1. NINGĨ ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
2. Thiĩ ũkaanĩrĩre na mũgambo mũnene ũkĩiguagwo nĩ andũ a Jerusalemu, uuge atĩrĩ, Jehova ekuuga ũũ: Atĩrĩrĩ, ha ũhoro waku, nĩndirikanaga ũrĩa wanyendete hĩndĩ ĩrĩa warĩ mũnyinyi, o na tũkoimĩrania ngoro nawe hĩndĩ ĩrĩa ndakũhikirie, na ũrĩa wanũmĩrĩire twĩ kũu werũ-inĩ, o kũu bũrũri ũrĩa ũtahandagwo irio.
3. Matukũ macio-rĩ, Isiaeli aaikaraga eamũrĩire Jehova, ta arĩ we maciaro ma mbere ma indo iria aagethire; mũndũ o wothe ũrĩa wa kũmũrĩa-rĩ, nĩaatuĩrĩirũo kũherithio, ũũru ũgĩkĩmũkora; ũguo nĩguo Jehova ekuuga.
4. Rĩu ta gĩthikĩrĩriei ndũmĩrĩri ya Jehova, inyuĩ andũ a nyũmba ya Jakubu, o na inyuĩ a mĩhĩrĩga yothe ya nyũmba ya Isiraeli,
5. Jehova ekũmũũria ũũ: Nĩ maũndũ marĩkũ ma ũcuke ndonirũo namo nĩ maithe manyu, atĩ nĩkĩo maandirikire makĩndaihĩrĩria, na makĩrũmĩrĩra maũndũ ma tũhũ, magĩgĩtuĩka andũ matarĩ kĩene?
6. O matioragia ũũ: Kaĩ Jehova ũrĩa wagĩtũrutire bũrũri wa Misiri akĩrĩ ha? O we ũrĩa watũtongoririe werũ-inĩ, o na agĩtũgeria rũng’ũrĩ-inĩ kũndũ kwĩ iharũrũka, o bũrũri ũtagĩaga mbura, o na wĩ nduma ya gĩkuũ, o bũrũri ũrĩa ũtarĩ mũndũ ũũtuĩkanagia, kana ũgatũũrũo nĩ andũ?
7. Nĩ niĩ ndamũrehire bũrũri ũyũ wĩ bũthi, nĩguo mũrĩage maciaro maguo, o na mwĩgunage na indo iria njega ciaguo; no inyuĩ hĩndĩ ĩrĩa mwaũtonyire-rĩ, nĩ gũthũkia mwathũkirie bũrũri ũyũ wakwa, nakuo gũkũ ũgai-inĩ wakwa-rĩ, mũgĩtũma kũiyũrũo nĩ thahu.
8. Athĩnjĩri-Ngai matiigana kũũria ũũ: Jehova arĩ ha? O na kana andũ arĩa marũmagia watho makĩ’menya. O nao arĩithi a andũ akwa makĩagarara watho wakwa, nao anabii makĩratha mohoro makĩgwetaga Baali, na makĩrũmĩrĩra maũndũ marĩa matarĩ kĩguni.
9. Tondũ ũcio Jehova ekuuga atĩrĩ, Ngũtũũra ndĩmũrũithagia, o na ngarũithia ciana iria cia ciana cianyu.
10. Atĩrĩrĩ, ta thiĩi bũrũri wa Kitimu mwĩonere ũhoro waguo; na mũcoke mũtũmane bũrũri wa Kedari mũhũnge ndeto, mũrore kana kũrĩ kwoneka ũndũ ta ũcio.
11. He na rũrĩrĩ rũrĩ rũatirika ngai ciaruo o na rĩ rũkĩgarũrũkĩra ngai ingĩ, o na harĩa ngai icio ciaruo itaarĩ kĩene? No rĩrĩ, andũ akwa nĩmatirikĩte Riri wao, makarũmĩrĩra maũndũ ma tũhũ matarĩ kĩguni.
13. Nĩ gũkorũo andũ akwa nĩmekĩte maũndũ merĩ moru; nĩ gũtirika mandirikĩte, o niĩ gĩthima kĩa maĩ ma muoyo, magacoka makeyenjera marima mangĩ ma maĩ, na nĩ marima mamethũkangu ta arĩ hingĩrĩrio cia maĩ methondekeire, o iria itangĩgirĩrĩria maĩ.
