1.
ĨNO NĨYO ndũmĩrĩri ĩrĩa yakinyĩrĩire Jeremia yumĩte he Jehova matukũ ma Jehoiakimu, mũrũ wa Josia, mũthamaki wa Juda, akĩĩrũo atĩrĩ,
2. Thiĩ kwa Arekabu mũciĩ, warie nao, ũcoke ũmatware nyũmba ya Jehova, ũmatonyie kanyũmba kamwe ga tũnyũmba twayo, ũmahe ndibei manyue.
3. Niĩ na niĩ ngĩkĩoya Jaazania, mũrũ wa Jeremia wa Habazinia, na ariũ a ithe, hamwe na ariũ ake othe, o na andũ othe a nyũmba ya Arekabu;
4. ngĩkĩmatwara nyũmba ya Jehova thĩinĩ, ngĩmatonyia kanyũmba ka ariũ a Hanani wa Igidaiia, mũndũ wa Ngai, o kau kaarĩ gũkuhĩ na kanyũmba ka anene, hau igũrũ rĩa nyũmba ya Maaseia wa Shalumu, mũikaria wa mũrango;
5. ngĩcoka ngĩigĩra ariũ acio a nyũmba ya Arekabu mbakũri mbere yao, ciiyũrĩte ndibei, o na ngĩmaigĩra ikombe, ngĩkĩmera ũũ: Nyuai ndibei ino.
6. No o makiuga atĩrĩ, Tũtikũnyua ndibei; nĩ ũndũ Jonadabu wa Rekabu, ithe witũ, nĩaatwathire, akiuga ũũ: Mũtikananyue ndibei, inyuene, o na kana ciana cianyu, tene na tene;
7. o na kana mwake nyũmba, kana mũhande mbeũ, kana mũhande mĩthabibu mĩgũnda, o na kana mũgĩe nayo; no rĩrĩ, matukũ manyu mothe mũgũtũũra hema-inĩ, nĩ getha mũnine matukũ maingĩ bũrũri ũyũ mũtũũraga ta mũrĩ ageni.
8. Na ithuĩ tũtũire twathĩkĩire uuge ũcio wa Jonadabu wa Rekabu, ithe witũ, maũndũ-inĩ macio mothe aatwathire, atĩ tũtikananyue ndibei matukũ maitũ mothe, ithuene, na aka aitũ, na ariũ aitũ, o na kana airĩtu aitũ;
9. o na kana twĩakĩre nyũmba cia gũtũũra, kana tũgĩe na mĩgũnda ya mĩthabibu o na kana ya irio, o na kana twĩhandĩre mbeũ;
10. no tũtũũraga o hema-inĩ, na tũkarũmia maũndũ macio mothe, tũgĩĩkaga o maũndũ maringaine na macio Jonadabu, ithe witũ, aatwathire.
11. No rĩrĩ, nĩgwakinyire atĩrĩ, atĩ hĩndĩ ĩrĩa Nebukadirezaru, mũthamaki wa Babuloni, aambatire agĩũka bũrũri ũyũ, tũgĩkiuga ũũ: Ũkĩrai tũthiĩ tũkinye Jerusalemu, nĩ ũndũ wa gwĩtigĩra mbũtũ cia ita cia Akalidei, o na ũndũ wa gwĩtigĩra mbũtũ cia ita cia Asuriata; naguo ũndũ ũcio nĩguo watũmire tũikarange gũkũ Jerusalemu.
13. Jehova Mũnene wa Ita, o we Ngai wa Isiraeli, ekuuga ũũ: Thiĩ wĩre andũ a Juda, o na arĩa matũũraga Jerusalemu, atĩrĩ, Jehova ekũmũũria ũũ: Anga mũtingĩtaarĩka, nĩguo mũigue ndeto ciakwa?
14. Ũhoro ũrĩa Jonadabu wa Rekabu aathire ariũ ake, atĩ matikananyue ndibei, nĩmaũhingagia, o na nginya ũmũthĩ hatirĩ o na ũmwe wao ũkundaga ndibei, nĩ ũndũ nĩmaathĩkĩire uuge wa ithe wao; no rĩrĩ, inyuĩ njaragia na inyuĩ ta arĩ kũroka ndokete gũũkĩra rũcinĩ tene ndĩmwarĩrie, na mũtirĩ mwanjigua o na rĩu.
15. O na ningĩ nĩndĩmũrekeirie ndungata ciakwa ciothe cia anabii ta arĩ kũroka ndokete gũũkĩra rũcinĩ tene nĩguo ndĩcirekie, nĩguo imwĩre ũũ: Ta garũrũkai rĩu, mũndũ o mũndũ atigane na mĩthiĩre yake mĩũru, na mwagĩrie ciĩko cianyu, mũtige gũcoka kũrũmĩrĩra ngai ingĩ mũcitungatĩre, na nĩmũgũtũũra bũrũri ũyũ ndamũheire inyuene o na maithe manyu; no rĩrĩ, mũtiigana kũndegera gũtũ, o na kana mũkĩnjigua.
16. Tondũ ũcio, kuona atĩ ariũ a Jonadabu wa Rekabu nĩmahingagia watho wa ithe wao ũrĩa aamaathire, no andũ aya nĩmaregaga kũnjigua-rĩ,
17. Jehova Ngai Mũnene wa Ita, o we Ngai wa Isiraeli, egũkiuga ũũ: Atĩrĩrĩ, nĩngarehithĩrie Juda, o na andũ othe arĩa matũũraga Jerusalemu, ũũru wothe ũrĩa ndaaririe ũhoro waguo ũmakoniĩ; nĩ ũndũ nĩnjarĩtie nao na makarega kũnjigua, o na ngameta na makarega kũnjĩtĩka.
18. Ningĩ Jeremia agĩcoka akĩĩra andũ a nyũmba ya Arekabu atĩrĩ, Jehova Mũnene wa Ita, o we Ngai wa Isiraeli, ekuuga ũũ: Tondũ wa ũrĩa mwathĩkĩire uuge wa ithe wanyu Jonadabu, na mũgetĩkĩra maũndũ mothe marĩa aamwathire, na mũgeka o ta ũrĩa watho wothe ũrĩa aamwathire ũtariĩ-rĩ,
19. ũcio Jehova Mũnene wa Ita, o we Ngai wa Isiraeli, ekuuga ũũ: Jonadabu wa Rekabu ndakaaga mũndũ wa kũrũgama mbere yakwa tene na tene.