1. ĨNO NĨYO ndũmĩrĩri ĩrĩa yakinyĩrĩire Jeremia yumĩte he Jehova thutha wa Nebuzaradani, mũnene wa arangĩri, aarĩkia kũmũreka ethiĩre oime Rama, hĩndĩ ĩrĩa aamũtwarithĩtie kuo e muohe na mĩnyororo hamwe na andũ arĩa angĩ maatahĩtwo kũu Jerusalemu, o na Juda, o acio maanyitĩtwo nĩguo matwarũo Babuloni marĩ ohe.
3. nake Jehova nĩwe ũũrehithĩtie, na ageka o ta ũrĩa oigire; amu nĩmwĩhĩtie Jehova, mũkarega kũigua mũgambo wake; na nĩkĩo gĩtũmĩte ũndũ ũyũ ũmũkore.
4. Na atĩrĩrĩ, rĩu nĩndakuohora mĩnyororo ĩno wohetwo nayo moko. Ũngĩkorũo nĩũkuona arĩ wega tũthiĩ nawe Babuloni-rĩ, gĩũke na nĩndĩrĩkũmenyagĩrĩra; no ũngĩkorũo ndũkuona arĩ wega tũthiĩ nawe kũu Babuloni-rĩ, gĩikare. Atĩrĩrĩ, bũrũri ũyũ wothe wĩ mbere yaku; o handũ hothe harĩa ũrĩona ta hegũkwagĩrĩra ũkenda gũthiĩ ho-rĩ, thiĩ ho.
5. Ningĩ o hĩndĩ ĩo, atanahũndũka acoke kwao, akĩĩrũo atĩrĩ, No gĩcoke, ũthiĩ kwa Gedalia, mũrũ wa Ahikamu wa Shafani, ũrĩa mũthamaki wa Babuloni atuĩte barũthi wa matũũra ma Juda, mũtũũre nake kũu hamwe na andũ arĩa marĩ kuo; o na kana ũthiĩ handũ o hothe harĩa ũkuona hangĩkwagĩrĩra. Nake mũnene ũcio wa arangĩri agĩkĩmũhe irio o na kĩheo, akĩmũreka ethiĩre.
6. Hĩndĩ ĩo Jeremia agĩgĩthiĩ kwa Gedalia wa Ahikamu o kũu Mizipa, agĩtũũrania nake kuo hamwe na andũ arĩa angĩ maatigĩtwo bũrũri ũcio.
7.
Na rĩrĩ, hĩndĩ ĩrĩa anene othe a mbũtũ cia ita arĩa morĩte magatigwo bũrũri ũcio, o ene, o na andũ ao, maaiguire atĩ mũthamaki wa Babuloni nĩaatuĩte Gedalia wa Ahikamu barũthi kũu bũrũri ũcio, na akamũtua mũrori wa andũ othe, arũme, na andũ-a-nja, o na ciana, arĩa athĩni mũno a bũrũri ũcio, o arĩa mataatahirũo magatwarũo Babuloni-rĩ,
8. hagĩgĩthiĩ kwĩ Gedalia kũu Mizipa, andũ aya, Ishumaeli wa Nethania, na Johanani na Jonathani, ariũ a Karea, na Seraia wa Tanihumethu, na ariũ a Efai ũrĩa Mũnetofathi, na Jezania mũrũ wa Mũmaakathi, o ene o na andũ ao.
9. Nake Gedalia, mũrũ wa Ahikamu wa Shafani, akĩĩhĩta akĩmera o ene, o na andũ ao, atĩrĩ, Menyai mwĩtigĩre gũtungatĩra Akalidei; tũũrai bũrũri ũyũ, na mũtungatagĩre mũthamaki wa Babuloni, na nĩmũrĩonaga wega.
10. Naho ha ũhoro wakwa niĩ mwene-rĩ, ngũtũũra o gũkũ Mizipa nĩ getha ndĩmũrũgamagĩrĩre harĩ Akalidei arĩa marĩũkaga kũrĩ ithuĩ; no inyuĩ-rĩ, mwĩthondekere ndibei, na mwĩgethere maciaro ma hĩndĩ ya ũrugarĩ, o na maguta mwĩigĩre mũthithũ, mũgĩtũũre matũũra manyu o marĩa mwĩgwatĩire.
11. O ũguo taguo hĩndĩ ĩrĩa Ayahudi othe arĩa maatũire Moabi, o na arĩa maatũire thĩinĩ wa ciana cia Amoni, o na arĩa maatũire Edomu, o na arĩa maarĩ mabũrũri mothe, maaiguire atĩ mũthamaki wa Babuloni nĩatigĩtie matigari ma Juda, o na agatua Gedalia, mũrũ wa Ahikamu wa Shafani, mũrori wao-rĩ,
12. Ayahudi acio othe magĩkĩhũndũka moimĩte kũndũ guothe kũrĩa maaharaganĩirie, magĩcoka bũrũri wa Juda, magĩkinya he Gedalia o kũu Mizipa, magĩĩthondekera ndibei, o na makĩgetha maciaro ma hĩndĩ ya ũrugarĩ maingĩ mũno.
13. Ningĩ atĩrĩ, Johanani wa Karea, o na anene othe a mbũtũ cia ita arĩa morĩte magatigwo bũrũri ũcio, magĩthiĩ kwa Gedalia o kũu Mizipa, makĩmwĩra atĩrĩ,
14. Kaĩ ũtoĩ atĩ Baalisi, mũthamaki wa ciana cia Amoni, nĩareketie Ishumaeli wa Nethania oke akũrute muoyo? No rĩrĩ, Gedalia wa Ahikamu ndaigana kũmetĩkia.
15. Hĩndĩ ĩo Johanani wa Karea akĩarĩria na Gedalia kũu Mizipa na hitho, akiuga atĩrĩ, Ndagũthaitha ũreke ’thiĩ ngorage Ishumaeli wa Nethania, na gũtirĩ mũndũ ũrĩmenya ũhoro ũcio; kaĩ angĩkũruta muoyo nĩ ũndũ kĩ, nao Ayahudi othe arĩa monganĩte harĩ wee maharaganio, o nao andũ a Juda arĩa matigarĩte more biũ?
16. No Gedalia wa Ahikamu akĩĩra Johanani wa Karea atĩrĩ, Ndũgwĩka ũndũ ũcio; nĩ ũndũ ũhoro ũcio ũkwaria wa Ishumaeli no wa njukũ theri.