14. Rĩu-rĩ, anga Isiraeli nĩ ndungata, o na kana agaciarĩrũo ũkombo-inĩ, atĩ nĩkĩo angĩtuĩka wa ndaho?
15. Araramĩirũo nĩ ngatia nyanake-ĩ, ikamũtharumĩra mũno, o na igatũma bũrũri wake wanangĩke, namo matũũra make macinwo na mwaki, magatigwo o ũguo ũtheri matarĩ mũndũ ũmatũũrĩte.
16. Ningĩ ciana cia Nofu na Tahapanahesu nĩigũtihĩtie igagwĩkĩra rũhara ruototia-inĩ rũa mũtwe.
17. Rĩu-rĩ, githĩ ũndũ ũcio ndũwĩrehereire we mwene nĩ ũndũ wa ũrĩa watirikire Jehova Ngai waku, hĩndĩ ĩrĩa aagũtongoragia na njĩra ĩrĩa wageraga?
18. Ningĩ-rĩ, nĩ kĩ kĩratũma werekere Misiri, ũkanyue maĩ ma rũũĩ rũa Nili? O na werekere Ashuri, ũkanyue maĩ ma rũũĩ rũa Farati?
19. Waganu waku wee mwene nĩguo ũgakũherithia, na ũrũithio nĩ maũndũ maku ma ũrĩa ũ’hutatĩire. Tondũ ũcio menya na wone atĩ ũhoro waku wa ũrĩa ũtirikĩte Mwathani waku Jehova nĩ ũndũ mũũru mũno na nĩ mũthũku mũno, o na ũhoro wa ũrĩa ũteĩndigagĩra; ũguo nĩguo Jehova, o we Jehova Mũnene wa Ita, ekuuga.
20. Nĩ ũndũ mũtĩ waku wa ngingo wauunangire o tene, na ũgĩtuanga mĩhĩndo yaku, ũgĩkiuga atĩrĩ, Ndingĩtungata niĩ; nĩ gũkorũo gĩthũngũri-inĩ kĩrĩa gĩothe kĩraya na igũrũ, o na mũtĩ-inĩ ũrĩa wothe mũruru, nĩkuo wekomirie thĩ ũkĩhũra maraya.
21. No rĩrĩ, nĩndakũhandire ngĩkũrũmia o ta wĩ mũthabibu mwega mũno wa mbeũ thuranĩre. Kaĩ ũkĩgarũrũkĩte atĩa, ũgatuĩka o ta mũthabibu ũtarĩ mwega harĩ niĩ, o mũthabibu wa gĩthaka!
22. Nĩ ũndũ-rĩ, o na ũngĩĩthamba na igata, o na ũgerie gwĩtheria na thabuni mũingĩ mũno-rĩ, ũũru waku ndũngĩkorũo ũthirĩte harĩ niĩ; ũguo nĩguo Mwathani Jehova ekuuga.
23. Rĩu-rĩ, wakĩhota atĩa kuuga ũũ: Niĩ ndiĩthũkĩtie! Ndirũmĩrĩire kĩrĩra kĩa Abaali! Ta rora na kũu gĩtuamba-inĩ, na uumbũre ũrĩa waneka kuo. Ti-itherũ ũtariĩ ta mori ya ngamĩra ĩrĩa ĩcangacangaga ĩgĩĩcarĩria njamba;
24. na ũkahaana ta njagĩ ĩrĩa ĩnuhanuhaga werũ-inĩ nĩ kwenda mũigũto. Rĩrĩa ĩĩ na mũrukĩ-rĩ, nũ ũngĩkĩhota kũmĩriĩra? Njamba ciothe iria imĩendete-rĩ, itingĩĩnogia ikĩmĩcaria, tondũ mweri wayo wakinya nĩikamĩona.
