1. ĨNO NĨYO ndũmĩrĩri ĩrĩa yakinyĩrĩire Jeremia yumĩte he Jehova, hĩndĩ ĩrĩa Zedekia, mũthamaki, aamũrekeirie Pashuri wa Malikija, na Zefania wa Maaseia, mũthĩnjĩri-Ngai, makamwĩre atĩrĩ,
2.
Ndagũthaitha ũtũtuĩrĩrie ũhoro he Jehova, nĩ ũndũ Nebukadirezaru, mũthamaki wa Babuloni, nĩatũtharĩkĩire; na hihi Jehova nĩegũtwĩka o ta ũrĩa maũndũ make marĩa ekaga ma kũgegania matariĩ, nĩ getha mũthamaki ũcio atweherere.
4. Jehova, Ngai wa Isiraeli, ekuuga ũũ: Atĩrĩrĩ, indo cia mbaara iria mũnyitĩte na moko, o ici mũkũrũa mbaara nacio na andũ a mũthamaki wa Babuloni, o na Akalidei, acio mamũrigicĩirie na kũu mbarĩ ĩrĩa ĩngĩ ya rũthingo rũa itũũra-rĩ, nĩ kũhũndũra ngũcihũndũrithia ndĩcicokie o gũkũ itũũra-inĩ rĩrĩ thĩinĩ.
5. Ningĩ niĩ mwene ’hũrane na inyuĩ ndambũrũkĩtie guoko gwakwa, o na njĩkĩrĩte guoko gwakwa hinya, naguo ũguo nĩ ta kuuga ndakarĩte, na ndĩ mũng’ũrĩku, o na ngathũgũta mũno mũno.
6. Nakĩo kĩrĩa gĩothe gĩtũũraga itũũra rĩrĩ, andũ o na kana ũhiũ-rĩ, nĩngakĩringa, ndĩkĩũrage na mũthiro mũnene mũno.
7. Ningĩ Jehova ekuuga atĩrĩ, Thutha wa maũndũ macio, Zedekia mũthamaki wa Juda, o na ndungata ciake, o na andũ arĩa angĩ, o arĩa othe magakorũo matigĩtwo kũu itũũra-inĩ mataninũkĩtio nĩ mũthiro ũcio, kana makoragwo na rũhiũ rũa njora, o na kana magakua nĩ ng’aragu-rĩ, nĩ kũneana ngamaneana moko-inĩ ma Nebukadirezaru, mũthamaki wa Babuloni, o na ndĩmaneane moko-inĩ ma thũ ciao, o na moko-inĩ ma andũ arĩa macaragia kũmaruta muoyo; nake mũthamaki ũcio nĩakamahũra na hiũ cia njora iria njũgĩ, na ndakamacaĩra, o na kana aiguanĩre kĩeha, o na kana aiguanĩre tha.
8. O na andũ aya mere atĩrĩ, Jehova ekuuga ũũ: Atĩrĩrĩ, ngũmũtemera njĩra ya muoyo o mbere yanyu, o na njĩra ya gĩkuũ.
9. Mũndũ ũrĩa ũgũikara itũũra-inĩ rĩrĩ-rĩ, ndarĩ hingo atagakua oragĩtwo na rũhiũ rũa njora, kana ng’aragu, kana mũthiro; no rĩrĩ, mũndũ ũrĩa ũkoima na nja, athiĩ akeheane harĩ Akalidei arĩa matũire mamũrĩgicĩirie-rĩ, nĩagatũũra muoyo, naguo muoyo wake ũtuĩke ta kĩndũ etahĩire harĩ gĩkuũ we mwene.
10. Nĩ gũkorũo itũũra rĩrĩ ndĩrĩroretie ũthiũ wakwa nĩ getha ndĩrĩgere ngero njũru, na ndirĩĩke wega o na hanini; ũguo nĩguo Jehova ekuuga. Nĩ kũneanwo rĩkaneanwo kwĩ mũthamaki wa Babuloni, nake arĩcine na mwaki.
11. O naho ha ũhoro wa nyũmba ya mũthamaki wa Juda-rĩ, ta iguai ndũmĩrĩri ya Jehova.
12. Atĩrĩrĩ, inyuĩ andũ a nyũmba ya Daudi, Jehova ekũmwĩra ũũ: Tuanĩrai cira na kĩhooto kũrĩ o rũcinĩ, o nao andũ arĩa matunyĩtwo indo ciao mũmahonokie guoko-inĩ kwa arĩa mamahinyagĩrĩria, nĩ getha mang’ũrĩka makwa matikae kũmũũkĩrĩra maakanĩte ta mwaki ũgũcinana ũtangĩhoreka, nĩ ũndũ wa ũũru wa ciĩko cianyu.
13. Atĩrĩrĩ, inyuĩ mũtũũraga ituamba-inĩ, o na ndwaro-inĩ cia mahiga cia bũrũri ũrĩa mũgũu, Jehova ekuuga ũũ: Ndĩ wa kũhũrana na inyuĩ, o inyuĩ mũũragia atĩrĩ, Nũ ũngĩgĩũka kũhũrana na ithuĩ, o na kana atonye ciikaro-inĩ ciitũ?
14. Nĩ kũhũra ngũmũhũra o ta ũrĩa maciaro ma ciĩko cianyu matariĩ ũguo nĩguo Jehova ekuuga. Ningĩ njakie mwaki kĩrĩti-inĩ kĩao, ũrĩe kĩrĩa gĩothe kĩmarigicĩirie.