1. NINGĨ Jehova ekuuga ũũ: Ikũrũka ũkinye mũciĩ wa mũthamaki wa Juda, ũkaarĩrie ciugo ici kuo,
2. uuge atĩrĩ, Igua ũhoro wa Jehova, wee mũthamaki wa Juda, o wee ũikarĩire gĩtĩ kĩa ũnene kĩa Daudi, ũũigue wee mwene, o na ndungata ciaku, o na andũ aku arĩa matonyagĩra ihingo-inĩ ici.
3. Jehova ekuuga ũũ: Atĩrĩrĩ, tuanagĩrai cira na kĩhooto, na mwĩkage maũndũ ma ũthingu, o nao andũ arĩa matunyĩtwo indo ciao mũmahonokie moko-inĩ ma mũmahinyĩrĩria; nakuo kũndũ gũkũ-rĩ, mũtikaneke ũndũ mũũru, o na kana mũguthũkĩre mũgeni na ũhinya, kana mwana wa ndigwa, o na kana mũka wa ndigwa, kana mũite thakame ya mũndũ ũtarĩ ũũru ekĩte.
4. Nĩ ũndũ ti-itherũ mũngĩĩka maũndũ macio, ihingo ici cia nyũmba ĩno itirĩ hingo itegũtũũra itonyagĩrũo nĩ athamaki a gũikaragĩra gĩtĩ kĩa Daudi kĩa ũnene, nao matonyage mahaicĩte ngari cia ita, o na mbarathi, o ene o na ndungata ciao, o na andũ ao.
6. Nĩ gũkorũo ha ũhoro wa nyũmba ya mũthamaki wa Juda Jehova ekuuga atĩrĩ, Wee nĩwe ũtuĩkĩte ta Gileadi harĩ niĩ, na ũkahaana ta ũrĩ gacũmbĩrĩ ga kĩrĩma kĩa Lebanoni; no o na gwatuĩka nĩ ũguo-rĩ, ti-itherũ ngagũtua o ta werũ mũtheri, o na ta matũũra matatũũrĩtwo nĩ andũ.
10. Atĩrĩrĩ, tigai kũrĩrĩra mũndũ ũrĩa mũkuũ, o na kana mũmũcakaĩre; no rĩrĩ, rĩrĩrai mũno mũndũ ũrĩa mũrindũre, nĩ ũndũ ndarĩ hingo agacoka kwao, o na kana acoke kuona bũrũri wao ũrĩa aaciarĩirũo.
11.
Nĩ ũndũ ha ũhoro wa Shalumu, mũrũ wa Josia, mũthamaki wa Juda, ũcio wacokire gũthamaka ithenya rĩa ithe Josia, o ũcio warindũrirũo akiuma kũndũ gũkũ, Jehova ekuuga atĩrĩ, Ndakahũndũka acoke gũkũ o na atĩa;
12. no rĩrĩ, kũndũ kũu maamũtwarire arĩ mũgwate, nokuo agakuĩra, na ndagacoka kuona bũrũri ũyũ o na rĩ.
13. Hĩ! Kaĩ mũndũ ũrĩa wakithagia nyũmba yake agĩĩka maũndũ matarĩ ma ũthingu arĩ na haaro-ĩ! O natuo tũnyũmba twake agatwakithia na ũndũ wa maũndũ matarĩ na kĩhooto! O we ũrĩa wĩgunaga na wĩra ũrĩa arutĩirũo nĩ mũndũ ũngĩ atekũmũhe mũcara wake, na akamũima kĩrĩa aagĩrĩirũo nĩ kũheo nĩ ũndũ wa wĩra ũcio wake;
14. o ũcio uugaga atĩrĩ, Ngwĩakĩra nyũmba njariĩ, ĩĩ na tũnyũmba twĩ na ũcangĩro; ningĩ agacoka agetuĩra ndirica, na akahĩrĩga nyũmba ĩo yake igũrũ na mbaũ cia mĩtarakwa, na akamĩhaka rangi mũtune.
15. Rĩu-rĩ, anga ũgũthamaka nĩ ũndũ wa ũrĩa ũingĩhĩtie mĩako ya mĩtarakwa ũgakĩria andũ arĩa angĩ? Githĩ thoguo ndaatũire arĩaga na akanyua o na agatuanĩra cira na kĩhooto? Nayo hĩndĩ ĩo yothe no aatũire agaacĩire.
16. Nĩaaciragĩra andũ arĩa athĩni o na arĩa akĩa na kĩhooto, naguo ũhoro wake ũkĩonwo wĩ mwagĩrĩru. Githĩ gwĩka ũguo tikuo kũmenyana na niĩ? Ũguo nĩguo Jehova ekuuga.