25. Ta kuhĩhia mĩthiĩre yaku, ndũgathiage ũtarĩ na nyamũga; naguo mũmero waku ũũgirĩrĩrie ndũkanyote. Nowe ũgĩcokete ũkoiga atĩrĩ, O na ingĩtaarũo atĩa kana atĩa-rĩ, no tũhũ, nĩ ũndũ nĩnyumĩranĩtie ngoro na andũ ageni, na nĩo ndĩrĩrũmagĩrĩra.
26. O ta ũrĩa mũici aconokaga rĩrĩa onwo-rĩ, ũguo noguo andũ a nyũmba ya Isiraeli magaconoka, o ene, na athamaki ao, na atongoria ao, na athĩnjĩri-Ngai ao, o na anabii ao,
27. o acio meraga mũgogo wa mũtĩ atĩrĩ, Wee nĩwe baba; o na makera ihiga atĩrĩ, Wee nĩwe watũciarire. Nĩ gũkorũo nĩma’hutatĩire ithenya rĩa kũ’hũgũkĩra: ĩndĩ-rĩ, hĩndĩ ĩrĩa maagwatwo nĩ thĩna noguo manjĩraga atĩrĩ, Arahũka, ũtũhonokie!
28. No rĩrĩ, kaĩ ngai ciaku iria wĩthondekeire nĩ getha ũciinamĩrĩre ũcihoe ikĩrĩ ha? Ta nĩikĩarahũke arĩ cio; no gũkorũo hihi ciahota gũkũhonokia hĩndĩ ĩrĩa wĩ na thĩna nĩ ũndũ atĩrĩ, wee Juda, o ta ũrĩa matũũra ma bũrũri waku maingĩhĩte magĩtarũo-rĩ, ũguo noguo ngai ciaku ciingĩhĩte.
30. Ndahũrire ciana cianyu ndĩciherithie-ĩ, no rĩrĩ, ũndũ ũcio warĩ wa tũhũ, tondũ itiigana kũhera o na hanini; rũhiũ rũanyu inyuene rũa njora-rĩ, nĩruo rũaninire anabii anyu o ta marĩĩtwo nĩ mũrũthi ũrĩa mũrĩani.
31. Atĩrĩrĩ, inyuĩ rũciaro rũrũ, ta cũraniai ũhoro wa Jehova. Ha ũhoro wa Isiraeli-rĩ, anga ndĩgĩtariĩ ta rũng’ũrĩ harĩ o? O na kana ta bũrũri wĩ nduma ndumanu? Nĩ kĩ gĩgĩtũmĩte andũ akwa moige ũũ: Nĩtũtuĩte mĩkwa; tũtigagũcokerera rĩngĩ o na rĩ?
32. Rĩu-rĩ, mũirĩtu aakĩhota kũriganĩrũo nĩ mathaga make ma kwĩgemia, kana mũhiki ariganĩrũo nĩ nguo ciake cia ũhiki? No rĩrĩ, andũ akwa matũire mariganĩirũo nĩ niĩ matukũ matangĩtarĩka.
34. O na ningĩ nguo-inĩ ciaku-rĩ, nĩkuonekaga thakame ya andũ athĩni arĩa matarĩ ũũru o na ũrĩkũ mekĩte. Nayo thakame ĩo-rĩ, ndimĩonete na ũndũ wa kũmĩcarĩrĩria mũno handũ hahitharu, no rĩrĩ, nĩ kũiyũra ĩiyũrĩte kũndũ guothe nguo-inĩ ciaku.
35. No rĩrĩ, wee nĩ kuuga uugaga atĩrĩ, Niĩ ndirĩ na kamũhua; ti-itherũ marakara make nĩ magarũre makanjeherera. Atĩrĩrĩ, nĩ gũtua ngũgũtuĩra cira nĩ ũndũ wa ũguo uugaga, atĩ, Ndiĩhĩtie.
36. Ũrariũnganga atĩa ũkĩgarũra mĩthiĩre yaku? Nĩũgaconorithio nĩ Misiri o ta ũrĩa waconorithirio nĩ Ashuri.
37. Ningĩ nĩ kũhũndũka ũkahũndũka uumĩte kuo, wĩnyitĩte mũtwe na moko maku, nĩ ũndũ Jehova nĩaregete acio wĩhokete, na ndũkona kĩguni harĩ o.