũcio thiĩ warie na andũ a Juda, o na andũ arĩa matũũraga Jerusalemu, ũmere atĩrĩ, Jehova ekuuga ũũ: Atĩrĩrĩ, nĩndĩramũthugundĩra ũũru na ngeciria ũndũ wa kũmũkoria magothe; nĩ kaba mwĩrire o ro rĩu, mũndũ o mũndũ atigane na mĩthiĩre yake mĩũru, mũcoke mwagĩrie mĩthiĩre yanyu o na ciĩko cianyu.
12. No rĩrĩ, andũ acio moigaga atĩrĩ, O na tũngĩtaarũo atĩa kana atĩa, no tũhũ, nĩ ũndũ tũrĩrũmagĩrĩra o maũndũ marĩa tũcirĩire ithuene, na mũndũ o mũndũ witũ arĩĩtwaragĩrĩria na ũremi wa ũũru wa ngoro yake.
13. Tondũ ũcio Jehova ekuuga atĩrĩ, Ta tuĩriai thĩinĩ wa ndũrĩrĩ iria ingĩ, mũmenye kana kũrĩ kwaiguwo maũndũ ta maya, amu mũirĩtu mwarĩ wa Isiraeli nĩekĩte ũndũ mũthũku mũno.
14. Anga tharunji ya Lebanoni ĩĩ hingo ĩkaaga kuoneka rũaro-inĩ rũa ihiga rũrĩa rũĩ gacũmbĩrĩ-inĩ gakĩo? O na kana maĩ mahehu marĩa mathereraga moimĩte kĩrĩma-inĩ igũrũ mahũe?
15. No andũ akwa nĩmariganĩirũo nĩ niĩ, magacoka gũcinĩra indo cia tũhũ ũbumba, magatiga kũrũmĩrĩra kĩrĩra kĩrĩa kĩa ndũire, makehĩngithia mĩthiĩre-inĩ yao, na magacoka kũgera tũcĩra wa mĩkĩra, tũrĩa tũtarĩ tũtũgũte,
16. nao magatũma bũrũri wao ũtuĩke o ta ũndũ wa kũgegania, o na gũtũũre kuugagwo, Hi-i-i! Na rĩrĩ, o mũndũ ũrĩa ũkũhĩtũkĩra kuo, nĩ kũgega akagega, na athiũrũrie mũtwe.
17. Nĩ kũhurunja ngamahurunja mbere ya thũ ta mahurutĩtwo nĩ rũhuho rũa mwena wa irathĩro; ningĩ ndĩmahutatĩre, na ndimetiirĩre gĩthiithi o na atĩa mũthenya ũrĩa makagwatwo nĩ mũtino.
18. Hĩndĩ ĩo andũ magĩkiuga atĩrĩ, Ũkai tũciranĩre ũrĩa tũgwĩka Jeremia; amu gũtirĩ hĩndĩ tũgatiga kũheo kĩrĩra nĩ athĩnjĩri-Ngai kĩa ũrĩa twagĩrĩirũo nĩ gwĩka, o na tũtaarũo nĩ andũ arĩa ogĩ, o na kana tũteithio nĩ ciugo cia anabii. Ũkai tũmũrũithie na ndeto ciitũ cia kanua, na tũrege gũthikĩrĩria ũndũ o na ũmwe wa ndeto ciake.
19. Ta thikĩrĩria, wee Jehova, ũthikĩrĩrie mũgambo wa andũ acio tũragiana nao.
21. Tondũ ũcio rekereria ciana ciao ciũragwo nĩ ng’aragu, na ũcirekererie ininwo na hiũ cia njora; o nao aka ao ũreke maage ciana na matuĩke a ndigwa; na ũreke andũ ao maninwo nĩ gĩkuũ, o nao aanake ao moragĩrũo na hiũ cia njora ita-inĩ.
22. Kĩrĩro kĩroiguwo kiumĩte nyũmba-inĩ ciao, o hĩndĩ ĩrĩa ũkamatwarithĩria mbũtũ ya athigari ĩmakorerere na kĩguũ, nĩ ũndũ menjete irima nĩguo ma’nyite, na makahitha mĩtego ya kũ’nyita magũrũ.
23. No rĩrĩ, wee Jehova nĩũũĩ cira wao wothe ũrĩa manjiragĩra wa kũnjũraga; tiga kũmohera ũũru wao, o na kana ũhuure mehia mao matige kuonwo nĩwe; no rĩrĩ, marong’aũranio magũe thĩ mbere yaku; kĩmeke ũguo hĩndĩ ĩrĩa ũgũkorũo ũrakarĩte.