17. No rĩrĩ, wee maitho maku o na ngoro yaku itirĩ ũndũ ũngĩ iroranĩtie naguo tiga o gũcumĩkĩra indo ciene, o na gũita thakame ya andũ arĩa matarĩ na ũũru mekĩte, o na kũhinyanĩrĩria, o na gwĩkana maũndũ na ũhinya.
18.
Tondũ ũcio, ha ũhoro wa Jehoiakimu, mũrũ wa Josia, mũthamaki wa Juda, Jehova ekuuga ũũ: Andũ matikamũrĩrĩra moige, Ĩiya mũrũ wa ithe witũ-ĩ! O na kana, Ĩiya mwarĩ wa ithe witũ-ĩ! Ningĩ matikamũrĩrĩra moige, Ĩiya mwathi witũ-ĩ! O na kana, Ĩiya ũnene wake-ĩ!
19. Agathikwo o ta ũrĩa ndigiri ĩthikagwo; amu nĩ kũgucũrũrio akagucũrũrio aikio na kũu mbarĩ ĩrĩa ingĩ ya ihingo cia Jerusalemu.
20. Atĩrĩrĩ, ta ambata ũthiĩ Lebanoni, ũkarĩrĩre kuo, o na ũkaanĩrĩre na mũgambo mũnene wĩ kũu Bashani, o na ningĩ ũkayũrũrũke wĩ kũu Abarimu; nĩ gũkorũo anyanya aku othe nĩ anine.
21. Hĩndĩ ĩrĩa waikaraga ũgaaciĩre nĩndakwarĩirie, no wee ũkĩnjĩra atĩrĩ, Ndingĩĩtĩkĩra kũigua. Mũtugo ũcio wa kwaga gwathĩkĩra uuge wakwa, nĩguo ũtũire naguo gwata o hĩndĩ ĩrĩa warĩ mũnyinyi.
22. Atĩrĩrĩ, arĩithi aku othe makahurutwo nĩ rũhuho, o nao anyanya aku matahwo; ti-itherũ hĩndĩ ĩo nĩ gũconoka ũgaconoka o na ũconorithio nĩ ũndũ wa waganu waku wothe.
23. Atĩrĩrĩ, inyuĩ andũ aya mũtũũraga Lebanoni, o inyuĩ mwakaga tũnyũmba twanyu mĩtarakwa-inĩ, kaĩ mũgatuĩka a gũcakaĩrũo mũno hĩndĩ ĩrĩa mũkagwatwo nĩ ruo ta rũa kũrũmwo, o ruo ta rũa mũndũ-wa-nja ũkũrũmwo-ĩ!
24.
Jehova egũkiuga atĩrĩ, O ta ũrĩa niĩ ndũũraga muoyo-rĩ, wee Jekonia wa Jehoiakimu, mũthamaki wa Juda, o na ũngĩkorũo ũtariĩ o ta gĩcũhĩ kĩa rũũri rũakwa gĩĩkĩrĩtwo guoko gwakwa kwa ũrĩo-rĩ, no kũruta ingĩkũruta ho,
25. ngũneane harĩ arĩa macaragia gũkũruta muoyo, o na ngũneane moko-inĩ ma andũ arĩa wĩtigagĩra, naguo ũguo nĩ ta kuuga guoko-inĩ kwa Nebukadirezaru, mũthamaki wa Babuloni, o na moko-inĩ ma Akalidei.
26. Nĩ gũikia ngagũikia na kĩano, wee mwene o na nyũkwa ũrĩa wagũciarire, ndĩmũrindũrithie mũtwarũo bũrũri ũngĩ kũrĩa mũtaaciarĩirũo; nakuo kũu nĩkuo mũgakuĩra.
27. No rĩrĩ, bũrũri ũyũ ngoro ciao ciĩriragĩria gũcoka-rĩ, matikaũcoka.
28. Hĩ! Anga Konia ũcio atariĩ ta kĩmene kĩa nyũngũ nguũ? Kana agatuĩka ta nyũngũ ĩrĩa yombirũo ĩkĩaga kwendeka? Magĩikĩtio na kĩano nĩ ũndũ kĩ, we mwene o na andũ a rũciaro rũake, makarindũrũo magatwarithio bũrũri ũrĩa matoĩ?
29. Atĩrĩrĩ, wee thĩ ĩno, thĩ ĩno, ĩ thĩ ĩno-i! Ta igua ũhoro wa Jehova.
30. Jehova ekuuga ũũ: Themenga mũndũ ũyũ, atũũre atarĩ mwana, na atũũre e mũndũ ũtakagĩa na mũnyaka matukũ make mothe; nĩ gũkorũo gũtirĩ mũndũ wa rũciaro rũake ũkona mũnyaka wa gũikarĩra gĩtĩ kĩa ũnene kĩa Daudi, atĩ nĩguo athamakĩre andũ a Juda o na rĩ.